ۇعا اكادەميگى, «عاسىر عۇلاماسى» اتاعىنىڭ يەگەرى, قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ ماڭىزدى مالىمدەمە جاساپ, ءوزىنىڭ پرەزيدەنتتىك وكىلەتتىگىن توقتاتتى. بۇل شەشىم قازاقستان حالقى ءۇشىن كۇتپەگەن جاعداي بولدى. ەلباسى تەرەڭ ويلانىپ, ەلىمىزدىڭ تۇراقتىلىعى ءۇشىن وسىنداي شەشىمگە كەلىپ وتىر. وسى وتىز جىلدىقتا ول پاراسات-پايىممەن, سارابدال ساياساتىمەن قازاق ەلىنىڭ قاسيەتىن ارقالاپ, الەمدەگى ابىرويىن اسقاق ەتتى. بۇل مەملەكەت تاريحىندا عانا ەمەس, الەم جىلناماسىندا قالارى ءسوزسىز. قيىن-قىستاۋ كەزەڭدە قيادان جول تاۋىپ, شەكارامىزدى بەكىتتىك, استانامىزدى سالىپ بولاشاعىمىزعا باعدار قۇردىق. نۇرسۇلتان نازارباەۆ تەك مەملەكەت دەڭگەيىندە شەكتەلمەي, الەمدە بولىپ جاتقان وقيعالار مەن ءتۇرلى جاعدايلارعا سارابدال ساياساتىمەن ءۇن قوسا وتىرىپ, قازاقستاننىڭ وزگە ەلدەرمەن تەرەزەسى تەڭ تۇسۋىنە ۇيىتقى بولعان پاراساتتى باسشى رەتىندە قولتاڭبا قالدىرا ءبىلدى. عاسىرلار بويى اڭساعان تاۋەلسىزدىكتىڭ تۋىن تىكتەگەن تۇڭعىش پرەزيدەنت ەڭ الدىمەن حالىقتىڭ رۋحانياتىنا ەركىندىك بەرگەندىگىمەن قۇرمەتكە ابدەن لايىق.
نۇرسۇلتان ءابىش ۇلى وتىز جىلعا جۋىق ەلدى باسقاردى, قيىن كەزەڭدەردەن وتتىك, ال ونىڭ بىرقاتارى قازاقستان ءۇشىن قاۋىپتى بولدى دەۋگە نەگىز بار. بىراق قانداي قيىن كەزەڭدەردە دە ءتيىمدى شەشىم تاۋىپ, تىعىرىقتان شىعۋدىڭ جولىن تابا ءبىلدى. مۇنىڭ ءوزى ەرلىك. ارينە وتىز جىل ءبىر ادامنىڭ ءومىرى ءۇشىن ۇلكەن مەرزىم, بىراق مەملەكەت ءۇشىن بۇل قاس-قاعىمداي ۋاقىت.
الداعى مەرزىمدە دە حالقىمىزعا اۋىزبىرشىلىك كەرەك. اللا تاعالا بىزگە تاۋەلسىزدىك بەردى, وسى تاۋەلسىزدىگىمىز ماڭگىلىك بولسىن! تاۋەلسىزدىك بولسا مەملەكەتىمىز بولادى, اۋىزبىرشىلىك بولسا مەملەكەتىمىز كۇشەيەدى. الدىمىزدا ۇلكەن سىن ساعاتى سوققالى تۇر. وسى كەزدە سابىرلىقتى سەرىك ەتە وتىرىپ, توزىمدىلىكپەن اتا-بابالارىمىز امانات ەتكەن دارقان دالامىزدى ساقتاپ, وسيەتتەرىن ونەگە ەتە وتىرىپ, الداعى كۇندەرگە ادىمداي بەرمەكپىز.
ەلباسى ن.ءا.نازارباەۆتىڭ كەيىنگىلەرگە كورسەتكەن ۇلگىسى جانە سالىپ كەتكەن ىزگى دارا جولى مەن ەلىمىزدىڭ ەگەمەندىگى ءۇشىن قۇرمەتىمىز شەكسىز!
مۇرات جۇرىنوۆ,
مەملەكەتتىك سىيلىقتىڭ لاۋرەاتى, ۇعا پرەزيدەنتى, اكادەميك