– قازاقستان چەمپيونىسىز. سولاي بولا تۇرا جاقىندا وتكەن الەم چەمپيوناتىندا نەگە ءبىرىنشى تاقتادا سىنعا تۇسپەدىڭىز؟
– بۇل سۇراققا باپكەردىڭ جاۋاپ بەرگەنى دۇرىس.
– وندا سۇراقتى باسقاشا قويايىن. قىزدار قۇراماسىنىڭ باپكەرى ارمان پاشيكياننىڭ جۇمىسىنا كوڭىلىڭىز تولا ما؟
– راسىن ايتسام, باپكەردىڭ جۇمىسى كوڭىلىمىزدەن شىقپادى. پاشيكيان چەمپيونات باستالاردان ءبىر كۇن بۇرىن عانا كەلدى. كوماندامەن تولىققاندى تانىسىپ ۇلگەرگەن جوق. سوندىقتان بولار, مەنى ءبىرىنشى تاقتادان ىسىرىپ تاستاعانى. ايتپەسە بايراقتى باسەكەلەردە كەم دەگەندە 5-6 ۇپاي الىپ جۇرگەن ەدىم. 2012 جىلى ىستانبۇلدا وتكەن بۇكىلالەمدىك وليمپيادادا ءبىرىنشى تاقتادا ويناپ, ءتورت دۇركىن الەم چەمپيونى, بىرنەشە دۇركىن وليمپيادا چەمپيونى, بىرنەشە دۇركىن گران-پري جەڭىمپازى حوۋ يفانمەن تەڭ ءتۇسىپ, جالپى 6,5 ۇپاي جيناعانمىن. ال 2013 جىلى استانادا وتكەن الەم چەمپيوناتىندا ەۋروپا چەمپيونى ۆالەنتينا گۋنينانى ۇتىپ, جالپى 5,5 ۇپاي ەنشىلەدىم.
– كەرەمەت! بىراق پاشيكيان مۇنداي شەشىمدى قۇرامانىڭ وزگە دە باپكەرلەرىمەن اقىلداسىپ قابىلداعان بولار؟
– كەڭەسىپ شەشسە, قۋانار ەدىم. بىراق ولاي ەمەس. جارىستا كىمنىڭ قاي تاقتادا وينايتىنىن كوماندانىڭ بەلگىلى ءبىر مۇشەسىنەن سۇراعان جاتتىقتىرۋشىنى العاش كورۋىم. ەگەر باس باپكەر قۇراما ويىنشىلارىنىڭ دەڭگەيىن جاقسى بىلسە, ەشكىمنەن, ونىڭ ۇستىنە قاراماعىنداعى شاحماتشىلاردان اقىل سۇراماس ەدى.
– قۇراما مۇشەسى بولۋ ءۇشىن قازاقستان چەمپيوناتىندا جۇلدەگەر بولۋ مىندەتتى مە؟
– ارينە ىشكى چەمپيوناتتىڭ ءناتيجەسىنە قاراپ حالىقارالىق جارىستاردا كىمنىڭ قاي نومىردە وينايتىنى انىقتالادى.
– ولاي بولسا, ءبيبىسارا اساۋباەۆا قازاقستان چەمپيوناتىنا قاتىسپاي-اق جاھاندىق جارىستا ەل نامىسىن قورعادى. بۇل قالاي؟
– ءبيبىسارا – تالانتتى جاستاردىڭ ءبىرى. وعان تالاس جوق. الايدا, قۇراما مۇشەلىگىنە بىردەن قابىلدانعانىنا تاڭعالعانىمىز راس. سوڭعى الەم چەمپيوناتىندا جامبىلدىق ءمادينا داۋلەتباەۆا سىنعا ءتۇسۋ كەرەك ەدى. بىراق ونىڭ ورنىنا ءبيبىسارا كەلدى. ءمادينانىڭ ويناماعانى قۇراما مۇشەلەرىنە جايسىز اسەر ەتتى.
