وبلىس اكىمى ق. كوشەرباەۆ قر ۇقك شەكارا قىزمەتىنىڭ اسكەري بولىمىنە جىبەرىلەتىن 18 جاس ساربازدى جوڭەلتۋ راسىمىندە ەل اعالارى اتىنان اماناتىن ايتتى.
«سىزدەر بۇگىن اسكەر قاتارىنا اتتانعالى وتىرسىزدار. اتا-بابالارىمىزدىڭ بىلەكتىڭ كۇشىمەن, نايزانىڭ ۇشىمەن قورعاپ, بىزگە امانات ەتكەن جەرى مەن ەل تىنىشتىعىن كۇزەتۋ – قاسيەتتى بورىش. تۇڭعىش پرەزيدەنتىمىز ن.ءا.نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا: «ءبىزدىڭ بابالارىمىز عاسىرلار بويى ۇشقان قۇستىڭ قاناتى تالىپ, جۇگىرگەن اڭنىڭ تۇياعى توزاتىن ۇلان-عايىر اۋماقتى عانا قورعاعان جوق. ولار ۇلتتىڭ بولاشاعىن, كەلەر ۇرپاعى- ءبىزدى قورعادى» دەگەن بولاتىن. تاريحتا قايسار مىنەزىمىزبەن تانىلعان ەلمىز. وسى رەتتە, جاۋعا تايسالماي تويتارىس بەرگەن ءجالاڭتوس ءباھادۇر, جانقوجا, ەسەت, بۇقارباي, سارتاي سىندى دارابوز باتىرلاردىڭ كوزسىز ەرلىكتەرى ءالى تالاي ۇرپاققا ۇلگى بولارى ءسوزسىز», - دەدى ول.
كەزدەسۋدە حالقىمىزدىڭ ءبىرتۋار باتىر پەرزەنتى باۋىرجان مومىش ۇلى تۋرالى جازۋشى ءازىلحان نۇرشايىقوۆتىڭ جازعان «اقيقات پەن اڭىز» كىتابى جاس ۇلاندارعا تابىس ەتىلدى.
جيىندا وبلىستىق قورعانىس ىستەرى دەپارتامەنتىنىڭ باستىعى ەركىنبەك بايبولوۆ پەن «قر قارۋلى كۇشتەرىنىڭ ارداگەرلەرى» رەسپۋبليكالىق قوعامدىق بىرلەستىگىنىڭ قىزىلوردا وبلىستىق فيليالى توراعاسى مەڭدىلدا رشاۋوۆ ەل اتىنان جاۋىنگەرلەرگە بورىشتارىن امان-ەسەن اتقارىپ, ابىرويمەن ەلگە ورالۋعا تىلەكتەرىن ءبىلدىردى.