بەيسەنبى, 19 شىلدە 2012 7:22
شار اينا
اقش مەملەكەتتىك حاتشىسى حيلارري كلينتون الەمدىك قوعامداستىقتى سيريا ماسەلەسىندە رەسەيگە قىسىم كورسەتۋگە شاقىردى. مەمحاتشىنىڭ تۇسىندىرۋىنشە, بۇل جەردە اڭگىمە ماسكەۋدىڭ باتىس ەلدەرى بۇۇ قاۋىپسىزدىك كەڭەسىنە ىلگەرىلەتكەن قارار جوباسىنا قولداۋ كورسەتۋى قاجەتتىگى تۋراسىندا بولىپ وتىر.
بەيسەنبى, 19 شىلدە 2012 7:22
شار اينا
اقش مەملەكەتتىك حاتشىسى حيلارري كلينتون الەمدىك قوعامداستىقتى سيريا ماسەلەسىندە رەسەيگە قىسىم كورسەتۋگە شاقىردى. مەمحاتشىنىڭ تۇسىندىرۋىنشە, بۇل جەردە اڭگىمە ماسكەۋدىڭ باتىس ەلدەرى بۇۇ قاۋىپسىزدىك كەڭەسىنە ىلگەرىلەتكەن قارار جوباسىنا قولداۋ كورسەتۋى قاجەتتىگى تۋراسىندا بولىپ وتىر.
كلينتوننىڭ سوزىنە قاراعاندا, قۇجات بۇۇ جارعىسىنىڭ جەتىنشى بولىمىنە سايكەس, سيريا پرەزيدەنتى باشار اسادقا, سونداي-اق ونىڭ رەجىمىنە جاردەم قولىن سوزىپ وتىرعان ادامدارعا قارسى «وتە قاتال» سانكتسيا قولدانۋدى قاراستىرادى. اتالعان قارار جوباسىن فرانتسيا, گەرمانيا جانە اقش قولداسا, رەسەي قارسىلىق بىلدىرگەن بولاتىن. قىتاي دا كوڭىلى تولمايتىنىن بايقاتقان ەدى.
ناقتى قورىتىندىسى شىعارىلدى
ليۆيادا پارلامەنتتىك سايلاۋدىڭ ناقتى قورىتىندىسى جاريا ەتىلدى. وندا باسىم داۋىستى بۇرىنعى وتپەلى ۇلتتىق كەڭەستىڭ پرەمەر-ءمينيسترى بولعان ماحمۋد دجيبريلدىڭ ليبەرالدى اليانسى الدى. ەندى ونىڭ وكىلدەرى پارلامەنتتە پارتيا ءۇشىن بولىنگەن 80 ورىننىڭ 39-ىن يەلەنەتىن بولادى.
يسلاميستەردىڭ «مۇسىلمان-باۋىرلار» پارتياسى 17-ورىنعا قول جەتكىزدى. ليۆيا پارلامەنتىندە 120 ورىن ەندى تاۋەلسىز كانديداتتار اراسىندا بولىسكە تۇسەتىن بولادى. بارلىعى سايلاۋعا 100-دەن استام پارتيا وكىلدەرى قاتىستى. ولاردىڭ كوپشىلىگى داۋىس بەرەردىڭ الدىندا, ياعني سايلاۋدىڭ سوڭعى ايلارىندا عانا قۇرىلعان ەدى.
شەكاراشىلار اراسىنداعى اتىس
قىرعىزستان مەن وزبەكستان شەكاراشىلارى اراسىندا اتىس بولدى. بۇل تۋرالى «فەرعانا» حابارلادى. الدىن الا دەرەك بويىنشا, اتىس سالدارىنان ءبىر ادام قازا تاۋىپ, بىرنەشەۋى جاراقاتتانعان. وققا ۇشقان قىرعىز شەكاراشىسى سەكىلدى.
كيكىلجىڭ كوكتاش – بۇلاقباشي اۆتوجولىنىڭ جوندەۋ جۇرگىزىلىپ جاتقان ۋچاسكەسىندە ورىن العان. وزبەك جاعىنىڭ ايتۋىنشا, اتالعان ۋچاسكەدە جوندەۋ جۇمىستارىن جۇرگىزۋگە بولمايدى, ويتكەنى جول شەكارانىڭ كەلىسىلمەگەن ۋچاسكەسى ارقىلى وتەدى. وق اتۋ ۋچاسكەگە وزبەك شەكاراشىلارى كەلىپ, جۇمىستى توقتاتۋدى تالاپ ەتكەننەن كەيىن باستالعان. العاش قارۋ قولدانعان دا وزبەكتەر كورىنەدى.
ناتو-نىڭ 22 جۇك كولىگى جويىلدى
«تاليبان» قوزعالىسىنىڭ جاساقتارى 18 شىلدەگە قاراعان ءتۇنى ناتو اسكەرلەرى ءۇشىن وق-دارىلەر مەن وتىن تيەلگەن 22 جۇك كولىگىن جويىپ جىبەردى. ءبىر اتاپ كورسەتەرلىگى, تاليبتەر ويلارىن بار-جوعى ءبىر-اق بومبا قولدانىپ جۇزەگە اسىرعان.
