مەملەكەت باسشىسى قاسىم-جومارت توقاەۆ پارلامەنتتىڭ قوس پالاتاسى مەن ۇكىمەت مۇشەلەرىنىڭ الدىندا استانا قالاسىنىڭ جانە ەلىمىزدەگى وبلىس ورتالىقتارىنىڭ نەگىزگى ورتالىق كوشەلەرىن ەلىمىزدىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ ەسىمىمەن اتاۋ تۋرالى ۇسىنىس جاساعان بولاتىن.
اتالعان ۇسىنىستى قابىل العان جەرگىلىكتى اكتيۆتەر مەن ءماسليحات دەپۋتاتتارىنىڭ قولداۋىمەن بىرقاتار ءوڭىر ورتالىقتارىنداعى نەگىزگى كوشەلەرگە ەلباسى نۇرسۇلتان نازارباەۆتىڭ ەسىمى بەرىلدى. ەڭ اۋەلى ەلوردانىڭ اتاۋىن وزگەرتۋ تۋرالى استانا قالالىق ءماسليحاتىنىڭ كەزەكتەن تىس سەسسياسىندا شاھار باسشىسى باقىت سۇلتانوۆ نۇرسۇلتان نازارباەۆتىڭ سان قىرلى باتىل باستامالارىنىڭ ءبىرى بۇگىندە ءوزىنىڭ جەكە قولتاڭباسىنا اينالعان ەلوردا ەكەنىن اتاپ ءوتىپ, سوندىقتان تۇرعىنداردىڭ پرەزيدەنت ق.توقاەۆتىڭ ۇسىنىسىن قولدايتىنىن جەتكىزدى. ءماسليحات دەپۋتاتتارىنىڭ ءبىراۋىزدان قولداۋىنان سوڭ قالا اتاۋىن «نۇر-سۇلتان» دەپ جازۋ تۋرالى ۇسىنىس ۇكىمەت پەن رەسپۋبليكالىق كوميسسياعا جىبەرىلدى.
سونىمەن بىرگە پارلامەنت پالاتالارىنىڭ بىرلەسكەن وتىرىسىندا استانانىڭ اتاۋىن نۇر-سۇلتان قالاسىنا وزگەرتۋ تۋرالى زاڭ قابىلداندى. «مەملەكەت باسشىسى كونستيتۋتسيانىڭ 91-بابىنىڭ 1-تارماعىنا سايكەس, پارلامەنتتىڭ قاراۋىنا «قر كونستيتۋتسياسىنا وزگەرىستەر ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن ەنگىزدى. بۇل جوبا رەسپۋبليكا استاناسىنىڭ اتاۋىن استانا قالاسىنان نۇر-سۇلتان قالاسىنا وزگەرتۋدى كوزدەيدى. «قر كونستيتۋتسياسىنا سايكەس, ۇكىمەت اتا زاڭىمىزعا استانانىڭ اتاۋىن وزگەرتۋ تۋرالى تۇزەتۋ ەنگىزۋ ءۇشىن رەسپۋبليكالىق رەفەرەندۋم وتكىزۋ جونىندە پرەزيدەنتكە ۇسىنىس جاسادى. پرەزيدەنت بۇل ۇسىنىستى رەفەرەندۋمعا شىعارماي, پارلامەنتتىڭ قاراۋىنا جىبەرۋ تۋرالى شەشىم قابىلدادى.
بۇل ماسەلە بويىنشا كونستيتۋتسيالىق كەڭەس ءوزىنىڭ وڭ قورىتىندىسىن دا بەردى», دەدى پارلامەنت ءماجىلىسىنىڭ توراعاسى نۇرلان نىعماتۋلين. بىرلەسكەن وتىرىس بارىسىنداعى تالقىلاۋدان كەيىن دەپۋتاتتار ءبىراۋىزدان استانانىڭ اتاۋىن نۇر-سۇلتان قالاسىنا وزگەرتۋ تۋرالى شەشىم قابىلدادى. سونداي-اق, ەلىمىزدىڭ بىرقاتار وبلىستارىندا ءماسليحاتتاردىڭ شەشىمىمەن ورتالىق كوشەلەردىڭ اتاۋى وزگەردى. مىسالى, شىعىس قازاقستان وبلىسىنىڭ اكىمشىلىك ورتالىعى وسكەمەن قالاسىنىڭ تاۋەلسىزدىك داڭعىلىنا نۇرسۇلتان نازارباەۆتىڭ ەسىمى بەرىلەتىن بولدى. داڭعىلدىڭ تولىق اتاۋى – «نۇرسۇلتان نازارباەۆ داڭعىلى».