– شاحماتتا «اياقتان شالۋ» بولىپ تۇراتىن سياقتى عوي. وندايدى ءوز باسىڭىزدان وتكەردىڭىز بە؟
– 2013 جىلى الەم چەمپيوناتىندا توعىز ويىننان 5,5 ۇپاي جينادىم. سوڭعى تۋرعا دەيىن مەن ءبىرىنشى تاقتادا جەكەلەي مەدال ءۇشىن ەكىنشى ورىندا تۇرعان ەدىم. توعىزىنشى پارتياعا قاتىسپاسام, كۇمىس جۇلدە ءسوزسىز مەنىكى ەدى. الايدا, باپكەرلەر ويناۋىمدى قايتا-قايتا تالاپ ەتتى. وكىنىشكە قاراي, گرۋزيالىق نانا دزاگنيدزەگە ەسە جىبەرىپ, قولدا تۇرعان كۇمىس مەدالدان ايىرىلىپ قالدىم. سايكەسىنشە, ءتورتىنشى ورىنعا سىرعىدىم. 8 ويىننان 5 ۇپاي جيناعان ۋكراينالىق ەكاتەرينا لاگنو 2-ورىندى, ءدال وسى كورسەتكىشتى قايتالاعان ەۋروپا چەمپيونى ۆالەنتينا گۋنينا 3-ورىندى يەلەندى.
– باپكەرلەر مۇنى ادەيى جاسادى دەپ ويلايسىز با؟
– توعىز مارتە قاتارىنان سايىسقا سالۋ – اقىلعا قونبايتىن دۇنيە. وزگە ەلدىڭ شاحماتشىلارى جەتى پارتيادان كەيىن سوڭعى ەكى تۋرعا قاتىسپاي-اق جۇلدە الىپ جاتتى. ال مەن توعىز رەت شارشى تاقتاعا وتىردىم. ۇزدىكسىز توعىز پارتيا ويناۋ پسيحولوگيالىق تۇرعىدان قيىنعا سوعادى.
تۋرا سونداي جاعداي ەكى جىلدان كەيىن قىتايدا وتكەن الەم چەمپيوناتىندا دا قايتالاندى. سول كەزدە ەكىنشى ورىندا تۇرعان مەنى باپكەرلەر سوڭعى تۋردا تاقتاعا وتىرعىزىپ, جۇلدەسىز قالدىردى. كەيىننەن اناما پاۆەل كوتسۋر «ەگەر دە بارلىعى مەنىڭ قولىمدا بولسا, گ ۇلىسحاندى توعىزىنشى ويىنعا شىعارماي, جۇلدەگەر ەتەر ەدىم...» دەگەن ەكەن. بۇل جەردە باسقا بىرەۋلەردىڭ ارالاسقانى انىق. ايتپەسە الەم چەمپيونى اتاعى قولدا تۇرعان ەدى. وزگەلەر ارالاسپاعاندا, الەمنىڭ كۇمىس جۇلدەگەرى اتانعان بولار ەدىم.
– وسى سۇحباتتان كەيىن اياقتان شالۋشىلار ءتىپتى كوبەيىپ كەتەدى دەپ ويلامايسىز با؟
– ماقساتىم – بىرەۋگە كۇيە جاعۋ ەمەس. سۇحباتتىڭ باسىندا ءوزىڭىز بۇكپەسىز اڭگىمە بولسىن دەگەن سوڭ, بار شىندىقتى ايتىپ وتىرمىن.
– نەگىزگى قارسىلاسىڭىز كىمدەر؟
– بۇگىندە 20-35 جاس ارالىعىنداعى ۇزدىك اتانىپ جۇرگەن شاحماتشىلاردىڭ بارلىعى مەنىڭ قارسىلاسىم. ولارمەن كەز كەلگەن تۋرنيردە كەزدەسىپ قالۋىم مۇمكىن.
