بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ب.ساپارباەۆ ەڭبەك قاتىناستارىن رەتتەۋدەگى نەگىزگى ماسەلەلەردى شەشۋگە ارنالعان مىندەتتەردى اتادى. بۇل رەتتە ول ەڭ الدىمەن جۇمىسكەرلەردىڭ ەڭبەك ۋاقىتى جانە لايىقتى جالاقى الۋ قۇقىقتارىن قورعاۋ كەرەك ەكەنىن ايتتى.
«مەملەكەتتىك ەڭبەك ينسپەكتورلارىنىڭ تەكسەرۋلەرى جۇمىس بەرۋشىلەردىڭ كوبىسى ەڭبەك زاڭناماسىنىڭ تالاپتارىن ساقتامايتىنىن كورسەتتى. وتكەن جىلى ەڭبەك ينسپەكتورلارى 12 مىڭ بۇزۋشىلىقتى ايقىندادى» دەدى ب.ساپارباەۆ.
ونىڭ ايتۋىنشا, جۇمىسكەرلەردىڭ الدىندا جالاقى بويىنشا بەرەشەكتى وتەۋ ماسەلەسى ەرەكشە باقىلاۋدا. 2018 جىلى مەملەكەتتىك ەڭبەك ينسپەكتورلارى جالاقى بويىنشا 1,2 مىڭ كاسىپورىندا 3,7 ملرد تەڭگەدەن استام سوماعا جالاقى بويىنشا بەرەشەكتى ايقىنداعان. دەن قويۋ بويىنشا قابىلدانعان شارالار ناتيجەسىندە 32 مىڭنان استام جۇمىسكەردىڭ قۇقىقتارى قورعالىپ, ولارعا 3,2 ملرد تەڭگە تولەنگەن.
«بۇگىنگى كۇنى جەرگىلىكتى اتقارۋشى ورگانداردىڭ مالىمەتتەرى بويىنشا بەرەشەك 1,7 ملرد تەڭگەنى قۇرايدى, ونىڭ 75% وڭالتۋداعى بانكروت كاسىپورىندارعا (1,3 ملرد تەڭگە) تيەسىلى. جۇمىس ىستەيتىن كاسىپورىندار بويىنشا 1,4 مىڭ جۇمىسكەردىڭ الدىنداعى بەرەشەك 410 ملن تەڭگەنى قۇرايدى. ەڭ كوپ بەرەشەك اقتوبە (83,2 ملن تەڭگە), جامبىل (72,3 ملن تەڭگە) قاراعاندى (51,8 ملن تەڭگە) وبلىستارىندا» دەدى مينيستر.
سونداي-اق ول اكىمدىكتەر جۇمىس بەرۋشىلەردى بەرەشەكتى وتەۋ گرافيگىن بەلگىلەي وتىرىپ, جۇمىسكەرلەردىڭ جالاقى قورىن ماقساتسىز پايدالانۋ فاكتىلەرى بويىنشا باقىلاۋدى قاتاڭداتۋ قاجەت ەكەنىن اتاپ ءوتتى.
«جالاقى بويىنشا بەرەشەكتى وتەۋدىڭ ناتيجەلىلىگىن ارتتىرۋ ماقساتىندا مينيسترلىك مەملەكەتتىك ەڭبەك ينسپەكتورلارىنىڭ ۇيعارىمىن سوت ورىنداۋشىلارىنىڭ اتقارۋ قۇجاتتارىنىڭ تىزبەسىنە قوسۋ ماسەلەسىن شەشۋدە. بۇل ولاردى سوت شەشىمدەرىمەن تەڭەستىرۋگە جانە ولاردىڭ ماجبۇرلەپ ورىندالۋىن قامتاماسىز ەتۋگە مۇمكىندىك بەرەدى. قازىرگى ۋاقىتتا زاڭ جوباسى پارلامەنت ءماجىلىسىنىڭ قارالۋىندا» دەدى ەڭبەك جانە حالىقتى الەۋمەتتىك قورعاۋ ءمينيسترى.
مينيسترلىكتىڭ اقپاراتىنا سۇيەنسەك, بەيرەسمي ەڭبەك قاتىناستارىنىڭ ساقتالۋىنا نازار اۋدارۋعا تۋرا كەلەدى. سوڭعى 2 جىل ىشىندە ەڭبەك ينسپەكتورلارى ەڭبەك شارتتارىن جاساسپاي جۇمىسكەرلەردىڭ ەڭبەگىن پايدالانعان مىڭنان استام جۇمىس بەرۋشىلەردى ايقىندادى.
اتالعان پروبلەمانى ەسكەرە وتىرىپ, مينيسترلىك 2018-2019 جىلدارى «ەڭبەك شارتىن جاسا» اتتى جالپى رەسپۋبليكالىق اكتسيانى جۇرگىزۋگە باستاماشىلىق جاسادى. وتكەن جىلى اكتسيا شەڭبەرىندە 40 مىڭنان استام ەڭبەك شارتى جاسالدى.
«قازاقستان رەسپۋبليكاسى پرەزيدەنتىنىڭ 2018 جىلعى 5 قازانداعى جولداۋىن ورىنداۋ شەڭبەرىندە مينيسترلىك جەرگىلىكتى اتقارۋشى ورگاندارمەن بىرلەسىپ جالاقىسى تومەن جۇمىسكەرلەردىڭ جالاقىسىن ارتتىرۋ بويىنشا جۇمىس جۇرگىزۋدە. اكىمدىكتەردىڭ اقپاراتى بويىنشا 2019 جىلى 14 ناۋرىزدا 184,6 مىڭنان استام جۇمىس بەرۋشىلەر 958 مىڭ جالاقىسى تومەن جۇمىسكەرلەردىڭ جالاقىسىن ارتتىردى, ونىڭ 1690 كاسىپورنى ءىرى كاسىپكەرلىك, 2,5 مىڭ - ورتاشا, 180 مىڭ شاعىن كاسىپكەرلىك سۋبەكتىلەرى» دەدى ول.
سونداي-اق كورسەتىلگەن كاسىپورىندار بويىنشا جالاقىسى تومەن جۇمىسكەرلەردىڭ ورتاشا جالاقى مولشەرى 33% ارتتىرىلدى ( 43 مىڭنان 57,5 مىڭ تەڭگە دەيىن). شىمكەنت قالاسىندا كاسىپورىنداردىڭ قامتىلۋى تومەن, وندا 33 ءىرى كاسىپورىن عانا جالاقىسى تومەن جۇمىسكەرلەردىڭ جالاقىسىن ارتتىردى (جالاقىسى تومەن جۇمىسكەرلەرى بار 97 كاسىپورىن), ماڭعىستاۋ وبلىسىندا – 22 (91).