ونى پەتروپاۆل ونەر كوللەدجىنىڭ ستۋدەنتتەرى ۇيىمداستىرىپ, ءاز ناۋرىزدىڭ قۇدىرەتىن, تىلسىم سىرىن, جاڭا جىل حابارشىسىن كۇي سازىمەن جەتكىزە ءبىلدى.
ستۋدەنتتەر اۆتوبۋستارعا مىنگەن جۇرگىنشىلەردى كۇيمەن قارسى الىپ, ايرىقشا ءلاززات, قۋانىش, كوتەرىڭكى كوڭىل-كۇي سىيلادى. دومبىرانىڭ قۇلاعىندا وينايتىن جاس دومبىراشىلار قارا دومبىرا شاناعىنان قۇرمانعازىنى, تاتتىمبەتتىڭ, دينانىڭ كۇيلەرىن توگىلدىرىپ, ۇلتتىق تۋىندىلاردىڭ ماڭگى ولمەس قۇدىرەتىن تانىتتى. جۇرگىزۋشىلەر دە ءبىر ساتكە شەتەلدىڭ داڭعازا مۋزىكاسىن ءوشىرىپ, دومبىرانىڭ ۇنىنە قۇلاق ءتۇردى. ۇيالى تەلەفوندارىنان كوز المايتىن جاستار ەلەڭ ەتە قالىستى. «سارىارقا», «بابىراۋىن» ويناي جونەلگەندە قىز-كەلىنشەكتەر جاعى بيلەپ كەتۋگە شاق قالدى.
«ۇنجىرعام ءتۇسىپ كەلە جاتىر ەدى. قازاعىمنىڭ مۋزىكاسىن ەستىپ, كوڭىلىم جادىراپ سالا بەردى. بالام دومبىرا تارتۋدى ۇيرەنىپ ءجۇر. وسىنداي شارالاردىڭ ءجيى ۇيىمداستىرىلعانىن قالايمىن», دەيدى قالا تۇرعىنى ماحاببات قايىرجانوۆا.
اناستاسيا ەۆدوكيمەنكو ناۋرىزدى ادامداردى ءبىر-بىرىنە جاقىنداستىراتىن, بىرىكتىرەتىن دوستىق مەيرامى رەتىندە سانايتىنىن, شىعىس حالىقتارىنىڭ جاڭا جىلىن بىرگە تويلاسىپ كەلە جاتقانىن جەتكىزدى.
«اينالاعا قاراڭىزشى, تابيعات تۇرلەنىپ, كۇن شۋاعىن شاشىپ ەدى, وزگەشە جىلىلىق پايدا بولدى. ءوزىم ونەرلى ادامداردى جاقسى كورەمىن. ۇلتتىق اسپاپتىڭ ءۇنىن ەستىمەگەلى ءبىراز بولىپ ەدى. مەنىڭشە, حالىقتىق ونەرلەردى كوبىرەك ناسيحاتتاۋ كەرەك. قۋانىشتى كۇندەر كوپ بولسىن», دەدى ول اق تىلەگىن ارناپ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى