پارلامەنت ءماجىلىسىنىڭ توراعاسى نۇرلان نىعماتۋلين ەلباسىنا قاتىستى پىكىر ءبىلدىرىپ, ن.نازارباەۆتىڭ قازاقستان وركەنيەتىنىڭ كەمەڭگەر كوشباسشىسى بولىپ قالا بەرەتىنىن اتاپ ءوتتى. بۇل تۋرالى ءماجىلىستىڭ ءباسپاسوز قىزمەتى حابارلادى.
«تاريحتا اراعا عاسىر سالىپ دۇنيەگە كەلىپ, قايتالانبايتىن ۇلى ىستەر جاسايتىن ەرەكشە تۇلعالار بولادى.
وسىنداي ءىرى تۇلعا, ساياسي قايراتكەر, كەمەڭگەر كوشباسشى ول ءبىزدىڭ تۇڭعىش پرەزيدەنتىمىز, ەلباسى نۇرسۇلتان ءابىش ۇلى نازارباەۆ ەكەنى ءسوزسىز. نۇرسۇلتان ءابىش ۇلى قازاقستانىمىز ءۇشىن ەڭ ءبىر قيىن كەزەڭدە ەل باسقارۋ ءىسىن قولعا الىپ, ءوزىنىڭ الىستى بولجايتىن كورەگەندىگىنىڭ, دانالىعىنىڭ ارقاسىندا كەڭ بايتاق قازاق دالاسىندا جاڭا قازاقستاننىڭ ىرگەتاسىن قالادى.
ىرگەتاسىن قالاپ قانا قويماي, جاڭا مەملەكەت, جاڭا ەكونوميكا, جاڭا قوعام قۇردى.
سەبەبى, نۇرسۇلتان نازارباەۆ باسقارعان 30 جىلدىڭ ىشىندە مەملەكەتىمىز الەمدى تاڭقالدىرعان جەتىستىكتەرگە قول جەتكىزدى.
دامۋدىڭ «قازاقستاندىق جولى» جانە «نازارباەۆ مودەلى» قالىپتاستى. ەلىمىزدە ساياسي, الەۋمەتتىك, ەكونوميكالىق رەفورمالار تابىستى جۇرگىزىلىپ, از ۋاقىتتىڭ ىشىندە الەمدەگى دامىعان 50 ەلدىڭ قاتارىنا قوسىلدى.
بۇل ەلباسىنىڭ كورەگەن ساياساتىنىڭ, باتىل قادامدارىنىڭ, تاريحي شەشىمدەرىنىڭ جانە وعان قولداۋ كورسەتكەن حالقىمىزدىڭ بىرلىگىنىڭ ارقاسىندا كەلگەن ۇلكەن جەڭىس.
شىن مانىندە, نۇرسۇلتان نازارباەۆ «جاڭا مەملەكەتتىڭ نەگىزىن قالاۋشى» رەتىندە ەل الدىنا ماڭگىلىك مۇراتتاردى كوزدەيتىن اسقاق ماقساتتار قويىپ, سول ماقساتتاردىڭ شىڭىنا شىعارا بىلگەن بىرەگەي تۇلعا.
بۇل ءاربىر قازاقستاندىق ءۇشىن زور ماقتانىش, ابىروي جانە بيىك مارتەبە.
سوندىقتان, دۇنيەجۇزىنە تانىمال, بەدەلدى تاۋەلسىز قازاقستانىمىزدىڭ نەگىزىن قالاعان تۇڭعىش پرەزيدەنتىمىز, ەلباسى نۇرسۇلتان ءابىش ۇلى نازارباەۆتىڭ تاعدىرلى شەشىم قابىلداپ, شىنايى دەموكراتيانى قولدايتىن, الەمدىك ساياسي تۇلعا ەكەندىگىنىڭ تاعى ءبىر ناقتى كورسەتكىشى.
نۇرسۇلتان ءابىش ۇلىنىڭ دانا, كورەگەن, ساليقالى ساياساتىنىڭ ارقاسىندا قازاقستانىمىز بارلىق قيىندىقتاردان امان - ەسەن شىعىپ, دۇنيەجۇزى تانىعان ابىرويلى ەلگە اينالدى.
نۇرسۇلتان ءابىش ۇلى بۇكىل ەلىمىزگە قامقور باسشى بولىپ, ءاربىر قازاقستاندىقتىڭ جۇرەگىنەن تەرەڭ ورىن الىپ وتىر.
ەلباسىمىز الداعى ۋاقىتتا دا, حالقىمىزبەن بىرگە, مەملەكەتىمىزدى جاڭا بيىكتەرگە, جاڭا بەلەستەرگە جەتكىزەتىنى ءسوزسىز.
سونىمەن بىرگە, ەلباسىمىز ارقاشاندا تاۋەلسىز قازاقستان تاريحىنىڭ تورىندە تۇڭعىش پرەزيدەنت, ۇلت كوشباسشىسى رەتىندە جارقىن ىستەردىڭ جارشىسى بولىپ قالا بەرمەك» دەلىنگەن حابارلامادا.