جوعارى وقۋ ورنىنىڭ ماتەريالدىق-تەحنيكالىق بازاسى الەمدىك ءبىلىم بەرۋ ستاندارتتارىنا ساي. ونى رەسپۋبليكاداعى وزگە جوو-لاردان ەرەكشەلەپ تۇرعان باستى جايت – ءوز تەحنوپاركىنىڭ جاساقتالعانى. وعان «زەرەك» دەگەن اتاۋ قويىلعان.
تاياۋدا بايىشەۆتىكتەر ەكىنىڭ ءبىرىنىڭ قولى جەتە بەرمەيتىن تاعى ءبىر جەتىستىككە قول جەتكىزدى. ءبىلىم جانە عىلىم مينيسترلىگى عىلىم كوميتەتى بەلگىلەگەن «ءونىمدى يننوۆاتسيانى قولدانۋ» جوباسىنىڭ جەڭىمپازى اتاندى. وسى ارقىلى ۇيىمشىل ۇجىم قۇنى 98 ميلليون تەڭگە تۇراتىن گرانتقا يە بولدى. بۇل بيىل بايىشەۆتىكتەر ۇتىپ العان ەكىنشى ءىرى كولەمدەگى گرانت بولىپ وتىر. ويتكەنى بۇعان دەيىن جوعارىدا اتالعان «زەرەك» تەحنوپاركى 47 ميلليون تەڭگەلىك مەملەكەتتىك گرانتتى ۇتىپ العان بولاتىن. قوماقتى قاراجاتتىڭ ماقساتتى جۇمسالۋىن باقىلاۋ تەحنيكا عىلىمدارىنىڭ دوكتورى بايزاق يساقۇلوۆ باسقاراتىن «زەرەك» تەحنوپاركىنىڭ قۇزىرىنا جۇكتەلگەن. گرانت ارقىلى ءبولىنگەن سالماقتى سومانى ۋنيۆەرسيتەت عالىمدارى قۇجاتتاردى اعىلشىن تىلىندە رەسىمدەۋدىڭ سان قىرىن ۇيرەنىپ كۇندەلىكتى داعدىعا اينالدىرۋعا جانە حالىقارالىق عىلىمي جوبالارعا جول اشۋدىڭ امالدارىن ىزدەستىرۋگە جۇمسايتىن بولادى. ءبىزدىڭ وڭىرلىك جوعارى وقۋ ورنىنىڭ تەڭ جەڭىمپاز اتانعان قازاق-بريتان تەحنيكالىق ۋنيۆەرسيتەتى سەكىلدى ءمۇيىزى قاراعايداي جوعارى وقۋ ورنىمەن ءبىر قاتاردا تۇرۋى ءبىز ءۇشىن ۇلكەن جەتىستىك, بيىك مەرەي, – دەيدى س.بايىشەۆ اتىنداعى اقتوبە ۋنيۆەرسيتەتى «رۋحاني جاڭعىرۋ» ورتالىعىنىڭ ديرەكتورى مۇحتار ميروۆ.
اقتوبە