Financial Times باسىلىمى بىرقاتار ساراپشىنىڭ پىكىرىن بەرگەن.
«مەملەكەت باسشىسى سارسەنبى كۇنى, وتىز جىلدان كەيىن, وتستاۆكاعا كەتۋ تۋرالى مالىمدەمە جاسادى. كوممۋنيستىك پارتيا قاتارىندا بولعان بۇرىنعى كوشباسشى قيراعان كەڭەس وداعىنان شىعىپ, جاڭا ەل قۇردى. قازىر ەتنيكالىق ارتەكتى ۇلتتاردىڭ ىنتىماعىن جاراستىرعاننان كەيىن, جوعارى ءبىلىمدى ەليتاسى بار, گۇلدەنگەن, مۇنايعا باي ەكونوميكالىق ايماقتى باقىلاپ وتىر. قازاقستان رەسەي جانە قىتايمەن جاقسى قارىم-قاتىناس ۇستادى. اقش-تىڭ وداقتاسى رەتىندە تانىلىپ, گەوساياسي تۇراقتىلىقتىڭ تىرەگىنە اينالدى» دەلىنگەن Financial Times گازەتىندە جاريالانعان ماقالادا.
سونداي-اق ماسكەۋدەگى كارنەگي ورتالىعىنىڭ اعا عىلىمي قىزمەتكەرى الەكساندر گابۋەۆ «بۇل قادام نازارباەۆتىڭ وڭىردەگى ەڭ كورەگەن جانە ەڭ تاجىريبەلى كوشباسشى ەكەنىن, ونىڭ بولجامدارى ءالى دە دۇرىس جول سىلتەيتىنىن كورسەتەدى» دەپ ەسەپتەيدى.
«ورتالىق ازيادا ورنالاسقان ەلدە گۇلدەنۋ مەن تۇراقتىلىقتى قولداۋ, ەلدىڭ وراسان زور مۇناي-گاز بايلىعىن بارىنشا ارتتىرۋ جانە شەتەلدىك ينۆەستورلاردى تارتۋعا ارنالعان اۋقىمدى جاڭعىرتۋ جوباسىن ىسكە قوسۋ – ونىڭ ەڭبەگى» دەيدى Financial Times.
ال رەسەي عىلىم اكادەمياسىنىڭ تالداۋشىسى ستانيسلاۆ پريتچين «نازارباەۆ بيلىكتەگى ساباقتاستىقتى قامتاماسىز ەتەدى» دەيدى.
«جاڭا مەملەكەت باسشىسى مەن قاۋىپسىزدىك كەڭەسىنىڭ باسشىسى نازارباەۆ اراسىندا قانداي دا ءبىر قاقتىعىس تۋىندايتىنىن ەلەستەتۋ قيىن. بۇل ەلدىڭ جاڭا باسشىسىنىڭ ساياسي بىلىگىن ارتتىرىپ, ەل كوشباسشىسى رەتىندە تاجىريبە جيناقتاۋعا مۇمكىندىك بەرەدى», دەدى پريتچين.