ماسەلەن, شەت اۋدانىنداعى قىزىلقوي اۋىلىندا توعىز ءۇيدىڭ اۋلاسىنا سۋ كىرگەن. بۇل جەردەن 16 ادام كوشىرىلىپ, تۋىستارىنىڭ ۇيىنە ورنالاستىرىلدى. قازىر سول ماڭنان اعىپ وتەتىن تالدى وزەنىنىڭ اڭعارى بەكىتىلۋدە.
جاڭاارقا اۋدانىندا ءتورت بىردەي جولدىڭ ۇستىنەن قىزىل سۋ ءجۇرىپ وتكەن. «قىزىلوردا-پاۆلودار» تراسساسىنىڭ 771-ءشى شاقىرىمىندا جولدىڭ ۇستىمەن اعىپ جاتقان سۋدىڭ ەنى 40-60 مەتر, تەرەڭدىگى 10-15 سم بولادى. بۇل جەردەگى سۋ وتكىزگىش ەكى قۇبىر تولىق قۋاتىمەن جۇمىس ىستەپ تۇر.
سونىمەن قاتار, نۇرا, قارقارالى جانە اباي اۋدانىندارىندا دا قارعىن سۋ جەرگىلىكتى جانە رەسپۋبليكالىق ماڭىزداعى جولداردىڭ ويپاڭداۋ تۇستارىن باسىپ اعا باستادى. بۇل جەرلەردە «قازاقاۆتوجول» جشس-ءنىڭ قىزمەتكەرلەرى كۇنى-ءتۇنى كەزەكشىلىك ەتىپ ءجۇر.
بۇگىنگى كۇندە وبلىس بويىنشا ەلدى مەكەندەردىڭ ويپاڭ جەرلەردە ورنالاسقان كوشەلەرىن سۋ الماۋى ءۇشىن قورعانىس ءۇيىندىسىن نىعايتۋ جۇمىستار جۇرگىزىلىپ جاتىر. بۇل شارۋالارعا تج-نىڭ جەكە قۇرامى مەن ارنايى تەحنيكالار جۇمىلدىرىلعان.
«قازىرگى ۋاقىتتا شەرۋباي-نۇرا, سامارقان جانە ىنتىماق سۋ قويمالارىندا سۋ اعىزۋ مولشەرى ارتتىرىلدى. جاعداي سۋ تاسقىنىنا قارسى شتابتىڭ ۇدايى باقىلاۋىندا», دەگەن اقپارات تاراتتى وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى.
قاراعاندى وبلىسى