«ۆيرتۋالدى سوت» دەپ اتالاتىن قاناتقاقتى جوبا ارقىلى ىستەردى ونلاين تارتىپتە قاراۋعا بولادى. وبلىستىق سوتتىڭ ءباسپاسوز حاتشىسى بورانباي عاليەۆتىڭ ايتۋىنشا, قاتىسۋشىلارعا سوت وتىرىسى بولاتىن ۋاقىت كورسەتىلگەن SMS-حابارلاما جىبەرىلەدى. حابارلاما العان ادام ءموبيلدى بەينەكونفەرەنتسياعا قوسىلادى. ول ءۇشىن ۇيالى تەلەفونىنا «TrueConf» باعدارلاماسىن ورناتۋى كەرەك.
جوبا ىسكە قوسىلعان ۋاقىتتان بەرى مۇنايلى ايماقتا 982 ءىس ۆيرتۋالدى تارتىپتە قارالعان. وبلىستىق سوتتىڭ ازاماتتىق ىستەر جونىندەگى سوت القاسىنىڭ توراعاسى مانات كومىرشينوۆ ەكى مەكەمە اراسىنداعى بەرەشەكتى ءوندىرۋ تۋرالى ازاماتتىق ءىستى جاۋاپكەردىڭ جەكە شاعىمى نەگىزىندە ونلاين بايلانىس ارقىلى وتكەن سوت وتىرىسىندا قاراعانىن ايتادى. زاڭ تالاپتارىنا سايكەس سۋديا قاۋلى شىعاردى. «جاڭا تەحنولوگيانىڭ ارقاسىندا سوت تورەلىگىنىڭ اشىقتىعى قامتاماسىز ەتىلەدى. جوبا تسيفرلىق ساۋاتتىلىقتى ارتتىرۋعا, ۋاقىت پەن قارجىنى ۇنەمدەۋگە, سوت وندىرىسىندە يننوۆاتسيالىق تەحنولوگيالاردى قولدانۋدى دامىتۋعا جانە ەڭ باستىسى ازاماتتاردىڭ سوتقا دەگەن سەنىمىن نىعايتۋعا ىقپال ەتەدى», دەيدى مانات كومىرشينوۆ.
سوت جۇيەسىندە يننوۆاتسيالىق تەحنولوگيالاردى جانە سوت جۇيەسىن تسيفرلاندىرۋدى قولدانۋدى ناسيحاتتاۋ اياسىندا ايماقتا جىل باسىنان بەرى 43 ازاماتتىق, 9 اكىمشىلىك, 59 قىلمىستىق ءىس ونلاين تارتىپتە قارالدى. IT- تەحنولوگيانىڭ جاڭا مۇمكىندىكتەرىن پايدالانۋ ارقىلى سۋديالاردى قاعازباستىلىقتان ارىلتۋ دا كوزدەلگەن. قازىر وڭىردەگى 47 سوت كەڭسەسى جاڭا جۇيە نەگىزىندە جۇمىس ىستەپ تۇر.
اتىراۋ