– نەشە باپكەرىڭىز بار؟
– باپكەرىم يۋري ياكوۆيچ پەن مۇرتاس قاجعاليەۆ. ال 2008 جىلى حالىقارالىق سپورت شەبەرى اتانعانعا دەيىن شىمكەنتتە گريگوري كيمنەن ءتالىم الدىم. گريگوري بوريسوۆيچ – وتە بىلىكتى مامان. «الار اسۋىڭ ءالى الدا, سەن ەندى مىقتىلارمەن جۇمىس ىستەۋىڭ كەرەك» دەپ اقىلىن ايتىپ شىعارىپ سالعاننان سوڭ, قازاقستان قۇراماسىنىڭ مۇشەسى, گروسسمەيستەر مۇرتاس قاجعاليەۆتەن اقىلى تۇردە ءتالىم الۋدى باستادىم. اپتاسىنا 2-3 رەت سكايپپەن, كەيدە باپكەر ءوزى شىمكەنتكە كەلىپ ۇيرەتىپ ءجۇر. مۇرتاس مۇرات ۇلىنىڭ گروسسمەيستەر, ودان كەيىن ەرلەر اراسىندا حالىقارالىق دارەجەدەگى سپورت شەبەرى اتانۋىما كوپ كومەگى ءتيدى.
– ەستە قالعان ەرەكشە پارتياڭىز تۋرالى ايتىپ بەرسەڭىز؟
– قىزىققا تولى پارتيالار كوپ. سونىڭ ءبىرى 2012 جىلى ىستانبۇلدا وتكەن كوماندالىق وليمپيادادا الەمنىڭ ءتورت دۇركىن چەمپيونى, بىرنەشە ءدۇركىن وليمپيادا چەمپيونى, گران-پري جەڭىمپازى قىتايلىق حوۋ يفانعا قارسى قارامەن ويناپ, تەڭ تۇسكەنىم ءالى ەسىمدە. ەكەۋمىز ءبىرىنشى تاقتادا سىنعا تۇستىك. ونىڭ قۇرعان تاكتيكاسى مىقتى بولدى. سوعان قاراماستان تەڭ ءتۇسىپ, زالدا وتىرعانداردىڭ جيىرما مينۋتتاي تىك تۇرىپ قوشەمەت كورسەتكەنىن ۇمىتا قويعان جوقپىن. سەبەبى ەرلەر شاحماتىنا وتكەنگە دەيىن حوۋ يفاندى ەشكىم توقتاتا الماعان-دى.
– قاتەلەسپەسەم, سول كەزدە حالىقارالىق دارەجەدەگى گروسسمەيستەر اتاندىڭىز عوي؟
– نەگىزى گروسسمەيستەر اتانۋ ءۇشىن ءىرى ءۇش حالىقارالىق جارىستا جوعارى ءناتيجە كورسەتۋىڭ كەرەك. مەن العاشقىسىن لوندوندا وتكەن حالىقارالىق تۋرنيردە (2011 جىل, 1-ورىن), ەكىنشىسىن «تاشكەنت ورەn» (2012 ج.) تۋرنيرىندە, ال ءۇشىنشىسىن جوعارىدا ايتقان ىستانبۇلدا وتكەن وليمپيادادا تيەسىلى ۇپايىمدى العاننان كەيىن تولىققاندى گروسسمەيستەر اتاندىم.
– گروسسمەيستەر اتاعى سىزگە نە بەردى؟
– شاحماتتىڭ جاڭا الەمىنە جول اشىلدى دەسەم ارتىق ايتقانىم ەمەس. ودان ءبولەك, گازەت-جۋرنالداردا ەسىمىم جاريالانىپ, ۇلكەن تۋرنيرلەرگە شاقىرتۋ تۇسە باستادى. ءسىز سەكىلدى سۇحبات الۋشىلار كوبەيدى. اقىلى تۇردە ءتالىم العىسى كەلەتىندەردىڭ قاتارى ارتتى.
