ارقالىق قالاسىنىڭ ىرگەسى قالانعالى جىلۋ-ەنەرگەتيكالىق كومپانياسى مازۋتپەن جۇمىس ىستەپ كەلەتىن. كەڭەس وداعى جىلدارى ونىڭ ارزان-قىمباتى قانداي بولعانىن كىم ءبىلسىن, سوڭعى جىلدارى مازۋتقا جىل سايىن باعا ءوسىپ وتىرعاندىقتان, الاقانداي قالانىڭ قىستان شىعۋى بيۋدجەت قالتاسىن قاعىپ-اق كەتەدى.
قوستاناي وبلىسىنىڭ 2019-2021 جىلدارعا ارنالعان وبلىستىق بيۋدجەتىنە وزگەرىستەر ەنگىزىلگەن وبلىستىق ءماسليحاتتىڭ كەزەكتەن تىس التىنشى سەسسياسىندا ءوڭىر باسشىسى ارحيمەد مۇحامبەتوۆ ارقالىق قالاسى جىلۋ-ەنەرگەتيكالىق كومپانياسى ءۇشىن الىناتىن مازۋت باعاسىنىڭ تىم قىمباتتىعىن ايتقان بولاتىن.
«وسىدان ءبىراز جىل بۇرىن مازۋتقا ءبىر قىستا 1,5 ميلليارد تەڭگە كەتەتىن. ال قازىر ونىڭ كولەمى 2,5 ميلليارد تەڭگەگە دەيىن كوتەرىلدى. ويتكەنى مازۋتتىڭ باعاسى تونناسىنا 50 مىڭ تەڭگەدەن 90 مىڭ تەڭگەگە دەيىن قىمباتتادى. الداعى جىلدارى قازاندىقتى كومىرگە اۋىستىرۋدى ماقسات ەتىپ قويىپ وتىرمىز» دەگەن ارحيمەد بەگەجان ۇلى.
قازىر سول جۇمىستار ارقالىق قالاسىندا باستالىپ تا كەتتى. ارقالىق قالاسىنىڭ اكىمى ەلدار كۇزەنباەۆتىڭ ايتۋىنشا, بيىلعى قىستا ارقالىق جەك 20316 توننا مازۋت جاققان. وتكەن جىلدىڭ 27 جەلتوقسانىندا «ارقالىق قالالىق جىلۋ-ەنەرگەتيكالىق ورتالىعىن قايتا جاڭعىرتۋ ءۇشىن قۋاتى 2,5 مۆت تۋربواگرەگاتقا اۋىستىرۋ»جوباسى بويىنشا "GOLD EURASIA CORPORATION" جاۋاپكەرشىلىگى شەكتەۋلى سەرىكتەستىگىمەن 554 ميلليون 384 مىڭ.تەڭگەگە كەلىسىم-شارتقا قول قويىلدى. ونىڭ 90 ميلليون تەڭگەسى 2019 جىلى بولىنەدى, 2020 جىلى 464 ميلليون 384 مىڭ تەڭگەسى يگەرىلەتىن بولادى. كەلىسىم بويىنشا جۇمىس 2020 جىلى قاراشادا اياقتالادى, سول قىستا جىلۋ-ەنەرگەتيكالىق ورتالىق كومىرمەن جۇمىس ىستەۋگە كوشەتىن بولادى.
ارقالىق قالاسىن جىلۋمەن قامتاماسىز ەتۋدى جاڭعىرتۋ جۇمىستارىنىڭ قازىر جوبالىق-سمەتالىق قۇجاتتارىن جاساۋعا بايقاۋ جاريالاندى.