كلاسسيكالىق ونەر سالاسىنداعى حالىقارالىق كاسىبي مۋزىكالىق «BraVo» سىيلىعىنىڭ ەكىنشى سالتاناتتى تابىستاۋ ءراسىمى ماسكەۋدە 19 ناۋرىز كۇنى رەسەي ۇلكەن تەاترىنىڭ ايگىلى تاريحي ساحناسىندا ءوتتى. «استانا وپەرا» تەاترى «جىلدىڭ كونتسەرتتىك/تەاتر الاڭى» اتالىمى بويىنشا كوشباسشىسى اتاندى. تەاترعا ماراپاتتى رف مادەنيەت ءمينيسترى ۆ.مەدينسكي تابىس ەتتى.
«استانا وپەرا» تەاترىنىڭ ۇجىمى «BraVo» سىيلىعىن بەرۋ تۋرالى جاڭالىقتى ەرەكشە قۋانىشپەن قابىل الدى. ساراپشىلار مەن حالىقارالىق مۋزىكالىق قوعامنىڭ قۇرمەتىنە يە بولۋ ءبىز ءۇشىن ۇلكەن مارتەبە. بەدەلدى ماراپات «استانا وپەرا» ۇجىمىن جاڭا جەتىستىكتەرگە شابىتتاندىرا تۇسەدى دەپ سەنەمىن, ارتىستەرىمىزدىڭ قاجىرلى ەڭبەگىنە كورەرمەندەر ءبىراۋىزدان «جارايسىڭدار!» دەپ باعا بەرەدى دەگەن ۇمىتتەمىز. تاعى دا بارلىقتارىڭىزعا ۇلكەن راقمەت. بارشاڭىزعا بەيبىتشىلىك, كەلىسىم مەن شىعارماشىلىق تابىستار تىلەيمىز, - دەپ اتاپ ءوتتى قازاقستاننىڭ ەڭبەك سىڭىرگەن قايراتكەرى, «استانا وپەرا» موبت ديرەكتورى عالىم احمەدياروۆ.
وسى كەشتە ۇلكەن تەاتر ساحناسىنان قازاقستاندىق وپەرا جۇلدىزى, «بولشايا وپەرا» رەسەيلىك جوباسىنىڭ جەڭىمپازى سالتانات احمەتوۆانىڭ اسەم داۋىسى سىڭعىرلاپ, ول ش.گۋنونىڭ «رومەو مەن دجۋلەتتا» وپەراسىنان دجۋلەتتانىڭ ءۆالسىن ورىندادى. سونىمەن قاتار اككى كورەرمەننىڭ الدىندا كورنەكتى وپەرا ورىنداۋشىلارى, اتاقتى جۇلدىزدار ونەر كورسەتتى: ۆيتتوريو گريگولو (Vittorio Grigolo), اندجەلا گەورگيۋ (Angela Gheorghiu), الەسساندرو سافينا (Alessandro Safina) جانە ت.ب. سالتاناتتى كەشتى ديريجەر پاۆەل كلينيچەۆتىڭ جەتەكشىلىگىندەگى ۇلكەن تەاتردىڭ حورى مەن وركەسترى سۇيەمەلدەدى. ەسىمدەرى الەمگە ايگىلى گولليۆۋد اكتەرى دجون تراۆولتا (John Travolta) مەن اعىلشىن اكتريساسى حەلەن ميررەن (Helen Mirren) «BraVo» سىيلىعىن تابىستاۋ ءراسىمىنىڭ ارنايى قوناقتارى بولدى.
ەسكە سالار بولساق, «BraVo» سىيلىعىنىڭ وزگە مۋزىكالىق جۇلدەلەردەن وزگەشىلىگى – ەۋرازيا قۇرلىعىنىڭ ونداعان ەلىن قامتيتىن تەڭدەسسىز اۋقىمدىلىعى.