– اق پەن قارا تاقتانىڭ ايىرماشىلىعى نەدە؟
– قارانىڭ اتى قارا عوي. ەكىنشى ءنومىرمەن ويناعان ەشكىمگە دە ۇنامايدى. الايدا, مىقتى بولساڭ, قارا تاقتادا وتىرىپ جەڭىسكە جەتەسىڭ. مىسالى, قازاقستان چەمپيوناتىندا ءتورت رەت اقپەن, 5 رەت قارامەن سىنعا ءتۇستىم. قازاقستان رەيتينگىسىندە 2, 3 جانە 4-ورىندا تۇرعان مىقتى دەگەن قىزدارمەن قارا تاقتادا وينادىم. 9 پارتيادان 8 ۇپاي جيناپ, ءبىرىنشى ورىن الدىم.
– قىتاي قىزى حوۋ يفاننىڭ شەبەرلىگىنە ءتانتى بولىپ وتىرسىز. ال ءسىز ءوز قارسىلاسىڭىزدى قانداي تاسىلمەن ءتانتى ەتە الاسىز؟
– ماعان شابۋىلعا بىردەن كوشىپ, قارسىلاسىمنىڭ مىسىن باسقان ۇنايدى. كوپ جاعدايدا مۇنداي ايلا-ءتاسىلىم جۇزەگە اسىپ جاتادى.
– شابۋىلدايمىن دەپ «قاقپانعا» ءتۇسىپ قالمايسىز با؟
– ۇنەمى قورعانىستا ءجۇرىپ جاقسى ناتيجە كورسەتۋ قيىن. قاراپايىم ومىردە دە سولاي ەمەس پە؟! سوندىقتان بىردەن شابۋىلعا كوشكەن دۇرىس. ول ءۇشىن بىرنەشە ءجۇرىستى الدىن الا ويلاستىرعان ءجون.
– نەشە جۇرىسكە دەيىن جوسپار قۇراسىز؟
– ءار كەزدە ارقالاي. كەيدە 10-12 ءجۇرىستى الدىن الا ويلاستىرامىن. ونىڭ ءارى قاراي تاعى جالعاسى بولادى. ەكىنشى نە ءۇشىنشى جۇرىستەن كەيىن-اق قارسىلاسىمنىڭ قۇرعان ايلاسى بەلگىلى بولىپ قالادى. سوعان قاراي جوسپارىم دا وزگەرە بەرەدى.
– ءسىزدىڭ پارتيالارىڭىز نەشە ءجۇرىسپەن اياقتالادى؟
– كوبىنە 40-50 ءجۇرىس. كەيدە 20 ءجۇرىستەن كەيىن جەڭىسكە جەتەمىن. 150 جۇرىسكە دەيىن سوزىلاتىن پارتيالار دا بولادى.
– ۇزاققا سوزىلعان پارتيالار كوبىنە كىمنىڭ پايداسىنا شەشىلەدى؟
– جەڭىلىسىم كوپ بولسا گروسسمەيستەر اتانباس ەدىم عوي. بىراق تەڭ ناتيجەنى قاناعات تۇتپاي, جەڭىلىپ قالعان كەزدەرىم دە بولعان. ونداي كەزدە جىلاپ الامىن.
– كوپ جىلايسىز با؟
– سوڭعى كەزدە جىلاپ جۇرگەن جوقپىن (ك ۇلىپ). سەبەبى تۇرمىسقا شىققالى بەرى ومىردە شاحماتتان دا ماڭىزدى دۇنيەلەر بار ەكەنىن ءتۇسىندىم. وتباسىم ءبىرىنشى ورىندا. جۇبايىم اسقار مەن قىزىم توميريس بارىنەن قىمبات. ولار ماعان ءاردايىم دەمەۋ.