شىمكەنت شاھارىنىڭ اكىمشىلىك-ىسكەرلىك ورتالىعىندا ورنالاسقان استانا داڭعىلى دا نۇرسۇلتان نازارباەۆ داڭعىلى بولىپ وزگەرتىلدى.
تاراز قالاسىنداعى ەڭ ۇلكەن كوشەلەردىڭ ءبىرى سانالاتىن تولە بي داڭعىلىنا نۇرسۇلتان نازارباەۆ اتاۋى بەرىلدى. ال تولە بي اتاۋىمەن تاشكەنت كوشەسى اتالاتىن بولدى.
اقتوبەدە ابىلقايىر حان داڭعىلىنىڭ ءبىر بولىگىنە, ياعني ءاليا مولداعۇلوۆا داڭعىلىنان بوكەنباي باتىر كوشەسىنە دەيىنگى اۋماعىنا نۇرسۇلتان نازارباەۆ كوشەسى اتاۋى بەرىلدى.
سول سياقتى پەتروپاۆل قالاسىنداعى ەڭ ۇزىن كوشەنىڭ ءبىرى – مير كوشەسى ەندى ەلباسىنىڭ ەسىمىمەن اتالادى. سونداي-اق ورالداعى دوستىق-درۋجبا داڭعىلى نۇرسۇلتان نازارباەۆ دەپ اتالاتىن بولدى. بۇل تۋرالى شەشىم ورال قالالىق ءماسليحاتىنىڭ كەزەكتەن تىس سەسسياسىندا قابىلداندى. ورال قالالىق ءماسليحاتى نورماتيۆتىك-قۇقىقتىق ماسەلەلەر جونىندەگى تۇراقتى كوميسسياسىنىڭ توراعاسى امانگەلدى ەرمەكقاليەۆ, قالالىق قوعامدىق كەڭەسىنىڭ توراعاسى باقىتجان نۇرباەۆ جانە قالالىق ءماسليحات دەپۋتاتتارى ۆالەنتينا ميحنو, ءانۋار مۇقاتاەۆ تۇڭعىش پرەزيدەنت نۇرسۇلتان نازارباەۆتىڭ تاۋەلسىز قازاقستاندى دامىتۋداعى ەڭبەگى وراسان ەكەنىن, دوستىق داڭعىلىنىڭ ۇلتتار دوستىعىن بەكەمدەگەن ەلباسىنىڭ ەسىمىمەن اتالۋى جاراساتىنىن اتاپ ءوتتى. قوعامدىق تىڭداۋ كەزىندە اقىن, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆا نۇرسۇلتان ءابىش ۇلىنىڭ ەلىمىزدى 90-جىلداردىڭ قيىن كەزەڭىنەن الىپ شىعىپ, دوستىق پەن بەيبىتشىلىكتىڭ مەكەنىنە اينالدىرعانىن ايتتى. جاڭا داڭعىلدىڭ بويىندا كوپتەگەن اكىمشىلىك-ىسكەرلىك, مادەني نىساندارمەن بىرگە, اباي مەن سىرىم دات ۇلى, قۇرمانعازى مەن ءىى دۇنيەجۇزىلىك سوعىستىڭ قاھارمان قىزدارى مانشۇك, ءاليا جانە حيۋاز ەسكەرتكىشتەرى ورنالاسقان. داڭعىلدىڭ ءحىح عاسىردىڭ ارحيتەكتۋرالىق ەسكەرتكىشتەرى شوعىرلانعان ءبىراز بولىگى اشىق اسپان استىنداعى مۇراجاي رەتىندە مەملەكەت قورعاۋىنا الىنعان.
ءدال وسىنداي وتىرىس ماڭعىستاۋ وڭىرىندە دە وتكىزىلىپ, وبلىستىق ءماسليحات دەپۋتاتتارى اقتاۋداعى ەڭ ۇلكەن داڭعىلدى نۇرسۇلتان نازارباەۆ ەسىمىمەن اتاۋ تۋرالى شەشىم شىعاردى. بۇل داڭعىل №1 شاعىن اۋدانداعى اقبوتا ساياباعىنان باستالىپ, №17 شاعىن اۋدانداعى «گرين پارك» تۇرعىن ءۇي كەشەنىنە دەيىن جالعاسىپ جاتىر.
دەپۋتاتتار ءبىراۋىزدان قولداعان بۇل ۇسىنىستار بويىنشا ناقتى شەشىم رەسپۋبليكالىق ونوماستيكالىق كوميسسيادا قارالاتىن بولادى.
دۋمان اناش,
ايدانا شوتبايقىزى,
«Egemen Qazaqstan»