ەرىك اسقاروۆ اتىنداعى جاس اقىندار مەكتەبى اشىلدى

حالقىمىزدىڭ ۇلتتىق ونەرىندە وشپەس ءىز قالدىرىپ, شولپان جۇلدىزداي جارقىراپ وتكەن جەرلەس اقىن, اۋدارماشى ەرىك اسقاروۆتىڭ تۋعانىنا 60 جىل تولۋ مەرەيتويى قۇرمەتىنە وراي ۇيىمداستىرىلعان يگى شاراعا مارقۇمنىڭ اياۋلى جارى ءناسىپجان مەدىقىزى, كوزىن كورگەن زامانداس ايتىسكەر اقىندار, زيالى قاۋىم وكىلدەرى قاتىستى.

ء«بىزدى ونەر, ونىڭ ىشىندە ايتىس تابىستىردى. ەرىك جان-جاقتى دارىن يەسى بولاتىن. دراماتۋرگياعا دا قالام تەربەدى. اۋدارمامان دە اينالىستى. دەسەك تە پوەزيا الەمىندەگى قولتاڭباسى ايرىقشا-تۇعىن» دەدى جان جارى.

وسىدان ەكى جىل بۇرىن جاس ءارى تالاپتى بالالارعا ەسىگىن ايقارا اشقان وبلىستىق اقىندار مەكتەبىنىڭ تاربيەلەنۋشىلەرى كوپتەگەن مۇشايرا مەن ايتىستارعا قاتىسىپ, جاقسى قىرىنان تانىلىپ ءجۇر. ەندى مەكتەپ ايتىستىڭ اقتاڭگەرى ەرىكتىڭ ەسىمىن يەلەنىپ, جاڭا فورماتپەن تۇرلەنەدى.

«كوركەمسوز» باعىتى بويىنشا تالىمگەر, س. مۇقانوۆ اتىنداعى قازاق سازدى-دراما تەاترىنىڭ كوركەمدىك جەتەكشىسى باتىربەك شامبەتوۆتىڭ ايتۋىنشا, مۇندا مەكتەپ وقۋشىلارى, ستۋدەنتتەر اقىندىق ونەردىڭ قىر-سىرىن مەڭگەرەدى. سونىمەن قاتار جازبا اقىندار, ءمۇشايرا اقىندارى, كوركەم ءسوز وقۋ ۇيىرمەلەرى جۇمىس ىستەيتىن بولادى.

«ەرىك ورنى تولماس اقىنداردىڭ ءبىرى. 40-تان ەندى اسىپ, ناعىز بابىنا  كەلگەن شاعىندا مەزگىلسىز وپات بولدى. مەن قازاق تەلەديدارىنا ادەبي درامالىق حابارلاردىڭ باس رەداكتورى بولىپ كەلگەنىمدە قاراماعىمدا رەجيسسەر بولىپ  5-6 جىل جۇمىس ىستەدى. كەيىن تالانتتى جازبا جانە ايتىسكەر اقىن رەتىندە ءوزىن مويىنداتتى. «ەر جىگىتكە جەتى ونەر دە از» دەمەكشى, ول سان قىرلى تۇلعا بولاتىن» دەدى جۇرتشىلىق الدىندا تەبىرەنە سويلەگەن ايتىسكەرلەر جانە جىرشى-تەرمەشىلەردىڭ حالىقارالىق وداعىنىڭ توراعاسى, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان.

اقىندار مەكتەبى مەن اۋديتوريانىڭ سالتاناتتى اشىلۋى «قايىڭ دە مەنى كوشپەيتىن ەلىمنەن» اتتى رەسپۋبليكالىق عىلىمي كونفەرەنتسياعا جالعاستى. وندا ەرىك اسقاروۆتىڭ ءومىرى مەن شىعارماشىلىعىنا ارنالعان باياندامالار وقىلىپ, وبلىس ورتالىعىنداعى كوشەلەردىڭ بىرىنە اقىننىڭ ەسىمىن بەرۋ تۋرالى ۇسىنىس ءبىراۋىزدان قولداۋ تاپتى.

ءومىر ەسقالي

«ەگەمەن قازاقستان»

سولتۇستىك قازاقستان وبلىسى