– ايتىڭىزشى, اسقار ەكەۋىڭىز ۇيدە شاحمات ويناپ تۇراسىزدار ما؟
– ونىڭ شاحماتتان مۇلدەم حابارى جوق. كەيدە قاتارىنان ەكى رەت جەڭىلىپ, قاتەلىكتەرىم ءۇشىن ۋايىمداپ جاتقان كەزدە اسقار دەمەۋ بولادى. دەگەنمەن, ونىڭ شاحماتتى تۇسىنبەگەنى دە جاقسى سياقتى.
– نەگە؟
– بەلگيالىق گروسسمەيستەرلەر وتباسىن تانيمىن. ەرلى-زايىپتى ەكەۋى 16 جىل بىرگە تۇردى. جىلىنا جيىرما شاقتى جارىسقا قاتىسىپ, ءبىراز جەتىستىككە دە قول جەتكىزدى. ايتكەنمەن قازىر ەكەۋى اجىراسىپ كەتكەن. ايەلىنەن سەبەبىن سۇراعانىمدا, ءبىر-بىرىنەن شارشاعانىن ايتادى. ۇيدە دە, تۇزدە دە ءبىر تاقىرىپتا ءسوز بولادى دەيدى. ال بىزدە كەرىسىنشە. تۋرنيردەن كەيىن اسقار كوڭىلىمدى ۇنەمى باسقا جاققا اۋدارىپ وتىرادى. ول مەنىمەن بىرگە ءۇش-ءتورت تۋرنيرگە باردى. قىتايدا وتكەن كەزەكتى جارىستا جەرگىلىكتى شاحماتشىمەن سايىسقا ءتۇستىم. جەڭىپ تۇرعان جەرىمنەن تەڭ ءتۇسىپ, كوڭىلىم قۇلازىپ سىرتقا شىقسام, اسقار «نە دەگەن سۇمدىق, ءبىر پارتيانى التى ساعات ويناي ما؟ تەز كيىن, قالانى ارالايمىز», دەپ بۇلقان-تالقان بولدى. ياعني, جولداسىم ۇزاققا سوزىلاتىن وسىنداي سايىستان سوڭ, ويىمدى باسقا جاققا جىلدام اۋدارىپ, ۋايىمعا بەرىلمەۋىمە جاعداي جاسايدى.
– سىزگە شاحماتتىڭ قاي ءتۇرى ۇنايدى؟
– كلاسسيكالىق ءتۇرى. سەبەبى وندا ويلانۋعا, تاكتيكانى دۇرىس قۇرۋعا مۇمكىندىك كوبىرەك. ءار ويىنشىعا توقسان مينۋت جانە قىرىق جۇرىستەن كەيىن تاعى وتىز مينۋت بەرىلەدى. ءارى قاراي ءار جۇرىسكە تاعى وتىز سەكۋند قوسىلىپ وتىرادى. سوندا ءبىر ويىن شامامەن التى ساعاتقا سوزىلادى.
– كىمدى ۇلگى تۇتاسىز؟
– ايەلدەر اراسىندا دا, ەرلەر اراسىندا دا سۋپەرگروسسمەيستەر اتانعان يۋديت پولگاردى ەرەكشە اتاسام بولادى. ۆەنگر قىزى كەزىندە كارپوۆ, كاسپاروۆ, كارلسەن سىندى الەم چەمپيوندارىنا مات قويعان جالعىز ايەل.
– شاحماتتان بولەك ءحوببيىڭىز بار ما؟
– اپتاسىنا ەكى-ءۇش رەت باسسەينگە بارىپ تۇرامىن, كەيدە مۇز سارايىنا بارىپ كونكيمەن سىرعاناۋدى ۇناتامىن. مىندەتتى تۇردە تاڭەرتەڭ ءۇش-ءتورت شاقىرىم جۇگىرەمىن.
