ءماجىلىس توراعاسى نۇرلان نىعماتۋلين بىرنەشە ەلدەر پارلامەنتتەرىنىڭ سپيكەرلەرىمەن وتكىزگەن كەزدەسۋلەردە كەيىنگى كەزدە قازاقستاندا بولعان وزگەرىستەر تۋرالى اڭگىمەلەگەندە ولاردىڭ ءبارى دە بىزدەگى كونستيتۋتسيالىق تالاپتىڭ ساقتالۋى, بيلىكتىڭ قۇقىقتى مەملەكەتكە ءتان, ءوركەنيەتتى سيپاتتا اۋىسۋى جايىندا رازىلىقپەن ايتقانىنا, ەلباسىنىڭ ىشكى جانە سىرتقى ساياساتىنىڭ ساباقتاستىعى ساقتالاتىنىنا كوڭىلدەرى تولاتىنىنا قۋاندىق. مۇنىڭ ءوزى ەلدەگى ساياسي مادەنيەتتىڭ بيىك دەڭگەيىن تانىتاتىنىنا, ءدۇيىم دۇنيەگە مەملەكەتىمىزدىڭ جاقسى اتىن شىعاراتىنىنا تاعى دا كوز جەتكىزە تۇستىك. ەلگە ورالىسىمەن ەلدىكتىڭ كەزەكتى كەلىستى كورىنىسىنە كۋا بولدىق. تاۋبە دەدىك.
پرەزيدەنت قاسىم-جومارت توقاەۆتىڭ كەشەگى شەشىمى – ەل كۇتكەن شەشىم. دەمىن ىشىنە الىپ كۇتىپ وتىرعان حالىقتىڭ كوڭىلىن كۇپتى ەتە بەرمەۋ, جان-جاقتان جانار قاداعان سىرت كوزدى ساباسىنا ءتۇسىرۋ كەرەك ەدى. ونىڭ جالعىز جولى, سەنىمدى جولى – پرەزيدەنت سايلاۋىن كەزەكتەن تىس وتكىزۋ ەكەنىن جۇرتتىڭ ءبارى دە ءبىلىپ وتىرعان ەدى. بار ماسەلە سايلاۋدىڭ قاي كەزگە بەلگىلەنەتىنىنە عانا بايلانىستى بولاتىن. ول جاعداي دا ايقىندالدى. قازاقستان رەسپۋبليكاسىنىڭ پرەزيدەنتىن كەزەكتەن تىس سايلاۋ 2019 جىلعى 9 ماۋسىمدا وتەتىنى رەسمي جاريا ەتىلدى. ونى مەملەكەت باسشىسى ءوز بەتىنشە, جەكە-دارا شەشكەن جوق. ەلباسىمەن اقىلداستى. پارلامەنت پالاتالارىنىڭ باسشىلىعىمەن, كونستيتۋتسيالىق كەڭەسپەن, ساياسي پارتيالار جەتەكشىلەرىمەن كەڭەستى. ءسويتىپ بارىپ ەل تاعدىرىنا قاتىستى شەشىم ءجونىندە ءبىر توقتامعا كەلدى. قازاقستان ازاماتتارىنا ارناعان ۇندەۋىندە ەل پرەزيدەنتىن سايلاۋدى نەلىكتەن كەزەكتەن تىس وتكىزۋ كەرەكتىگىن نەگىزدەدى. ايتقانىنىڭ ءبارى دە كوكەيگە قونىمدى. قوعامدىق-ساياسي كەلىسىمدى قامتاماسىز ەتۋ, العا قاراي سەنىمدى جىلجۋ, الەۋمەتتىك-ەكونوميكالىق دامۋ ءمىندەتتەرىن شەشۋ ءۇشىن بىزگە انىقتىق, ايقىندىق, اشىقتىق كەرەك. ونىڭ ۇستىنە الەمدەگى احۋال دا بۇلتاڭ-بۇلتاڭ ەتىپ, حالىقارالىق ساياساتتىڭ اۋا رايى ب ۇلىڭعىر بولىپ تۇرعانى تاعى بار. ال بۇل ەل قاۋىپسىزدىگىنە تىكەلەي قاتىستى جايت. وسىندايدا بيلىك ءترانزيتىنىڭ ۋاقىتىن سوزىپ الماۋ – وتە ماڭىزدى. ماسەلەنىڭ باسىن تەز اشىپ, مەملەكەتتى دامىتۋدىڭ جاڭا كەزەڭىن بىردەن باستاپ كەتۋ كەرەك. حالىقتىڭ تاڭداۋىمەن, ەلدىڭ تىكەلەي ەركىمەن سايلانعان باسشىنىڭ ءوزى دە, ءسوزى دە سالماقتىراق بولاتىنىن ايتىپ جاتۋ ارتىق. جىرعالىپ جۇرەتىن جاعداي جوق. ۇلى دالا ەلىنىڭ ۇلى مەجەگە ۇمتىلعان ۇلان-عايىر كوشى كىدىرمەۋى كەرەك.
ساۋىتبەك ابدراحمانوۆ,
ءماجىلىس دەپۋتاتى