رەسپۋبليكالىق سىناققا ءوز وڭىرلەرى ۇكىلەپ ءۇمىت ارتقان كىل جۇيرىكتەر جينالدى. ولاي بولاتىنى, الدىمەن اۋداندىق, وبلىستىق بايقاۋلار ۇيىمداستىرىلىپ, جۇزدەن جۇيرىك, مىڭنان تۇلپار شىققاندار سىن تەزىنەن وتكەن. بۋرابايدىڭ باۋرايىندا كورىگى قىزعان بايقاۋعا نۇر-سۇلتان, الماتى قالالارىمەن قاتار, ەلىمىزدىڭ 13 وبلىسىنىڭ جانە «بالداۋرەن», «بالداۋرەن-شىمكەنت» رەسپۋبليكالىق وقۋ-ساۋىقتىرۋ ورتالىقتارىنىڭ وكىلدەرى قاتىستى.
الدىمەن سالتاناتتى اشىلۋ ءراسىمى ءوتتى. كاسىبي بىلىكتىلىكتەرىن ساراپقا سالعالى تۇرعانداردىڭ الدىندا «ءبالداۋرەن» ورتالىعىنىڭ باس ديرەكتورى مۇحيتدين تولەپباي جانە بايقاۋدىڭ باس تورەشىسى ۇلتتىق دەنە تاربيەسى عىلىمي-تاجىريبەلىك ورتالىعىنىڭ ديرەكتورى سادىق مۇستافاەۆ ءسوز سويلەپ, اتالعان بايقاۋدىڭ ءمان-ماڭىزىنا تەرەڭىرەك توقتالدى. ۇيىمداستىرۋشىلاردىڭ ايتۋىنا قاراعاندا, مۇنداي جيىن وتكىزۋدىڭ پايداسى مول. بىرىنشىدەن, ەلىمىزدىڭ ءار تۇكپىرىنەن كەلىپ وتىرعان ۇمىتكەرلەردىڭ بويىنداعى كاسىبي ءبىلىم-بىلىكتىلىگى ارقىلى ءار ايماقتا دەنە تاربيەسى ءپانىنىڭ قانشالىقتى دامىپ جاتقانىن ساراپتاۋعا بولادى. ەكىنشىدەن, ءوزارا باق سىناسقان ءپان مۇعالىمدەرى ارىپتەستەرىنىڭ وزىق ءادىس-تاسىلدەرىن, ءتالىمدى تاجىريبەلەرىن تەرەڭىرەك تانىپ, بويلارىنا سىڭىرەدى. اينالىپ كەلگەندە, ۇزدىككە ىلەسۋ ارقىلى ورتاق ءىس العا جىلجيدى.
بايقاۋ بارىسىندا بىلىكتىلىكتى ساراپتاۋ جانە جاڭاشىل پەداگوگ باعىتتارى بويىنشا تالاپكەرلەردىڭ ورەسى تارازى باسىنا تارتىلدى. العاشقى سىناقتا ءپان مۇعالىمدەرى دەنە تاربيەسى بويىنشا 30 سۇراقتان تۇراتىن ساۋالناماعا ءجۇز مينۋتتىڭ ىشىندە جاۋاپ بەرسە, 20 سۇراقتان تۇراتىن پەداگوگيكا جانە وقىتۋ ادىستەمەلەرى ورايىنداعى بىلىكتىلىكتەرى بەزبەندەلدى. سونداي-اق وسى باعىتتا ءار مۇعالىم باسكەتبول, ۆولەيبول ءتارىزدى سپورت تۇرلەرىنەن ناقتى ءىس-قيمىل ۇلگىلەرىن كورسەتتى.بايقاۋدىڭ ەكىنشى كەزەڭىندە قاتىسۋشىلار ءوز ماماندىقتارىنا وراي وزىق ويلارىمەن, ىلكىمدى ىستەرىمەن, ناتيجەلى جۇمىستارىمەن ەرەكشەلەندى. ءپاندى وقىتۋ بارىسىنداعى تيىمدىلىگى مول جاڭالىقتارىمەن ءبولىستى.
بايقاۋدىڭ ءۇشىنشى, ءتورتىنشى كەزەڭدەرى دە تارتىستى ءوتتى. اشىق ساباق وتكىزىلدى. مەكتەپتەگى سپورت شارالارىن ۇيىمداستىرۋدىڭ ۇزدىك ۇلگىلەرى ساراپشىلاردىڭ نازارىنا ۇسىنىلدى. ماسەلەن, 5-9-سىنىپتاردا بۇل ءپان ءبىلىم بەرۋ سالاسىنداعى جاڭارتىلعان باعدارلاما بويىنشا وتكىزىلەدى. جارىستىڭ ءبىر ەرەكشەلىگى – كونكۋرسقا قاتىسۋشىلار تاقىرىپتاردى وزدەرى تاڭداپ الدى.
قازىلار القاسىنىڭ شەشىمىمەن باس جۇلدە باتىس قازاقستان وبلىسىنىڭ وكىلى ابزال ناۋرىزباەۆقا بۇيىرسا, ءبىرىنشى ورىنعا جامبىل وبلىسىنان دميتري ۆورونكو, ەكىنشى ورىنعا ماڭعىستاۋ وبلىسىنىڭ وكىلى كوبەن نۇرسۇلتان يە بولدى. ال ءۇشىنشى ورىنعا اقتوبە وبلىسىنان كەلگەن سامعات ەسقاراەۆ جايعاستى. اقمولا وبلىسى, بۋراباي اۋدانى