استانا اكىمى قالا اتاۋىن وزگەرتۋگە قاتىستى پىكىرىن بىلدىرە وتىرىپ, بارلىق باننەرلەر, ماڭدايشالار, حابارلاندىرۋلار مەن باسقا دا اتريبۋتيكانى ءبىر كۇندە اۋىستىرۋ مىندەتىنىڭ تۇرماعاندىعىن مالىمدەدى, دەپ حابارلايدى ەلوردا اكىمدىگىنىڭ رەسمي سايتى.
«ەڭ الدىمەن, ءبىز مەملەكەتتىك بيۋدجەت ءۇشىن بارىنشا ۇنەمدى جولدى تاڭدايتىن بولامىز. باننەرلەر, ماڭدايشالار, حابارلاندىرۋ مەن باسقا اتريبۋتيكانى ءبىر كۇندە اۋىستىرۋ مىندەتىن ءبىزدىڭ الدىمىزعا ەشكىم قويىپ جاتقان جوق. قالانىڭ «استانا-ارەنا», «استانا-وپەرا» سياقتى نىساندارى, سپورتتىق كلۋبتارى ءوز اتاۋلارىن وزگەرتپەيدى. «استانا» ءسوزى بارىمىزگە ىڭعايلى. ول مەملەكەتتىڭ ەلورداسى دەگەن ماعىنانى بىلدىرەدى. قازاق تىلىندە ەلوردا تۇرعىندارىن «استانالىقتار» دەپ اتايدى. ءبىز ولاردى ورىس تىلىندە دە بۇرىنعىداي اتاۋدى ۇسىنامىز», – دەدى سۇلتانوۆ.
سونىمەن قاتار, ول الەمدەگى كورنەكتى مەملەكەتتىك قايراتكەرلەردىڭ ەسىمىمەن اتالاتىن بىرنەشە قالانى مىسالعا كەلتىردى. «اقش سياقتى الىپ مەملەكەتتىڭ استاناسىنىڭ ءوزى دە ەلدىڭ تۇڭعىش پرەزيدەنتىنىڭ ەسىمىمەن اتالعان. سونداي-اق, حوشيمين, سانكت-پەتەربۋرگ, دجوردجتاۋن سياقتى دۇنيەجۇزىندە ونداعان قالا بار», – دەپ اتاپ ءوتتى ول. ەلوردا اكىمىنىڭ ايتۋىنشا, ەل استاناسىنىڭ ەسكى اتاۋى جازىلعان جەكە جانە زاڭدى تۇلعالاردىڭ رەسمي قۇجاتتارى ءوز كۇشىن جويمايدى. حقكو-نا بارىپ, ولاردى اۋىستىرۋ قاجەت ەمەس. «قۇجاتتار تەك ولاردىڭ مەرزىمىنىڭ ءوتۋى نەمەسە جوعالۋى سەبەپتەرىمەن عانا اۋىستىرىلاتىن بولادى», – دەپ مالىمدەدى سۇلتانوۆ.
بۇعان دەيىن حابارلاعانىمىزداي, كەشە قازاقستان پرەزيدەنتى قاسىم-جومارت توقاەۆ استانا قالاسىن نۇر-سۇلتان قالاسى دەپ قايتا اتاۋ تۋرالى جارلىققا قول قويعان-دى.