ءىس-شاراعا وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكروم نيازحودجاەۆ, پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ, ناۋايتانۋشى, فيلوسوفيا عىلىمدارىنىڭ دوكتورى مۇحامەدالي ءالي احمەدوۆ, الىشەر ناۋاي شىعارمالارىن قازاق تىلىنە اۋدارعان مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى, «شىعىس جۇلدىزى – ناۋاي» مانەرلەپ وقۋ بايقاۋىنىڭ قاتىسۋشىلارى قاتىستى.
قحا توراعاسىنىڭ ورىنباسارى-پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى جانسەيىت تۇيمەباەۆ ءوز ءسوزىندە شىعىستان شىققان بىرەگەي تۇلعالاردى ايتقاندا حافيز, فيردوۋسي, رۋداكي, نيزامي, ومار حايام, ساعدي, جالالاددين رۋمي, ناسير حۋسراۋ, جاميمەن قاتار ناۋايدىڭ ەسىمى دە ماقتانىشپەن ەسكە الىناتىنىنا توقتالدى. سونداي-اق حاكىم اباي بىرەگەي تۇلعانىڭ شىعارماشىلىق زەرتحاناسىنا تەرەڭ ۇڭىلسە, مۇحتار اۋەزوۆ, ەسماعامبەت ىسمايىلوۆ, راحمانقۇل بەردىباەۆ سياقتى ۇلكەن عالىمدار مول مۇراسىنىڭ كەڭ تانىلۋىنا ەلەۋلى ۇلەس قوسقانىن اتاپ ءوتتى.
پارلامەنت ءماجىلىسىنىڭ دەپۋتاتى فاحريددين قاراتاەۆ بولسا وزبەكستان مەن قازاقستان ءۇشىن تولە بي, ايتەكە بي بابالارىمىزدىڭ, ءجالاڭتوس ءباھادۇردىڭ, ابىلاي حانداردىڭ مۇرالارى ەكى ەلگە دە ورتاق ەكەنىن ايتتى. «مىسالى, رۋحاني قۇندىلىقتارى ورتاق تۋىسقان ەكى ەل ءۇشىن دە ابىلاي حان, ءجۇسىپ ءجالاڭتوس ورتاق تۇلعالار. وسى باعىتتا تاريحتىڭ زەرتتەلمەگەن تۇستارى ءالى كوپ. تۋىستىق تامىردى نىعايتۋ بىزگە پارىز», دەدى دەپۋتات ف.قاراتاەۆ. اقىن نەسىپبەك ايت ۇلى الىشەر ناۋايدىڭ عازالدارىن قازاق تىلىنە ءتارجىمالاپ, جەكە جيناق شىعارعانىن, قازۇۋ-ءدىڭ شىعىستانۋ فاكۋلتەتىندە قىزمەت ەتكەن جىلدارى پروفەسسور وتەگەن كۇمىسباەۆ ناۋاي عازالدارى مەن اباي شىعارماشىلىعىنىڭ ساباقتاستىعىن زەرتتەپ, بىرنەشە عىلىمي ەڭبەك جازعانىن ەسكە سالدى. ال الماتىداعى ەڭ اسەم كوشەلەردىڭ بىرىنە ءناۋايدىڭ ەسىمى بەرىلۋى كورشىلەس جاتقان ەكى ەل قارىم-قاتىناسىن جاقىنداتاتىن جايلاردىڭ كوپتىگىن كورسەتەتىنىن جەتكىزدى.
– قازاقستان مەن وزبەكستاندى باعزى زامانداردان بەرگى دوستىق قاتىناستار بايلانىستىرادى. ءبىز – تاريحىمىز ورتاق, ءتىلىمىز تۋىس, تاتۋ كورشىلىك سالتىن ۇستانعان باۋىرلاس ەلدەرمىز. وسى ەرەكشەلىكتەرىمىزدى نەگىزگە الا وتىرىپ, ەكى مەملەكەت باسشىلارى 2018 جىلى وزبەكستاننىڭ قازاقستانداعى جىلىن جانە 2019 جىلى قازاقستاننىڭ وزبەكستانداعى جىلىن وتكىزۋ تۋرالى شەشىم قابىلداعان بولاتىن.
وتكەن جىلى –قازاقستاننىڭ وزبەكستانداعى جىلى اياسىندا قازاقستان حالقى اسسامبلەياسى تاراپىنان 200-دەن استام ءىس-شارا وتكىزىلگەنىن اتاپ ايتقىم كەلەدى. ولاردىڭ ەكى حالىقتى بۇرىنعىدان بەتەر جاقىنداتا تۇسكەنى, ەكى ەل اراسىنداعى مادەني-گۋمانيتارلىق قاتىناستاردى دامىتۋدىڭ ماڭىزدى فاكتورىنا اينالعانى اقيقات, – دەدى جانسەيىت قانسەيىت ۇلى.
الىشەر ناۋاي XIV عاسىردىڭ ورتاسى مەن XV عاسىردىڭ باسىندا ءومىر سۇرگەن تۇركى حالىقتارىنا ورتاق ۇلى اقىن, ويشىل, مەملەكەتتىك قايراتكەر. ونىڭ شىعارمالارى حV عاسىردىڭ وزىندە ماۋەرەنناھر مەن حوراساندا عانا ەمەس, يران, ازەربايجان, شىعىس تۇركىستان, ءۇندىستان, مىسىر, تۇركى ەلدەرىنە, كەيىننەن ەۋروپا مەن امەريكا كىتاپحانالارىنا تارادى.
كەش بارىسىندا الىشەر ءناۋايدىڭ ءومىرى تۋرالى بەينەروليك كورسەتىلىپ, قوناقتار «انالار اماناتى» قولونەر شەبەرلەرى ورتالىعىنىڭ كورمەسىن تاماشالادى. سونداي-اق دوستىق ءۇيىنىڭ اكت زالىندا شىعارماشىلىق ۇجىمداردىڭ كونتسەرتتىك باعدارلاماسى ۇيىمداستىرىلدى.