بۇگىندە ايماق بويىنشا جوباعا قاتىساتىن ء ۇش كومپانيانىڭ ءوتىنىشى بانكتەرگە قاراستىرۋ ءۇشىن جولدانعان. ال وڭىردەگى 15 كومپانيا باعدارلاماعا قاتىسۋعا قىزىعۋشىلىق ءبىلدىرىپ وتىر ەكەن.
جاقىندا الماتى وبلىسىنىڭ مەگاپوليست ماڭىندا ورنالاسقان كاسىپورىن باسشىلارى مەن قارجى ديرەكتورلارىنىڭ قاتىسۋىمەن باعدارلامالا شارتتارىن تۇسىندىرۋگە ارنالعان جۇمىس كەزدەسۋى ءوتتى. وندا وبلىستىق كاسىپكەرلەر پالاتاسى ديرەكتورىنىڭ ەكونوميكالىق ماسەلەلەر بويىنشا ورىنباسارى اسەت شاياحمەتوۆ باعدارلاما تالاپتارى, قارجىلاندىرۋ مەحانيزمدەرىنە كەڭىنەن توقتالىپ, كومپانيا وكىلدەرىنىڭ سۇراقتارىنا جاۋاپ بەردى.
- قارجىلاندىرۋ رەسپۋبليكالىق بيۋدجەتتەن جۇزەگە اسىرىلادى. قارجى الۋ ءۇشىن بانككە ءوتىنىم بەرىپ, باعالاۋ مەن بەكىتۋ ۇردىستەرىنەن ءوتۋ كەرەك. قازىرگى تاڭدا 9 بانك كاسىپكەرلەردى 8 پايىز بويىنشا نەسيەلەۋگە ءازىر. قارىز 9 جىلعا بەرىلەدى. ءوتىنىمدى قاراستىرۋ كەزەڭىندە سۋبسيديالاۋ سوماسى دا قاراستىرىلادى, - دەدى كەزدەسۋدە اسەت شاياحمەتوۆ.
«قاراپايىم زاتتار ەكونوميكاسى» جوباسى ەلباسىنىڭ تاپسىرماسى بويىنشا باستاۋ العان بولاتىن. ەل ۇكىمەتى جوبا بويىنشا حالىق تۇتىناتىن تاۋارلاردى, سونداي-اق شيكىزات جانە باستاپقى وڭدەۋ ونىمدەرىن ءوندىرۋدى قولداۋ ءۇشىن 600 ملرد تەڭگە قارجى ءبولدى. وڭىرلەر بويىنشا بۇل قاراجات جەڭىل, تاماق, جيھاز وندىرىسىنە, قۇرىلىس ماتەريالدارىن وڭدەۋ مەن اگروونەركاسىپ كەشەنىن دامىتۋ مەن قولداۋعا باعىتتالماقشى.
قالماحانبەت مۇقامەتقالي,
«Egemen Qazaqstan»
الماتى وبلىسى