– شاحماتپەن جان باعۋعا بولا ما؟
– ارينە. قازىر مەن قالادان, فەدەراتسيادان, مينيسترلىكتەن ستيپەنديا الىپ وتىرمىن. الەم چەمپيوناتىنا قاتىسقانىڭ ءۇشىن 5 مىڭ اقش دوللارىن تولەيدى. كەلەسى كەزەڭگە وتسەڭ, 7 مىڭعا ۇلعايادى. ءارى قاراي رەتىمەن كوبەيە بەرەدى. ال ەگەر دە اناند, كارلسەن سەكىلدى الەم چەمپيونى بولساڭىز, وندا 1,5-2 ملن دوللارعا يە بولاسىز. بارلىعىن قوسقاندا مىقتى دەگەن گروسسمەيستەر جىلىنا 2 ملن اقش دوللارىن تابادى.
– گروسسمەيستەرلەردىڭ وسىنشا قوماقتى قارجى تاباتىنىن بىلمەيدى ەكەنمىن. ەلىمىزدە ىزدەرىڭىزدى باسىپ كەلە جاتقان تالانتتى جاستار بار ما؟
– شىنىمدى ايتسام, ءبىر-ەكى جىلدا ورنىمىزدى باساتىن قىزداردى كورىپ تۇرعان جوقپىن. جاستاردىڭ اراسىنان تەك بيبىسارا اساۋباەۆانىڭ شوقتىعى بيىك. ودان ۇلكەن شاحماتشى شىعادى دەپ ويلايمىن.
– شاحمات الەمىنە قالاي كەلدىڭىز؟
– مەنى شاحماتقا 6 جاسىمدا انام الىپ كەلگەن. ول كىسى جاس كەزىندە ءوزى دە شاحماتپەن اۋەستەنگەن. بىراق وڭتۇستىك قازاقستاننىڭ تولەبي اۋدانىنا قاراستى ۇيىمشىل اۋىلى مەن شىمكەنت اراسى الىس بولعاندىقتان, كاسىبي تۇردە شاحماتپەن شۇعىلدانا الماپتى. سول سەبەپتى وزىنە ارمان بولعان شاحماتقا ءبىزدى باۋلي باستادى. باۋىرلارىمنىڭ اراسىنان ماعان عانا انامنىڭ ارمانىن ورىنداۋ بۇيىرىپتى. العاشىندا قازاقستان قالالارىن ارالاپ جۇرگەنىمە ءماز بولۋشى ەدىم. كەيىننەن شەتەل اسىپ, ەل نامىسىن قورعاعاننان كەيىن شاحماتقا دەگەن قىزىعۋشىلىعىم ەسەلەنىپ, ءومىرىمنىڭ اجىراماس بولىگىنە اينالدى.
– سوندا العاشىندا بيىك بەلەستەردى باعىندىرىپ, گروسسمەيستەر بولامىن دەگەن ارمان بولمادى دەگىڭىز كەلە مە؟
– تۇسىنەسىز بە, العاشىندا انام مەنى ءبىلىمدى, اقىلدى, ەسەپكە جۇيرىك بولسىن دەپ شاحمات سەكتسياسىنا اپارعان. قىزى گروسسمەيستەر اتانىپ, الەمدىك ارەنادا ەلىنىڭ نامىسىن قورعايدى دەپ ويلاماعان. مەندە دە بولاشاقتا وسىنداي جەتىستىككە جەتەمىن دەگەن وي بولعان ەمەس. 14 جاسىمدا قازاقستان چەمپيوناتىندا كۇمىس جۇلدەگەر اتانىپ, قۇراما مۇشەسى بولعاننان كەيىن عانا شاحمات جانىما جاقىن ەكەنىن ءتۇسىندىم.
