بۇگىن الماتىدا ايەلدەردىڭ, وتباسىلار مەن بالالاردىڭ ماسەلەلەرىن ءتيىمدى تۇردە شەشۋگە ارنالعان «ARUANA» اتتى قازاقستان ايەلدەرىنىڭ قۇرىلتايى قۇرىلدى. بۇل جونىندە بۇگىن الماتىدا وتكەن ارنايى ءباسپاسوز ءماجىلىسى كەزىندە بىرلەستىكتىڭ ۇيىمداستىرۋشىلارى مالىمدەدى.
«ARUANA» قازاقستان ايەلدەرىنىڭ قۇرىلتايى» زاڭدى تۇلعالار مەن جەكە كاسىپكەرلەر بىرلەستىگىن قۇرۋداعى ماقسات – ايەلدەردىڭ, وتباسىلار مەن بالالاردىڭ ماسەلەلەرىن شەشۋ ماقساتىندا ايەلدەر باستامالارىن شوعىرلاندىرۋ بولىپ وتىر.
«سوڭعى ايداعى وقيعالار رەسپۋبليكامىزدا ايەلدەردىڭ, وتباسىلار مەن بالالاردىڭ ماسەلەلەرىنە جالپى تالداۋ جۇرگىزىپ, باسقا ۇيىمدارىمەن دانەكەر رەتىندە جۇيەلى تۇردە جۇمىس جاسايتىن ۇيىمنىڭ جوقتىعىن اشىپ كورسەتتى. قازاقستان تاريحىندا مۇنداي بىرلەستىكتەردى قۇرۋ تۋرالى ءبىر-ەكى رەت ۇمتىلىس جاسالدى, الايدا باستامادان ارى جۇمىس جۇرگەن جوق. سوندىقتان دا ءبىز قۇرىلتايدى قۇرۋدى شەشتىك جانە ايەلدەردىڭ, وتباسىلار مەن بالالاردىڭ ماسەلەلەرىن شەشۋمەن اينالىسىپ جۇرگەن بارلىق قازاقستاندىق ۇيىمداردى ورتاق كۇش بىرىكتىرۋگە شاقىرىپ وتىرمىز! ايەلدەردىڭ ءسوزى كۇشتى ءارى سەنىمدى تۇردە شىعۋى كەرەك», – دەدى ءباسپاسوز ءماجىلىسىنىڭ اشىلۋىندا «Ihlas Jurek» قوعامدىق قايىرىمدىلىق قورى قامقورشىلار كەڭەسى توراعاسىنىڭ مىندەتىن اتقارۋشى توعجان قوجاليەۆا,
«ARUANA» قازاقستان ايەلدەرى قۇرىلتايى الدىمەن الەۋمەتتىك زەرتتەۋ جۇرگىزۋ ارقىلى ايەلدەر اراسىنداعى ەڭ وزەكتى دەگەن 10-15 ماسەلەنى انىقتاپ الادى.
الدىمەن وتباسى جانە ايەلدەردىڭ ماسەلەلەرىن شەشۋگە باعىتتالعان مەملەكەتتىك جانە ۇلتتىق باعدارلامالارعا تالداۋ جاسالادى. وسىدان كەيىن جالپى شەشىمدەر قابىلدانىپ, رەتىمەن جۇزەگە اسادى.
ءبىرىنشى كەزەكتە ايەلدەرگە ارنالعان بارلىق ۇەۇ انىقتامالىق كىتابىن دايىنداپ شىعارۋ دا كوزدەلگەن.
سونداي-اق ايەلدەردىڭ, وتباسىلار مەن بالالاردىڭ ماسەلەلەرىن شەشۋگە ارنالعان قولدانىستاعى باعدارلامالار جونىندە, ايەلدەر قۇقىعى, ءبىلىم بەرۋ جانە ايەلدەر اراسىنداعى كاسىپكەرلىكتى قولداۋ جونىندە كەڭەس بەرەتىن ورتالىقتاردى ۇيىمداستىرۋ قاراسىرىلعان.
ايناش ەسالي,
«Egemen Qazaqstan»
الماتى