ناۋرىز مەرەكەسىنىڭ الدىندا وبلىستىڭ تاران اۋدانىندا ءتورت كوپبالالى وتباسىنا باسپانا بەرىلدى. ۇيلەردى ساتىپ الۋعا وسى اۋدان وڭىرىندە التىن وندىرەتىن «ۆارۆارينسكوە» جاۋاپكەرشىلىگى شەكتەۋلى سەرىكتەستىگى مەن «نۇر وتان» پارتياسىنىڭ وبلىستىق فيليالى جومارتتىق جاسادى. ءۇش بولمەلىك پاتەرگە يە بولعان سىمبات پەن ابدىبەك مىرزاشەۆتار بۇل وڭىرگە 2011 جىلى وزبەكستاننان كوشىپ كەلگەن بولاتىن. جاس وتباسىنىڭ قازىر ءتورت بالاسى بار, ەڭ كىشىسى ون ايلىق. سىمبات بالا كۇتىمىمەن ۇيدە وتىر, ابدىبەك جەرگىلىكتى شارۋاشىلىقتا جۇمىس ىستەيدى.
«مەن ۇيدە وتىرامىن, كۇيەۋىم جۇمىس ىستەيدى, وسىعان دەيىن پاتەر جالداپ جۇردىك, قيىن, ارينە. ەندى كەڭ, جىلى پاتەرگە يە بولدىق, العىمىز كوپ» دەيدى سىمبات.
«بۇل جۇمىستار الەۋمەتتىك ارىپتەستىك جونىندەگى مەموراندۋم اياسىندا جۇزەگە اسىپ وتىر. جاقىندا عانا ءبىزدىڭ كاسىپورىن مەن تاران اۋدانى اكىمدىگىمەن مەموراندۋمعا قول قويىلعان بولاتىن. بيىل الەۋمەتتىك جۇمىسىمىزدا كوپبالالى وتباسىلارىنا كومەك بەرۋ باسىمدىققا يە بولادى. مەرەكە الدىندا بىرنەشە وتباسىعا ءۇيدىڭ كىلتىن تاپسىردىق, ودان باسقا اسەنكريتوۆ سەلولىق وكرۋگىندە جيىرما وتباسىنا ازىق-ت ۇلىك اپارىپ بەرەمىز» دەيدى «ۆارۆارينسكوە» جشس بۇقارامەن بايلانىس ءبولىمىنىڭ باسشىسى انتون ترۋحانوۆ.
ايەت سەلوسىندا مىرزاشەۆتاردان باسقا تاعى دا ءۇش وتباسى, ياعني التى بالا تاربيەلەپ وتىرعان سموتروۆتار, بەس بالاسى بار مەدۆەدەۆتەر, بەس بالا ءوسىرىپ وتىرعان قاناباەۆتار وتباسىلارى دا قونىس تويىن تويلادى. ولاردىڭ بارلىعى دا وسىعان دەيىن ءۇيسىز, پاتەر جالداپ تۇرعان ەدى.
تاران اۋدانىندا 142 الەۋمەتتىك از قورعالعان وتباسى تۇرادى. اۋداندا 25 مىڭ تۇرعىن بولسا, سونىڭ اراسىندا 120 كوپبالالى وتباسى بار. وسى وتباسىلاردىڭ ىشىندە جەتەۋى باسپاناعا ءزارۋ ەدى, ولاردىڭ التاۋى قازىردىڭ وزىندە ۇيمەن قامتاماسىز ەتىلدى.
ءنازيرا جارىمبەت,
«ەگەمەن قازاقستان»
قوستاناي