اقتاۋداعى «ويماشا» جانە ماڭعىستاۋ وبلىسىنىڭ بەينەۋدەگى «بەكەت اتا» پوليگوندارىندا «باتىس» وڭق اسكەري بولىمدەرىنىڭ 30-دان اسا تانك ەكيپاجى كۇندىزگى جانە تۇنگى ۋاقىتتا شتاتتىق وق اتۋلاردى وتكىزدى.
تانكىشىلەر شارتتى نىسانالار بويىنشا ت-72 تانكىسىنىڭ قارۋ-جاراعىنان دالدەپ اتۋ شەبەرلىكتەرىن پاش ەتتى. وق اتۋلاردى وتكىزۋدىڭ باستى ماقساتى اسكەري قىزمەتشىلەردىڭ جاۋىنگەرلىك دايارلىق دەڭگەيىن ارتتىرۋ, شتاتتىق قارۋ-جاراقتان ولاردىڭ وق اتۋ شەبەرلىكتەرىن جەتىلدىرۋ, اتىستى باسقارۋدى دۇرىس ۇيىمداستىرۋداعى پراكتيكالىق ماشىقتى يگەرۋ بولدى.
ەكيپاجدار باقىلاۋ وق اتۋدىڭ ءبىرىنشى جاتتىعۋىن ورىندادى. ونىڭ بارىسىندا 1600 مەتر قاشىقتىقتان شارتتى تانكتەر بويىنشا 900 مەترگە دەيىنگى قاشىقتىقتان اۆتوموبيلدە قول تانكىگە قارسى گراناتااتقىش پەن سەرپىلمەيتىن زەڭبىرەك جانە 700 مەتردەن قول تانكىگە قارسى گراناتااتقىشپەن وق اتۋدى جۇرگىزدى. ودان باسقا, تانكىشىلەر تانكىگە اتىس جيىنتىعىن سالۋ, تانكتىڭ بولىمشەسى مەن قارۋ-جاراعىن جورىقتىق قالىپتان جاۋىنگەرلىككە جانە كەرى قاراي كوشىرۋ جونىندەگى پراكتيكالىق نورماتيۆتەردى ورىندادى.
وسى جىلدىڭ شتاتتىق وق اتۋلارى بارىسىندا اسكەري قىزمەتشىلەر العاش رەت ارنايى اسپاپتار مەن تۇنگى كورۋ كوزدەۋىشتەرىن قولدانا وتىرىپ, تابيعي جارىقتىڭ بولماۋى جاعدايىندا جاۋىنگەرلىك وق اتۋلاردى وتكىزگەنىن ايرىقشا اتاپ ءوتۋ قاجەت. شەكتەۋلى ۆيزۋالدى كورىنۋشىلىك جاعدايلارىندا جاۋىنگەرلىك وق اتۋلار جاتتىعۋىن ورىندايتىن بايلانىستى ۇيىمداستىرۋ مەن ەكيپاجداردى باسقارۋعا ەرەكشە كوڭىل ءبولىندى. ت-72 تانكىسى قارۋ-جاراعىنان شتاتتىق وق اتۋلار جىل سايىن جىلىنا ەكى رەت وتكىزىلەدى جانە ءدال وسى جەردە, ياعني, پوليگوندا تانكىشى ناعىز كاسىپقويعا اينالادى. سەبەبى, مۇنداي شتاتتىق جاتتىعۋلار جەكە قۇرامنىڭ تانكتى وق اتۋدىڭ قۋاتتىلىعىن سەزىنىپ, ارەكەت ەتۋدە ۇرىس ماشينالارىن كورىپ, وزدەرىنىڭ جاۋىنگەرلىك دايارلىقتارىن جاقسارتۋعا باعىتتالعان.
وق اتۋلاردىڭ قورىتىندىسى بويىنشا 1-ءشى تانكتى روتاسىنىڭ كومانديرى اعا لەيتەنانت ميراس بورامباەۆتىڭ ەكيپاجدارى, ياعني, تانك كومانديرلەرى الدابەرگەن بەكسۇلتان مەن كىشى سەرجانت مەدەت ابىلتاەۆ ۇزدىك ناتيجەلەر كورسەتتى. ولاردىڭ ەكيپاجدارى بارلىق ءتيىستى نورماتيۆتەردى ساپالى ءارى جىلدام ورىنداپ, بارلىق مەجەلەرگە ءدوپ تيگىزدى.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى