وبلىستىق اۋىل شارۋاشىلىعى باسقارماسى باسشىسىنىڭ ورىنباسارى دەنيس وماشەۆتىڭ ايتۋىنشا, بيىلعى ەگىس القابىنىڭ كولەمى 2018 جىلمەن سالىستىرعاندا 25 مىڭ گەكتارعا نەمەسە 4,9%-عا ارتىق ەكەن. نارىقتاعى سۇرانىسقا جانە وندىرىستىك ءتيىمدىلىگىنە بايلانىستى مايلى داقىلدار القابى 18,2%-عا, كارتوپ 2,4%-عا جانە كوكونىس-باقشا داقىلدارىنىڭ القاپتارى 7,5%-عا ۇلعايادى.
جوبا بويىنشا وڭىردەگى ءداندى داقىلداردىڭ القابى 265,0 مىڭ گەكتاردى قۇراۋى ءتيىس. ونىڭ ىشىندە 76,6 مىڭ گەكتار القاپ كۇزدىك داقىلدى قۇرايدى. ەگىلەتىن ءداندى داقىلدىڭ باسىم بولىگىن قۇرايتىنى – بيداي مەن ارپا, بۇلار بارلىق داقىل ءتۇرىنىڭ 90 پايىزى. ودان بولەك 4,4 مىڭ گەكتارى دا بار. مايلى داقىلدار القابى دا 2018 جىلمەن سالىستىرعاندا 10 مىڭ گەكتارعا كوبەيىپ, 64,8 مىڭ گەكتار بولماق. ونىڭ باسىم بولىگى كۇنباعىس 51,0 مىڭ گەكتارعا ەگىلەدى. بۇدان بولەك 10 مىڭ گەكتار القاپقا كارتوپ جانە كوكونىس-باقشا داقىلدارىن ەگۋ جوسپارلانعان.
«قازگيدرومەت» قىزمەتىنىڭ ماماندارى بيىل وبلىستا توپىراقتىڭ جوعارعى قاباتىنىڭ ىلعالى مول دەپ وتىر. ونىڭ ءۇستىنە ەگىستىك يەلەرى دە قاراپ جاتپاي, قىس بويى 35 مىڭ گەكتار جەردە قار توقتاتۋ جۇمىستارىن ءجۇرگىزگەن. وسىنىڭ ءبارى بيىلعى ەگىن شىعىمى جاقسى بولادى دەگەن ءۇمىتتى وياتىپ وتىر.وڭىردە كوكتەمگى ەگىستى ءجۇرگىزۋگە قاجەتتى تۇقىم قورى جەتكىلىكتى. مىسالى, ءداندى داقىلدار ءۇشىن تۇقىم قورى – 105%, مايلى داقىلدار ءۇشىن – 102%, كارتوپ تۇقىمى 100% دايىن. بۇل تۇقىمدىق قوردىڭ ساپاسىن «قازاگرەكس» اق جانە «ورال-جەر» جشس زەرتحانالارى تەكسەرىپ, «ەگۋگە جارامدى» دەگەن شەشىم شىعارعان.
بيىلعى كوكتەمگى دالالىق جۇمىستارعا باتىس قازاقستان وبلىسىندا 4215 تراكتور, 4081 ءدانسەپكىش, 830 قوپسىتقىش جانە «دجون دير», «فلەكسيكويل», «كەيس», «حورش» ماركالى 47 جوعارى ءونىمدى ەگىس كەشەندەرى قاتىسادى. بۇگىندە تراكتورلاردىڭ 97%, ءدانسەپكىشتەردىڭ 96%, قوپسىتقىشتاردىڭ 97% جۇمىسقا دايىن.
كوكتەمگى دالالىق جۇمىستاردى جۇرگىزۋ ءۇشىن وبلىسقا 12 مىڭ توننا (ساۋىرگە – 2 مىڭ توننا, مامىرعا – 6 مىڭ توننا, ماۋسىمعا – 4 مىڭ توننا) ديزەل وتىنى كەرەك. بۇل كولەم ءبولىندى, جەتكىزۋشى وپەراتور بولىپ «باتىس ارنا» جشس انىقتالدى. ديزەل وتىنىنىڭ باعاسى ليترىنە 165 تەڭگەنى قۇرايدى.
– كوكتەمگى ەگىس جۇمىستارىن قارجىلاندىرۋعا «كەڭدالا» باعدارلاماسى ارقىلى 291,5 ملن تەڭگە قاراستىرىلعان, بۇل 7%-دىق مولشەرلەمەمەن بەرىلەدى. قارجى «اگرارلىق نەسيە كورپوراتسياسى» اق وبلىستىق فيليالىنىڭ اۋداندىق نەسيە سەرىكتەستىكتەرى ارقىلى اۋىلشارۋاشىلىق تاۋار ءوندىرۋشى 15 ۇيىمعا بەرىلدى. بۇدان بولەك «اگروبيزنەس» باعدارلاماسى بويىنشا 16%-دىق ءمولشەرلەمەسى بار 559 ملن تەڭگە قاراستىرىلعان, – دەيدى «اگرارلىق نەسيە كورپوراتسياسى» اق وبلىستىق فيليالىنىڭ ديرەكتورى ەرلان نىسانعاليەۆ.
«قازاگروقارجى» اق باتىس قازاقستان وبلىستىق فيليالى ديرەكتورىنىڭ ورىنباسارى امانگەلدى يمانوۆ وڭىردە تەحنيكا ليزينگىسىنە 2900 ملن تەڭگە قارالعانىن, قازىرگى ۋاقىتتا شارۋاشىلىقتار 1050 ملن تەڭگەگە 80 بىرلىك تەحنيكا ساتىپ العانىن ايتىپ وتىر. باتىس قازاقستان وبلىسى