وسى ۋاقىتقا دەيىن كوپتەگەن ساراپشىلار بىزدە سايلاۋ كۇزدە وتكىزىلەدى دەپ جۇرگەن ەدى. ال پرەزيدەنت ونىڭ مەرزىمىن الىسقا ۇزاتپاي, جاقىن ارادا وتكىزۋدى دۇرىس دەپ ساناپ وتىر. مەن بۇل شەشىم ساياسي جاعىنان ۇتىمدى قادام دەپ سانايمىن. ويتكەنى قازىرگى پرەزيدەنتىمىز الەمدە ەلباسى ن.نازارباەۆتىڭ سايلانعان مەرزىمىن اياعىنا دەيىن جەتكىزۋشى, ۋاقىتشا تۇلعا عانا بولىپ قابىلدانىپ, وعان تەرەڭ سەنىم بولمايدى. ال ءبىز دۇنيە ءجۇزىنىڭ كوپتەگەن ەلدەرىمەن ەكىجاقتى شارتتارعا وتىرامىز. ەلىمىزگە ينۆەستيتسيا تارتۋ ماسەلەسىندە دە پرەزيدەنت كەلىسسوزدەر جۇرگىزەدى. سونداي-اق ىشكى ماسەلەلەردە دە تىكەلەي پرەزيدەنتتىڭ شەشىمىن كۇتەتىن ماڭىزدى ماسەلەلەر كوپ. وسىنىڭ ءبارىن شەشۋدە ۋاقىتشا تۇلعاعا دەگەن سەنىم بەرىك بولمايدى. سوندىقتان ول حالىق مانداتىن تولىق الۋى كەرەك. ول ءۇشىن ارينە, جالپىحالىقتىق سايلاۋدا كوپشىلىك داۋىسپەن جەڭىپ شىققانى دۇرىس. سايلاۋدا جەڭگەن پرەزيدەنتتىڭ وكىلدىگى تولىققاندى بولادى جانە وعان دەگەن سەنىم ەسەلەپ ارتادى.
پرەزيدەنت ءوزىنىڭ سوزىندە «سايلاۋدىڭ تازا, اشىق ءارى ءادىل وتۋىنە كەپىلدىك بەرەمىن! بۇل – مەنىڭ بەرىك ۇستانىمىم!» دەپ قاداپ ايتتى. بۇل قازاقستاندىق بارشا سايلاۋشىلاردىڭ وزدەرى داۋىس بەرگەن ۇمىتكەردىڭ سايلانۋىنا دەگەن سەنىمىن وياتادى. ال ۇمىتكەرلەر بىزدە بارلىق تىركەلگەن ساياسي پارتيالاردان ۇسىنىلاتىنى بەلگىلى. سوندىقتان حالقىمىز سايلاۋعا بەلسەنە قاتىسىپ, وزدەرىنىڭ قالاعان ادامىنا داۋىس بەرۋگە اسىعۋلارى كەرەك.
مۇرات باقتيار ۇلى,
سەنات دەپۋتاتى