وسىنداي جيىننىڭ ءبىرى باتىس قازاقستان وبلىسىنىڭ ازاماتتىق ورتالىعىندا ءوتتى. باسقوسۋعا قاتىسۋشىلار قازاقستان رەسپۋبليكاسىنداعى كەزەكتەن تىس پرەزيدەنت سايلاۋى تۋرالى پىكىر ءبىلدىرىپ, ازاماتتىق ورتالىقتىڭ 2019 جىلعى جۇمىس جوسپارىن تالقىعا سالدى.
- سايلاۋ قارساڭىندا ەل بولاشاعىنا الاڭدايتىن ءاربىر ادام ەرەكشە جاۋاپكەرشىلىكتى جان-تانىمەن تۇسىنەدى. وسىنداي سىندارلى ءساتتى ۇكىمەتتىك ەمەس ۇيىمدار جەتەكشىلەرىنىڭ بەلسەندىلىگى وتە قاجەت. ويتكەنى مەملەكەت باسشىسىن تاڭداۋ, رەسپۋبليكا پرەزيدەنتىن سايلاۋ – ءبىزدىڭ بارشامىزدىڭ تاعدىرىمىزعا تىكەلەي قاتىسى ماڭىزدى وقيعا. تاۋەلسىزدىك العان كۇننەن باستاپ قازاقستان رەسپۋبليكاسى ۇنەمى العا جىلجىپ, بۇگىنگى دارەجەسىنە جەتتى. وزىندىك دامۋ جولىن تاۋىپ, الەمدىك قاۋىمداستىقتا لايىقتى ورىن الدى. وتانىمىز ودان ءارى كوركەيۋى ءۇشىن, دامۋ جولىنان جاڭىلماۋى ءۇشىن 9 ماۋسىم كۇنى ءار ازامات ءوزىنىڭ تاڭداۋ قۇقىعىن, سايلاۋ قۇقىعىن جۇزەگە اسىرۋى ءتيىس, - دەدى «بقو ازاماتتىق اليانس قاۋىمداستىعى» قوعامدىق بىرلەستىگىنىڭ جەتەكشىسى مەرۋەرت سانكاەۆا.
«قىزىل اي» قوعامى بقو فيليالىنىڭ جەتەكشىسى سۆەتلانا تەنيشەۆا, «ديابەت» قوعامدىق قوزعالىسىنىڭ توراعاسى تامارا يستومينا جانە باسقالارى ءسوز الىپ, قازاقستاننىڭ بولاشاق پرەزيدەنتى ەل الدىندا ابىرويى بيىك, ءوزىنىڭ باعدارلاماسىمەن قازاقستاندىقتاردىڭ كوڭىلىنەن شىققان ادام بولاتىنىنا سەنىم ءبىلدىردى.
- ءبىز, باتىس قازاقستان وبلىسىنىڭ ازاماتتىق قوعام وكىلدەرى, ەلىمىزدە وتكىزىلەتىن كەزەكتەن تىس پرەزيدەنت سايلاۋىن قولدايمىز. حالقىمىز سوڭىنان جۇرتتى ەرتە الاتىن, الەمدىك قاۋىمداستىق الدىندا قازاقستاندى لايىقتى تانىستىرا الاتىن تۇلعانى وركەنيەتتى جولمەن تاڭداۋى ءتيىس. زاڭدى سايلاۋ – ەل بولاشاعىنىڭ تۇراقتىلىعىنىڭ كەپىلى. سوندىقتان ۇكىمەتتىك ەمەس ۇيىمدار وكىلدەرى بۇل ناۋقاندى زاڭ اياسىندا وتكىزۋگە بارىنشا اتسالىسادى, - دەيدى «عىلىمي زەرتتەۋلەردى قولداۋ» قورىنىڭ ديرەكتورى ايبولات قۇرىمباەۆ.
باتىس قازاقستان