ناۋرىز مەرەكەسى قارساڭىندا كوكپەكتى اۋىلىنىڭ تۇرعىنى, 11 جىلدان بەرى پاتەر جالداپ جۇرگەن بورانباەۆتار اۋلەتى باقىتقا كەنەلدى. زۋحرا مەن ونىڭ التى بالاسىن قۋانتقان, وتاعاسى امانعاجىنى جىگەرلەندىرگەن كوكپەكتىلىك جومارت كاسىپكەر مەن اۋىلدىڭ اتقا مىنەر جىگىتتەرى.
زۋحرا بورانباەۆانىڭ جەتىنشى بالاعا اياعى اۋىر ەكەن. ايى-كۇنى تاياپ وتىرعان انا, جاڭا باسپاناسىمەن قۇتتىقتاپ كەلگەن بىزبەن اقجارما تىلەگىن بىلاي ءبولىستى: «اۋىلدا تۋىپ ءوستىم. تۇرمىسقا شىققان سوڭ اتا-انامىزدان بولەك شىعايىق دەپ پاتەر جالدادىق. مەن قۇدايدىڭ بەرگەن بالالارىن باعىپ ۇيدە وتىردىم. «انە ءۇي الارمىز, مىنە ءۇي الارمىز» دەپ تالپىنساق تا, ۇيەلمەلى سۇيەلمەلى ءۇش بالا جەدەقابىل كەلدى. وتاعاسى امانعاجى جالعىز باس كوتەرەر, ونىڭ تابىسى كيىم-كەشەك, تاماقتان اسپادى. ءسويتىپ التى بالالى انا اتاندىق. اۋىلدا تۇرعىن ءۇي سالىنباعاندىقتان ءۇي كەزەگى دە جەتپەدى. بيىل دا اياعىم اۋىرلادى. جۇما كۇنى شەلپەك ءپىسىرىپ, اس قامداپ وتىر ەدىم, ۇيگە بۇرىن كوكپەكتى اۋىلىندا اكىم بولعان رۋسلان بەكتاسوۆ اعاي كەلىپ: ء«سىزدى «ەلىم-اي – كوكپەكتى» باسشىسى كەڭسەگە كەلسىن دەپ جاتىر» دەدى. كيىنىپ بارساق, بولات بەكبەردينوۆ اعا: «مەن سىزدەرگە ءۇي الىپ بەردىم. مىناۋ كىلتى, مەرەكەڭىزبەن قۇتتىقتايمىن» – دەدى. توبەم كوككە جەتتى. مەنىڭ ولارعا دەگەن العىسىم – امان-ەسەن بوسانىپ, وسى بالالارىمدى ناعىز ازامات ەتىپ تاربيەلەۋدەن باستالار. قىزدارىمدى اپايداي, ۇلدارىمدى اعايداي ەتىپ تاربيەلەپ, ەل قاتارىنا قوسقىم كەلەدى. باسقا كوپ ءسوزدى ايتىپ, كۋانىشىمدى جەتكىزۋ مۇمكىن ەمەس».
ءتورت بولمەلى ءۇيىن تاپ-تازا ەتىپ جيناپ قويىپتى. ۇلداردا – ءادىل, ۇلان, ءالينۇر ءۇشىن بولەك بولمە, قىزداردىكى – گ ۇلىم, تولعاناي, توعجانعا دا جىلى, جارىق جاي بار ەكەن. قوناق بولمەسى مەن ءاسۇيى ات شاپتىرىم. جىلى, جارىق, تەرەزەگە گۇل ەككەن انا مەن بالانىڭ قۋانىشىندا شەك جوق. سىرتقى جاي بولەك شارۋاشىلىق – مونشا, گاراج, جازعى اس ءۇي, مال قورا, وتىن شوشالاسى ساقاداي ساي, قاتىپ تۇر. «قايتسەم وتباسىمدى اسىرايمىن, بالالارىمدى جەتكىزەمىن, جارىمدى باقىتتى ەتەم» دەگەن امانعاجىنىڭ جىگەرىنە جىگەر, قايراتىنا قايرات قوسىلدى. بالالى ءۇيىن بازار ەتكەن اعالارىنا ءدان ريزا. قايىرىمدى جىگىتتەردىڭ قامقورلىعىنىڭ قايتارىمىن قىزىن ارداي ايالاپ, ۇلىن اسىل ازامات ەتىپ ءوسىرىپ قازاقتىڭ سانىن كوبەيتۋمەن قايتارماق. قۋانىشقا ورتاق بولعانىمىزعا ءبىز دە شاتتاندىق. ءدال وسىنداي قايىرىمدى حالقىنا, جىلۋى جۇرتىنا جەتەتىن قازاق ازاماتتارى قاسيەتتى جەرىمىزدى كوركەيتەتىنە كامىل سەندىك.
ايتا كەتەيىك, كوكپەكتى اۋدانىندا اۋدان كاسىپكەرلەرىنىڭ باستاماسىمەن اقپان ايىنان باستاپ بۇگىنگى كۇنگە دەيىن 193 كوپبالالى جانە جاعدايى تومەن وتباسىعا 8 ميلليون تەڭگەدەن استام قاراجاتقا ماتەريالدىق كومەك كورسەتىلدى.
قايرات بەسبايىس,
«Egemen Qazaqstan»
شىعىس قازاقستان وبلىسى,
كوكپەكتى اۋدانى