– شاحمات وليمپيادا باعدارلاماسىنا ەنبەگەنى بەلگىلى. سول سەبەپتى وسە كەلە اتالعان سپورت تۇرىنە دەگەن قىزىعۋشىلىق ازايعان جوق پا؟
– شاحمات – لوگيكالىق ويلاۋ قابىلەتىڭدى, كۇش-جىگەرىڭدى ارتتىراتىن سپورت ءتۇرى. كىشكەنتايىنان شاحماتپەن شۇعىلدانعان بالانىڭ ويلاۋ قابىلەتى جۇيرىك, ومىرگە دەگەن كوزقاراسى, باعىت-باعدارى مۇلدەم باسقاشا بولادى. شارشى تاقتاداعى شايقاس ولىسپەي بەرىسپەيتىن ءومىر ءۇشىن كۇرەس سەكىلدى. جەڭىسكە جەتىپ جاتساڭ, سەنىڭ ارمانىڭ بىرتىندەپ بولسا دا ورىندالىپ جاتىر دەگەن ءسوز. سوندىقتان بولاشاققا جول سىلتەيتىن شاحماتقا دەگەن سۇرانىس ەشقاشان ازايمايدى دەپ ويلايمىن.
– جىلىنا نەشە تۋرنيرگە قاتىساسىز؟
– شامامەن 8-10.
– شاحماتقا كۇنىنە قانشا ۋاقىتىڭىزدى بولەسىز؟
– ەگەر جارىس الدىندا بولسا, وندا كۇنىنە ءتورت-بەس ساعات جاتتىعامىن, ال بىلايعى كۇندە ەكى-ءۇش ساعات دايىندالسام دا جەتكىلىكتى.
– شاحمات مەكتەبىڭىز بار ەكەنىنەن حاباردارمىز. جىلىنا 8-10 تۋرنيرگە باراتىن ناحباەۆاعا ءوز مەكتەبىن قاتار الىپ ءجۇرۋ قيىنعا سوقپاي ما؟
– مەكتەبىمدە بىرنەشە بىلىكتى مامان جۇمىس ىستەيدى. ارا-اراسىندا ءوزىم دە بارىپ شەبەرلىك ساباعىن وتكىزەمىن. بارلىعىن ۇيرەتۋ مۇمكىن ەمەس. دەگەنمەن, قولىم قالت ەتكەندە مەكتەپتەگى تالانتتى, قازاقستان چەمپيوناتىندا جۇلدە الىپ جۇرگەن بالالارمەن پارتيا ويناپ, كەڭەس بەرىپ وتىرامىن.
– جوسپارىڭىزبەن ءبولىسسەڭىز؟
– 21 ساۋىردە قازاقستان چەمپيوناتىنا قاتىسسام دەپ وتىرمىن. سودان كەيىن كىشكەنە دەمالىس الامىن. سەبەبى ەكىنشى ءسابيىمنىڭ دۇنيەگە كەلۋىن كۇتىپ ءجۇرمىن. مەن ءۇشىن ءدال قازىر ەڭ باستىسى دا – ءسابيىمدى امان-ەسەن قولىما الۋ. قالعانىن سودان كەيىن جوسپارلاي بەرەمىز.
گ ۇلىسحان سايفۋللينقىزى ناحباەۆا – 1991 جىلى شىمكەنت قالاسىندا دۇنيەگە كەلگەن. قازاق قىزدارى اراسىنان شىققان تۇڭعىش گروسسمەيستەر (2012 جىل). قازاقستاننىڭ التى دۇركىن چەمپيونى. جاسوسپىرىمدەر اراسىندا ازيانىڭ ەكى دۇركىن جەڭىمپازى (16 جانە 18 جاس). ازيانىڭ كۇمىس جۇلدەگەرى (20 جاسقا دەيىن). ايەلدەر اراسىندا ازيا چەمپيوناتىنىڭ كۇمىس جۇلدەگەرى. ەرلەر اراسىندا حالىقارالىق دارەجەدەگى سپورت شەبەرى اتانعان تۇڭعىش قازاق قىزى (2013 جىل).
اڭگىمەلەسكەن الماس ماناپ,
«Egemen Qazaqstan»