وقيعا ورىن العان سامانگان پروۆينتسياسىنىڭ باسشىلىعى اتاپ كورسەتكەنىندەي, جۇك كولىكتەرى مەن بەنزين قۇيىلعان ماشينەلەر تاڭ اتۋىن كۇتپەك بولادى. ءسويتىپ, اۆتوتۇراققا ءبىر مەزگىلدە ونداعان ماشينە جينالىپ قالادى. جۇرگىزۋشىلەردىڭ ۇيقىعا كەتكەنىن جانە كۇزەتتىڭ السىزدىگىن پايدالانعان تاليبتەر بەنزين قۇيىلعان كولىكتىڭ بىرىنە ماگنيتتى مينا جاپسىرىپ قويىپ, سودان كەيىن ونى ىسكە قوسادى.
كيم چەن ىن مارشال اتاندى
سولتۇستىك كورەيا كوسەمى كيم چەن ىنعا ەل ارمياسىنىڭ مارشالى اتاعى بەرىلدى. بۇل تۋرالى كەشە ءسولتۇستىككورەيالىق باق-تارعا سىلتەمە جاساعان «رەيتەر» اگەنتتىگى حابارلادى. اگەنتتىك كيم چەن ىننىڭ وسىلايشا كحدر اسكەرى مەن ەلگە تۇتاستاي باقىلاۋ ورناتۋعا قول جەتكىزگەنىن اتاپ كورسەتەدى.
قازىرگى كەزدە كيم چين ىن كورەيا ەڭبەك پارتياسىنىڭ ءبىرىنشى حاتشىسى, كحدر قورعانىس كوميتەتىنىڭ ءبىرىنشى توراعاسى, كورەيا حالىق ارمياسىنىڭ باس قولباسشىسى, پارتيا ورتالىق اسكەري كوميسسياسىنىڭ توراعاسى بولىپ تابىلادى. ول وسىنىڭ بارىنە اكەسى كيم چەن ير كوز جۇمعاننان كەيىن, ياعني 2011 جىلدىڭ جەلتوقسانىندا قول جەتكىزدى.
وزەروۆتىڭ ۇلى پارامەن ۇستالدى
ماسكەۋ تۇبىندە 6 ميلليون رۋبل پارا الدى دەگەن كۇدىكپەن ششەلكوۆسكي اۋدانىنىڭ اكىمشىلىك ورتالىعى – زاگوريانسكي قالاسى اكىمشىلىگىنىڭ باسشىسى نيكولاي وزەروۆ قاماۋعا الىندى. ول بەلگىلى كەڭەستىك تەننيسشى جانە سپورت كوممەنتاتورى نيكولاي وزەروۆتىڭ ۇلكەن ۇلى بولىپ تابىلادى.
وزەروۆپەن بىرگە ششەلكوۆو قالاسىنىڭ تاعى ءبىر تۇرعىنى تۇتقىندالعان. وعان دەلدالدىق جاسادى دەگەن ايىپ تاعىلماق. تەرگەۋ نۇسقاسى بويىنشا, وزەروۆ «لوسينىي وستروۆ» ساياجايلىق كوممەرتسيالىق ەمەس ارىپتەستىك ديرەكتورىنان ىلعي اقشا تالاپ ەتكەن. ەسەسىنە ول اتالعان ساياجاي كەنتىنە گاز جۇرگىزۋگە جانە ەلەكترلەندىرۋگە رۇقسات ەتۋگە ۋادە بەرگەن.
قىسقا قايىرىپ ايتقاندا:
وڭتۇستىككورەيالىقتار تاجىكستان پرەزيدەنتى ەمومالي راحموندى تاەكۆوندو بويىنشا قارا بەلبەۋمەن ناگرادتادى. وسىلايشا راحموننىڭ اتالعان سپورت ءتۇرىن تاجىكستاندا دامىتقانى ءۇشىن ەڭبەگى اتاپ ءوتىلدى.
باكۋدە كوبا گرۋزينسكي دەگەن لاقاپ اتى بار كريمينالدى اۆتوريتەت كوبا كۆاحادزە تۇتقىندالعان. وعان پاتەر تونادى دەگەن ايىپ تاعىلىپ وتىر. سونىمەن قاتار, ءتىنتۋ كەزىندە كۆاحادزەدەن گەروين تابىلعان. وعان قاتىستى بىرنەشە قىلمىستىق ءىس قوزعالىپتى.
مىسىردىڭ تەمىر جولىندا پويىز اپاتى ورىن الدى. ونى ەكىنشى ءبىر پويىزدىڭ جولاۋشىلارى جاساعانى انىقتالدى. جولاۋشىلار وزدەرى مىنگەن پويىزدىڭ توقتاتىلىپ, جۇردەك پويىزدىڭ ءوتىپ كەتۋىنە جول اشىلعانىنا نارازىلىق ءبىلدىرىپتى.
ءيزرايلدىڭ پارلامەنتىندە اسا كوپ مانداتقا يە «كاديما» پارتياسىنىڭ مۇشەلەرى كەشە پرەمەر-مينيستر بينيامين نەتانياحۋدىڭ بيلەۋشى كواليتسياسىنان شىعاتىندارىن مالىمدەدى. بۇل ءجايت اسكەري قىزمەت تۋرالى جاڭا زاڭ بويىنشا كەلىسسوزدەردىڭ ناتيجە بەرمەۋىنە بايلانىستى ورىن الدى.
ينتەرنەت ماتەريالدارى نەگىزىندە ازىرلەندى.