ءىس-شارانى ەلوردالىق ءبىلىم باسقارماسى ۇيىمداستىردى. چەمپيوناتقا 18-22 جاس ارالىعىنداعى تەحنيكالىق جانە كاسىپتىك ءبىلىم بەرەتىن مەكەمەلەردىڭ ستۋدەنتتەرى مەن قالا كاسىپورىندارىنىڭ جاس ماماندارى قاتىسادى.
«بارشاڭىز ءوز كاسىبي باعىتتارىڭىزدى تاڭدادىڭىزدار. ءسىز جوعارى ناتيجە كورسەتىپ قانا قويماي, ءوز شەبەرلىڭىزدى حالىقارالىق دەڭگەيدە سىناپ وتىرسىز. ءبىزدىڭ قالا ءۇشىن وسىنداي شاكىرتتەردى, ستۋدەنتتەردى تانىستىرۋ ۇلكەن قۇرمەت. چەمپيوناتتىڭ الداعى ءۇش كۇنى سىزدەر ءۇشىن وقيعالارعا ءارى قىزىقتى تاجىريبەگە قانىق بولۋىن شىن جۇرەكتەن تىلەيمىن. ءوز شەبەرلىكتەرىڭىزدى شىڭداڭىزدار, جوعارى ناتيجە كورسەتىڭىزدەر, جۇزدەن جۇيرىك بولىڭىزدار!» - دەدى شارانىڭ اشىلۋ سالتاناتىندا ءسوز سويلەگەن ءبىلىم باسقارماسىنىڭ باسشىسى ءانۋار جانعوزين.
چەمپيونات «ۆەب ديزاين», «اسپازشى», «كىرپىش قالاۋشى», «جەڭىل اۆتوكولىكتەردى جوندەۋ جانە قىزمەت كورسەتۋ», «شاناق جوندەۋ», «بيزنەسكە ارنالعان IT شەشىمدەر», «مەحاترونيكا», «ديزاين جانە مودەلدەۋ», «مەيرامحانا قىزمەتى», «جەلىلىك جانە جۇيەلىك اكىمشىلىك», «ديزاين», «ينجەنەرلىك گرافيكا», «ناۋبايحانا تەحنولوگياسى», «سانتەحنيكا جانە جىلۋ», «كونديتەرلىك بۇيىمدار», «گرافيكالىق ديزاين», «جەكە ءبىلىم بەرۋ جانە وقىتۋ» سياقتى باعىتتار بويىنشا وتەدى.
«چەمپيوناتقا ۆەب-باعدارلامالاۋ باعىتى بويىنشا ەكىنشى جىل قاتارىنان قاتىسىپ وتىرمىن. وتكەن جىلمەن سالىستىرعاندا, بيىل سايىستىڭ اۋقىمدىلىعى, تاقىرىپتاردىڭ ءار الۋاندىعى بايقالادى. قاتىسۋشىلاردىڭ قاتارى كوبەيگەن. ءبىزدىڭ كوماندانىڭ الدىندا تولىق فۋنكتسيونالدى ۆەب-سايت ازىرلەۋ مىندەتى تۇر. جالپى العاندا, جوبانى ازىرلەۋگە بىزگە 2 كۇن بەرىلەدى», - دەدى ءتۋرنيردىڭ قاتىسۋشىسى ۆيتالي سەليۆيتسكي.
چەمپيونات جەڭىمپازدارى 9-14 قىركۇيەكتە وتەتىن «WorldSkills Kazakhstan-2019» كاسىبي بىلىكتىلىكتىڭ V-ءشى رەسپۋبليكالىق چەمپيوناتىندا نۇر-سۇلتان كومانداسىنىڭ نامىسىن قورعايتىن بولادى.
بۇدان بولەك, وسى جىلى العاش رەت 13-15 جاس ارالىعىنداعى ورتا مەكتەپتەردىڭ 8-9 سىنىپ وقۋشىلارى اراسىندا «JasSkills Nur-Sultan –2019» قالالىق چەمپيوناتى وتكىزىلەدى دەپ جوسپارلانۋدا.