بەيرەسمي مالىمەت بويىنشا, بۇگىندە گەرمانيادا تۇركى تىلدەرىندە سويلەتىن 4 ميلليوننان اسا ادام تۇرىپ جاتىر. كەزدەسۋگە قاتىسۋشىلار بىرلەسكەن جوبالار مەن ءوزارا ىنتىماقتاستىقتى كەڭەيتۋ مۇمكىندىكتەرىن دە تالقىلادى. مىسالى, گەرمانيادا تۇراتىن قازاقتاردى ءتىل ماسەلەسى الاڭداتىپ وتىر. «اعا جانە ورتا بۋىن قازاق تىلىندە سويلەسە, وسكەلەڭ ۇرپاق ءتىل بىلمەيدى», – دەيدى ولار.
الايدا جاستاردىڭ تۋعان ءتىلىن مەڭگەرۋگە نيەتتەرى زور. سول سەبەپتى, قانداستارامىز ەۋروپادا قازاق ءتىل ورتالىقتارىن اشىپ, بىرلەسكەن شارالاردى كوبىرەك وتكىزۋدى كوزدەيدى. بەرليندەگى قازاق دياسپوراسىنىڭ وكىلى مالاباكان بەزەرىتحان, جۋرناليستەرمەن كەزدەسكەن كەزدە استانادا بولعانىن, قازىر استانامىزدىڭ اتى نۇر-سۇلتان بولىپ وزگەرتىلگەنىنەن حابارى بار ەكەنىن ايتىپتى.
«وعان دا قۋانىشتىمىز. ەلباسى سول كەزدە ايتقان سىرتتا شەتەلدە جۇرگەن قازاقتاردىڭ ماسەلەسى قازاقستاننىڭ نازارىندا تۇراتىنىن ايتتى. وتانداستار قورىنان كەلگەن اعالارىمىز اباي ينستيتۋتتارىن اشامىز دەپ, بىزگە ءسوز بەردى», –دەيدى مالاباكان بەزەرىتحان.
تۇركىتىلدەس مەملەكەتتەردىڭ ىنتىماقتاستىق كەڭەسى باس حاتشىسىنىڭ ورىنباسارى ومەر كوسامان دياسپورا وكىلدەرىمەن كەزدەسكەندە بىرنەشە ماڭىزدى شەشىم قابىلدانعانىن ايتتى.
«بىرلەسكەن جوبالار مەن باعدارلامالاردى قولعا الاتىن بولىپ, جوسپار قۇردىق. ءار ەلدەگى دياسپورا ءوز شارالارىن وتكىزىپ ءجۇر. ءبىز ءبارىن بىرىكتىرگىمىز كەلەدى. ەۋروپادا, اقش پەن بۇكىل الەمدە تۇركىتىلدەس دياسپورالار اراسىندا ديالوگ ورناسا دەيمىز. كوزدەيتىن ماقساتىمىز دا وسى», -دەپ ءسوزىن تۇيىندەدى ومەر كوسامان.
الماتى