مامىردا كوپبالالى وتباسىلارعا 2 مىڭ پاتەر بەرىلەدى

جالپى, ەلىمىزدە تۇرعىن­داردىڭ الەۋمەتتىك تۇرعىدا از قورعالعان توپتارىنا, كوپبالالى وتباسىلار مەن انالارعا قولداۋ كورسەتۋ شارالارى جۇيەلى جۇرگىزىلىپ كەلەدى. مەملەكەت باسشىسى نۇرسۇلتان نازارباەۆ «Nur Otan» پارتياسىنىڭ اقپان ايىندا وتكەن كەزەكتى ءحVىىى سەزىندە كوپبالالى وتباسىلار مەن الەۋمەتتىك از قامتىلعان ازاماتتارعا قولداۋ كورسەتۋدى ۇكىمەتكە ايرىقشا تاپسىرعان بولاتىن. اتالعان تاپسىرمانى جۇزەگە اسىرۋ ماقساتىندا ۇكىمەت ناقتى شارالاردى قولعا الدى. وتكەن اپتادا الەۋمەتتىك سالاعا جاۋاپتى ۆيتسە-پرەمەر گۇلشارا ابدىقالىقوۆا باسقارعان توپ ەلىمىزدىڭ باتىس ءوڭىرىن ارالاعان ەدى. باتىستاعى ءتورت وبلىستا وتكەن كەزدەسۋلەردە اتاۋلى الەۋمەتتىك كومەكتىڭ ەرەكشەلىكتەرى, ءبىلىم بەرۋ مەن دەنساۋلىق ساقتاۋ سالاسى قىزمەتكەرلەرىنىڭ ەڭبەك­اقىسىن كوتەرۋ جانە تاعى باس­قا دا ماسەلەلەر اشىق تالقى­لانىپ, لاۋازىمدى تۇلعا­لار تۇرعىنداردىڭ ساۋالدارىنا جاۋاپ بەرگەن-ءدى. 

ال كە­شە ەڭبەك جانە حا­لىقتى الەۋ­مەتتىك قورعاۋ ءمي­نيسترى بەردى­بەك ساپارباەۆ, ءبىلىم جانە عىلىم ءمينيسترى كۇ­لاش ءشامشي­دينوۆا, دەن­ساۋ­لىق ساقتاۋ ۆي­تسە-ءمينيسترى ءلاز­زات اقتاەۆا, استانا قالا­سىنىڭ اكىمى با­قىت سۇلتانوۆ قالاداعى كوپبالا­لى انالارمەن كەزدەستى. جيىنعا حالىقتى الەۋمەتتىك قورعاۋ ما­سەلەسىنە تىكەلەي نەمەسە جا­ناما تۇردە قاتىساتىن قۇرى­لىم­داردىڭ باسشىلارى دا قاتىستى. 

كەزدەسۋدە كوپبالالى وت­با­سى­لارعا كومەك كورسەتۋ تە­تىكتەرى, 1 ساۋىردەن باس­تاپ بەرى­لە باستايتىن اتاۋ­لى الەۋ­مەتتىك كو­مەكتىڭ ەرەك­شەلىكتەرى, «التىن القا» جانە «كۇمىس ال­قا» يەگەرلەرى ءتا­رىزدى كوپبا­لالى انالارعا كور­سەتىلەتىن جاردەمنىڭ اتاۋلى الەۋمەتتىك كومەكتى ەسەپتەۋ كە­زىندە قالاي ەسكەرىلەتىنى جايلى ايتىلدى. سونىمەن قاتار كەزدەسۋدە كوپبالالى وتباسىلاردى باسپانامەن قامتاماسىز ەتۋ ماسەلەسى دە ءسوز بولدى. ەڭبەك جانە حالىقتى الەۋمەتتىك قور­عاۋ ءمينيسترى ب.ساپارباەۆتىڭ ايتۋىنا قاراعاندا, باسپانا كەزەگىنە قاتىستى ەرەجەلەر وزگەرۋى دە مۇم­كىن ەكەن. اتاپ ايتقاندا, كوپبالالى انالاردى باسپانا كەزەگىندە جالپى تىزىمنەن بولەك تارتىپپەن قويۋ ماسەلەسى دە نازاردان تىس قالماعان. «قازىرگى كەزدە ءبىز كوپبالالى انالار ءۇشىن بولەك ءبىر كەزەكتى قۇرۋ ماسەلەسىن پىسىقتاپ جاتىرمىز. بىراق ونى بىردەن جاساي المايمىز عوي. ءبارىن جان-جاقتى قاراۋ قاجەت. قانشا قارجى كەرەك؟ قانشا باسپانا سالۋ كەرەك؟ سونىڭ ءبارىن جان-جاقتى قاراستىرامىز» دەدى ب.ساپارباەۆ. سونىمەن قاتار مينيستر «التىن القا» يەگەرلەرىنىڭ تۇرعىن ءۇي كە­زە­گىنىڭ جالپى تىزىمىنە كىرمەي­تىنىن, ولاردىڭ وزگەشە ستاتۋسى بار ەكەنىن اتاپ ءوتتى.

ال يندۋستريا جانە ينفرا­قۇ­رىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆتىڭ ايتۋىنا قاراعاندا, 2019 جىلى جالعا بەرىلەتىن جانە نەسيەلىك تۇرعىن ۇيلەردى ىسكە قوسۋ جوس­پارىنا سايكەس ەل بويىنشا 20563 پاتەر بەرىلمەك. ونىڭ 5391-ءى جىلدىڭ العاشقى جار­تىسىندا ءوز يەلەرىن تاپ­پاق. مامىردا كوپبالالى وتباسىلارعا بەرىلۋى ءتيىس 2 مىڭ پاتەر دە وسى بەس مىڭدىقتىڭ ىشىنە كىرىپ وتىر. سونىمەن قاتار ۇكىمەت كوپبالالى وتباسىلار ءۇشىن 2 پايىزدىق يپوتەكا بەرۋدى دە كوزدەپ وتىر. بۇل يپوتەكانىڭ العاشقى جارناسى 10 پايىز بولماق. العاشقى جارنانىڭ ورنىنا جەرگىلىكتى اكىمدىكتەر بەرەتىن تۇرعىن ءۇي سەرتيفيكاتىن دا پايدالانۋ مۇمكىندىگى بار. استانا قالاسىنىڭ اكىمى با­قىت سۇلتانوۆتىڭ ايتۋىن­شا, بيۋدجەتتىك ۇيىم قىزمەت­كەر­لەرىنە 2 مىڭ تۇرعىن ءۇي سەرتيفيكاتىن بەرۋ كوزدەلگەنىن ايتتى. ال وزگە وڭىرلەردە شا­ما-شارقىنشا مۇنداي سەرتي­فيكاتتار ۇسىنىلماق.

قىس­قاسى, كوپبالالى وتباسىلاردى الەۋمەتتىك قولداۋ جان-جاق­تى جۇرگىزىلمەك. سونىڭ ىشىن­دە ولاردى باسپانامەن قامتا­ماسىز ەتۋ ماسەلەسى ال­دىڭ­عى قاتارعا شىعىپ وتىر. ەس­تەرىڭىزگە سالار بولساق, ەلى­مىزدە 340 مىڭنان استام كوپبالالى وتباسى تىركەلسە, ولار­دىڭ 28 مىڭ 126-سى ءۇي كەزە­گىندە تۇر.

امانگەلدى قۇرمەت,

«Egemen Qazaqstan»