وسىنىڭ الدىندا, ياعني 2019 جىلعى 23 ساۋىردە قازاقستان رەسپۋبليكاسى ورتالىق سايلاۋ كوميسسياسىنا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ 55-بابىنا سايكەس Nur Otan پارتياسى قازاقستان رەسپۋبليكاسىنىڭ پرەزيدەنتتىگىنە كانديدات رەتىندە قاسىم-جومارت كەمەل ۇلى توقاەۆتىڭ ءتيىستى قۇجاتتارىن تاپسىرعان بولاتىن. وندا Nur Otan پارتياسى جوعارى ورگانىنىڭ قازاقستان رەسپۋبليكاسىنىڭ پرەزيدەنتتىگىنە كانديدات ۇسىنۋ ءجونىندەگى وتىرىسىنىڭ حاتتاماسىنان ءۇزىندى, قاسىم-جومارت كەمەل ۇلى توقاەۆتىڭ قازاقستان رەسپۋبليكاسىنىڭ پرەزيدەنتتiگىنە كانديدات بولىپ داۋىسقا تۇسۋگە كەلiسiم بەرگەنى تۋرالى ءوتiنiشى, ءومىرباياندىق دەرەكتەرى, قازاقستان رەسپۋبليكاسى ورتالىق سايلاۋ كوميسسياسىنىڭ شوتىنا سايلاۋ جارناسىن ەنگiزگەنiن كۋالاندىراتىن قۇجات, جەكە باسىن كۋالاندىراتىن قۇجاتتىڭ كوشىرمەسى; جوعارى وقۋ ورنىنداعى ءبىلىمى تۋرالى ديپلومدارىنىڭ كوشىرمەلەرى جانە مەملەكەتتىك قىزمەتتە جۇمىس تاجىريبەسىنىڭ بار ەكەنىن راستايتىن قۇجاتتار بولدى.
بۇل قۇجاتتاردىڭ ءبارى تالاپقا ساي بولعاننان كەيىن لينگۆيستيكالىق كوميسسيا مۇشەلەرى زاڭعا ساي كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ راسىمىنە كىرىستى. قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن الدىمەن لينگۆيستيكالىق كوميسسيا ۇسىنعان تاقىرىپقا كولەمى ەكى بەتتەن اسپايتىن جازباشا تاپسىرما جازۋ بەرىلەدى. ودان كەيىن لينگۆيستيكالىق كوميسسيا ۇسىنعان كولەمى ءۇش بەتتەن اسپايتىن باسپا ءماتىنىن وقۋ ۇسىنىلادى. ال لينگۆيستيكالىق كوميسسيا ۇسىنعان تاقىرىپقا ساي كوپشىلىك الدىندا ءسوز سويلەۋگە كەمىندە ون بەس مينۋت ۋاقىت بەرىلەدى.
بۇل جايىندا لينگۆيستيكالىق كوميسسيا توراعاسى مىرزاتاي جولداسبەكوۆ: «بۇگىن لينگۆيستيكالىق كوميسسيا ءوز جۇمىسىن باستادى. Nur Otan پارتياسى ۇسىنعان ۇمىتكەر قاسىم-جومارت توقاەۆ ەمتيحان تاپسىردى. ەكى ساعات ۋاقىت بولدى. بارلىق ەرەجەگە سايكەس ەمتيحاندى تاپسىردى. ءبىرىنشى جازبا جۇمىسىنىڭ تاقىرىبى – «اباي قۇنانباي ۇلىنىڭ پوەزياسى مەن قارا سوزدەرى». ەكىنشى ءماتىن وقۋعا شەرحان مۇرتازانىڭ «مىڭبۇلاق» اڭگىمەلەر مەن حيكاياتتار جيناعىن تاڭداپ الدى. ءۇشىنشىسى, ول كىسىنىڭ جانىنا جاقىن تاقىرىپ – «قازىرگى قازاقستاننىڭ گەوساياساتى» بولدى. كوميسسيا مۇشەلەرى تولىق قۇرامدا قاتىسىپ, وزدەرىنىڭ پىكىرلەرىن اشىق ءبىلدىرىپ وتىردى», دەدى. بۇدان بولەك, ول: «قازاقستان رەسپۋبليكاسى پرەزيدەنتتىگىنە كانديدات ءبىرىنشى جازبا جۇمىسىن جازعاندا ابايدىڭ پوەزياسى تۋرالى, ابايدىڭ قارا سوزدەرى, ونىڭ حالىققا بەرەتىن ماڭىزى تۋرالى وتە تەرەڭ جازدى. ءبىز ول جۇمىستان بىردە-ءبىر قاتە كورگەنىمىز جوق. ال شەرحان مۇرتازانىڭ «مىڭبۇلاق» اتتى ءاڭگىمەلەر مەن حيكاياتتار كىتابىن ءوزى تاڭداپ الىپ, سونىڭ ءۇش بەتىن وقىدى. وقىعاندا دا وتە مانەرلەپ, ءوز ىرعاعىنا ساي كەلىستىرىپ وقىدى. قازىرگى قازاقستان گەوساياساتى تۋرالى ول كىسى تەرەڭ سويلەدى. وسىلاردىڭ ءبارىن تالداي كەلگەندە لينگۆيستيكالىق كوميسسيانىڭ بەرگەن قورىتىندىسى: «قاسىم-جومارت كەمەل ۇلى توقاەۆ مەملەكەتتىك ءتىلدى تولىق, جان-جاقتى مەڭگەرگەن», دەدى.