قوعامدىق كەڭىستىكتى مودەرنيزاتسيالاۋ جانە جايلى قالالىق ورتانى قالىپتاستىرۋ ءۇشىن رەكونسترۋكتسيالانعان كوشەلەردە ەكولوگيالىق تروتۋار پليتكالارى, ەنەرگيا جيناقتاۋشى جارىق كوزدەرى, كوشە جيھازى, سپورت جانە بالالار الاڭدارى, زاماناۋي كىشى ساۋلەت پىشىندەرى پايدا بولادى.
بۇلاردان وزگە, عيماراتتاردىڭ بارلىق كىرە بەرىستەرى بىرىڭعاي ستيلگە كوشىرىلەدى. جاسىل جەلەككە ەرەكشە ءمان بەرىلەدى, بۇرىنعى بار اعاشتاردى ساقتاي وتىرىپ, جاڭالارى وتىرعىزىلادى, سۋارۋدىڭ اۆتوماتتى جۇيەسى تارتىلىپ, ەسكى ارىق ناۋالارى اۋىستىرىلادى.
الماتى اكىمى باۋىرجان بايبەك قالانى اباتتاندىرۋ بويىنشا وتكەن جۇمىس كەڭەسى بارىسىندا جايلى قالالىق ورتا باسقارماسى مەن قالا قۇرىلىسىن باقىلاۋ باسقارماسىنا بارلىق قۇرىلىس جۇمىستارىنىڭ ورىندالۋىن بارىنشا قاتاڭ باقىلاۋعا الۋدى, سونىمەن قاتار بۇرىن جاڭارعان كوشەلەردەگى ورىن العان اقاۋلاردى مەردىگەرلىك ۇيىمدار ەسەبىنەن جويۋدى تاپسىردى.
جىبەك جولى (جەلتوقسان - سەيفۋللين), بايسەيىتوۆا (قابانباي باتىر - تولە بي) كوشەلەرى مەن دوستىق (قازىبەك بي - قۇرمانعازى) داڭعىلى بويىنداعى ۋچاسكەلەردە جاياۋ جۇرگىنشىنىڭ كەدەرگىسىز وتكەلدەرىن قامتاماسىز ەتۋ ءۇشىن بيىلعى جىلى جوندەۋ جۇمىستارى كەزەڭ-كەزەڭىمەن جۇرگىزىلەدى. الدىمەن كوشەنىڭ ءبىر جاعى, سودان كەيىن ەكىنشىسى جوندەلەدى. ارنايى قورشاۋلار جانە جۇرگىنشى تراپتارى, مەردىگەرلىك ۇيىمنىڭ بارلىق بايلانىس نومىرلەرى جازىلعان نىساننىڭ پاسپورتى قويىلادى.
ايتا كەتەرلىگى, جاقىندا ەل پرەزيدەنتى قاسىم-جومارت توقاەۆ وڭىرلەر اكىمدەرىمەن وتكىزگەن كەڭەس بارىسىندا حالىقتىڭ جاقسى ءومىر سۇرۋىنە تىكەلەي ىقپال ەتەتىن ينفراقۇرىلىمدىق سيپاتى بار جۇيەلى ماسەلەلەردى شەشۋگە ايرىقشا نازار اۋدارۋ قاجەتتىگىن اتاپ وتكەن ەدى.
2015 جىلى قالا تۇرعىندارىنىڭ جالپى تالقىلاۋىنان وتكەن «الماتى-2020» دامۋ باعدارلاماسى اياسىندا مەگاپوليستە قالانىڭ تاريحي ورتالىعىنىڭ 60%-ى جاڭاردى, 600-گە جۋىق كوشە, 1400-تان استام ەسكى اۋلالار جوندەلدى. كوشە جارىقتارىنىڭ ۇشتەن ءبىرى ديودتى جانە ەنەرگيا جيناقتاۋشى شامدارعا اۋىستىرىلدى, 300 كم ارىق, 2000 كم ينجەنەرلىك جەلىلەر تارتىلدى. قالانىڭ بارلىق جەر استى وتپەلى جولدارى جاڭاردى.
بيىلعى جىلى تاعى دا 680 اۋلانى جاڭارتۋ جوسپارلانعان, ياعني قالانىڭ بارلىق كوپقاباتتى ۇيلەرىنىڭ 50%-ى قامتىلادى. ءساۋىر ايىنىڭ ورتاسىنان باستاپ 120-دان استام كوشەگە ورتاشا جوندەۋ جۇمىستارى جۇرگىزىلەدى. سونىمەن قاتار, قالانىڭ 12 ىقشام اۋدانىندا 440-تان استام جاڭا جولدار سالىنادى دەپ كۇتىلۋدە. الماتى اكىمدىگىنىڭ باستاۋىمەن ءوتىپ جاتقان «Jasyl meken» اكتسياسى بارىسىندا تەك بيىلعى كوكتەمنىڭ وزىندە عانا قالانىڭ بارلىق اۋداندارىندا جەرگىلىكتى پيتومنيكتەردە وسىرىلگەن 12 مىڭنان استام اعاشتى وتىرعىزۋ جوسپارلانعان.
الماتى