تەلەۆيزيا سالاسى ماماندارى ءۇشىن كەشە اق تۇيەنىڭ قارنى جارىلعان كۇن بولدى. ۇلىستىڭ ۇلى كۇنى – ناۋرىز مەيرامىمەن ورايلاسا كەلگەن ايتۋلى كەشتە وتاندىق تەلەارنالاردىڭ ۇزدىكتەرى كاسىبي «تۇمار» ۇلتتىق سىيلىعىمەن ماراپاتتالدى.
قىزىل كىلەم, ءسانى مەن سالتاناتى كەلىسكەن بەزەندىرۋ, اسەم كيىنگەن تەلەمامانداردىڭ شات-شادىمان كوڭىل كۇيى ءبىر ساتكە «قازمەديا» ورتالىعىن جۋرناليستەردىڭ ءتول دۋمانى, كاسىبي مەرەكەسىنە اينالدىرىپ جىبەرگەندەي اسەر سىيلادى. «قازمەديا حولدا» وتكەن سالتاناتتى كەشكە اقپارات جانە قوعامدىق دامۋ ءمينيسترى داۋرەن اباەۆ, مەملەكەت جانە قوعام قايراتكەرلەرى, قازاق تەلەۆيزياسىنىڭ ارداگەرلەرى مەن جۋرناليستەر, ەسترادا انشىلەرى قاتىستى.
2017 جىلدان بەرى جىل سايىن قازاق تەلەۆيزياسى ۇزدىكتەرىن انىقتاپ, تەلەجۋرناليستەردىڭ كاسىبي دارەجەسىن كوتەرۋگە ارنالعان «تۇمار» سىيلىعى بيىل 9 نوميناتسيا بويىنشا جۇزدەن جۇيرىك شىققان مىقتىلارعا بۇيىردى. ساراپتاۋ القاسىنا كەلىپ تۇسكەن بارلىعى 302 ءوتىنىمنىڭ ىشىنەن سۋىرىلىپ شىعىپ, «ۇزدىك تەلەسەريال», «ۇزدىك الەۋمەتتىك جوبا», «ۇزدىك دەرەكتى فيلم», «ۇزدىك اقپاراتتىق-ساراپتامالىق باعدارلاما», «تەلەۆيزيالىق ماۋسىمنىڭ ۇزدىك وقيعاسى», «ۇزدىك ويىن-ساۋىق جوبا», «ۇزدىك ايماقتىق تەلەجوبا», سونداي-اق «ۇزدىك تەلەجۋرناليست» جانە «ۇزدىك تەلەجۇرگىزۋشى» اتالىمىندا توپ جارعان ۇزدىكتەر كەۋدەسىنە «تۇمار» تاعىپ, ولجالى تارقاستى.
سونىمەن بايگە قورىتىندىسى بويىنشا «ۇزدىك ايماقتىق تەلەجوبا» اتالىمىندا سولتۇستىك قازاقستان وبلىستىق «Qyzyljar» تەلەارناسىنىڭ «Welcome to Qyzyljar» باعدارلاماسى ماراپاتتالسا, «ۇزدىك الەۋمەتتىك باعدارلاما» «استانا» تەلەارناسىنىڭ «دوم مامى» جوباسىنا بۇيىردى. نتك ارناسىنىڭ «قارا بەرى» باعدارلاماسى «ۇزدىك ويىن-ساۋىق جوبا» اتالىمىنداعى باعدارلامالاردىڭ كوشىن باستاپ, كتك تەلەارناسى الامانعا قوسقان «كراسنىي پۋلت» جوباسى «ۇزدىك تەلەسەريال» اتاندى. ال «حابار-24» ارناسى «ۇزدىك اقپاراتتىق-ساراپتامالىق باعدارلاما» اتالىمىندا توپ جاردى. سونىمەن قاتار پرەزيدەنتتىڭ تەلەراديو كەشەنى ۇسىنعان « ۇلى دالا ەلورداسى» جوباسى «ۇزدىك دەرەكتى فيلم», «گاككۋ» ارناسىنىڭ «گاككۋ داۋىسى» باعدارلاماسى «تەلەۆيزيالىق ماۋسىمنىڭ ۇزدىك وقيعاسى» اتالىمىندا جۇلدەگەر اتاندى. بەلگىلى عالىم نامازالى وماشەۆ تابىس ەتكەن «ۇزدىك تەلەجۇرگىزۋشى» سىيلىعىنا «31 ارنا» «ينفورمبيۋرو» باعدارلاماسىنىڭ ديكتورى ايدا بورانباەۆا لايىق دەپ تانىلسا, «قازاقستان» ۇلتتىق تەلەارناسى اقپاراتتىق باعدارلامالار ديرەكتسياسىنىڭ ءجۋرناليسى عابيت بوكەنباي «ۇزدىك تەلەجۋرناليست» اتاندى. ال «تۇمار» ۇلتتىق تەلەۆيزيالىق بايگەسىنىڭ باستى جۇلدەسى – «تۇمار» ارنايى سىيلىعى «قازاقستان» تەلەراديو كورپوراتسياسىنىڭ «جۋسان» جوباسى يەلەندى. ماراپاتتى تابىس ەتكەن اقپارات جانە قوعامدىق دامۋ ءمينيسترى داۋرەن اباەۆ بايقاۋدا توپ جارىپ, «تۇمار» تاعىنعان بارشا تەلەجۋرناليستەردى قۇتتىقتاي كەلە, وسىنداي اۋقىمدى دا مازمۇندى جوبالاردى جۇزەگە اسىرۋعا ۇيىتقى بولىپ, ۇنەمى قولداۋ ءبىلدىرىپ كەلگەن ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆقا زور العىسىن ءبىلدىردى.
ءسويتىپ, تەلەجۇلدىزدار وڭىرىنە «تۇمار» تاعىپ, كاسىبي مەرەيىن وسىرگەن مازمۇندى كەش سوڭى كۇيشى, دومبىراشى, ءداستۇرلى جانە ەسترادا انشىلەرىنىڭ تاماشا ونەر كورسەتۋىنە ۇلاسىپ, جەڭىمپازدارعا ەستەلىك كۋبوك تابىس ەتىلدى.
نازەركە جۇماباي,
«Egemen Qazaqstan»