پاۆلودار قالالىق ءماسليحاتىنىڭ دەپۋتاتتارى شاھارداعى تاۋەلسىزدىك داڭعىلىن نۇرسۇلتان نازارباەۆتىڭ ەسىمىنە قايتا اتاۋ تۋرالى ءبىراۋىزدان كەلىستى. بۇل تۋرالى قالا اكىمدىگى فەيسبۋك پاراقشاسىندا حابارلادى.
«تاۋەلسىزدىك داڭعىلى نۇرسۇلتان نازارباەۆ داڭعىلى دەپ اتالاتىن بولادى. مۇنداي ۇسىنىستى پاۆلودار قالاسىنىڭ اكىمى ءانۋار كۇمپەكەەۆ ءماسليحاتتىڭ كەزەكتەن تىس 49-سەسسياسىندا ۇسىندى» دەپ جازىلعان قالا اكىمدىگىنىڭ فەيسبۋك پاراقشاسىندا.
ءا.كۇمپەكەەۆ قر تۇڭعىش پرەزيدەنتىنىڭ ەلىمىز دامۋىنداعى تاريحي رولىنە توقتالا كەلە, قازاقستاندى الەم الدىندا مويىنداتقانىن ەرەكشە ايتىپ ءوتتى.
«ەلباسى نۇرسۇلتان ءابىش ۇلى نازارباەۆ جاڭا مەملەكەتتى, نارىقتىق ەكونوميكانى قۇردى, تۇراقتى ەكونوميكالىق ءوسىمدى قامتاماسىز ەتە وتىرىپ, قازاقستاندى الەم الدىندا مويىنداتتى. ورتالىق ازيانىڭ كوشباسشىسىنا اينالدىردى. قازاقستاندى ەكى الەمدىك ەكونوميكالىق داعدارىستان ءساتتى الىپ شىعىپ, ورنىقتى مەملەكەت ەكەنىمىزدى دالەلدەدى. ونىڭ ۇلى جوباسى جاڭا استانانى تۇرعىزۋ بولدى. سوندىقتان مەن تۇڭعىش پرەزيدەنت اتىمەن پاۆلودار قالاسىنىڭ ورتالىق داڭعىلىن نۇرسۇلتان نازارباەۆتىڭ اتىمەن اتاۋ قاجەت دەپ ەسەپتەيمىن», - دەدى قالا اكىمى.
ونىڭ سوزىنشە, اتالعان شەشىمنىڭ قابىلدانۋى وسكەلەڭ جاس ۇرپاق تاربيەسىندە قازاقستاندىق پاتريوتيزم سەزىمىن قالىپتاستىرۋعا سەپتىگىن تيگىزەدى. ءوز كەزەگىندە قالالىق ءماسليحاتتىڭ دەپۋتاتتارى بۇل ۇسىنىستى ءبىراۋىزدان قولدادى. اكىمدىك اقپاراتىنا سايكەس, ءماسليحاتتىڭ بىرلەسكەن شەشىمى جانە اكىمدىك قاۋلىسى ونوماستيكالىق كوميسسياعا جىبەرىلەتىن بولادى.