وڭدەلگەن ونىمدەر ەكسپورتىنىڭ گەوگرافياسى كەڭەيۋدە. بۇل تۋرالى اۋىل شارۋاشىلىعى ءمينيسترى س. وماروۆ «شيكىزاتتىق ەمەس ەكسپورتتى ىلگەرىلەتۋ جانە ۇلتتىق ەكسپورتتىق ستراتەگيانى ىسكە اسىرۋ بارىسى تۋرالى» بايانداماسىندا ايتتى.
ءمينيستردىڭ ايتۋىنشا, قازاقستان 2017 جىلى 42 ەلگە وڭدەلگەن ءونىم ەكسپورتتاسا, وتكەن جىلى الەمنىڭ 48 ەلىنە ەكسپورتتادى. جاڭا 6 ەل: شۆەيتساريا, جاپونيا, باحرەين, مالايزيا, بولگاريا, گانا, ليۆان.
«وڭدەلگەن اوك ونىمدەرىن ءداستۇرلى نارىقتارعا ەكسپورتتاۋ كولەمىنىڭ وسكەنى بايقالادى, اتاپ ايتقاندا وزبەكستانعا ەكسپورت - 32,4%-عا, رەسەيگە - 7%-عا, قىرعىزستانعا - 11%-عا, تاجىكستانعا - 9,7%-عا, مولدوۆاعا ەكسپورت 40,1%-عا ارتقان, سونداي-اق, جاڭا نارىقتار سانالاتىن قىتايعا ەكسپورت 57,5%-عا, نيدەرلاندىعا ەكسپورت 130%-عا وسكەن», دەدى س. وماروۆ.