ورالدىق جۋرناليستەر اعىلشىن ءتىلىن ۇيرەنەدى

- ءبىزدىڭ باسقارما قازاقستاننىڭ تىلدەردى دامىتۋ مەن قولدانۋدىڭ 2011-2019 جىلدارعا ارنالعان مەملەكەتتىك باعدارلاماسىن, ەلباسىنىڭ قازاق جازۋىن لاتىن گرافيكاسىنا كەزەڭ-كەزەڭىمەن كوشىرۋ تاپسىرماسىن اتقارۋدا. ەلىمىزدىڭ ءتىل ساياساتىنداعى اتقارىلعان ىستەردى قوعامعا جەتكىزەتىن – بۇقارالىق اقپارات قۇرالدارى عوي. بۇگىن مەدياحولدينگپەن ەكىجاقتى ىنتىماقتاستىق مەموراندۋمىنا قول قويىپ وتىرمىز, - دەيدى باتىس قازاقستان وبلىستىق تىلدەردى دامىتۋ باسقارماسىنىڭ باسشىسى ايگۇل مىڭباەۆا.

ايتا كەتەيىك, «جايىق پرەسس» جشس – باتىس قازاقستان وبلىسىنداعى ەكى وبلىستىق, 12 اۋداندىق گازەتتىڭ باسىن قوسقان ءىرى مەدياحولدينگ. جاقىندا عانا سەرىكتەستىك قۇرامىنداعى «جايىق پرەسس» اقپارات ورتالىعى ءوز الدىنا اقپارات اگەنتتىگى بولىپ رەسمي تىركەۋدەن ءوتتى.

- ءوز ويىمدا, جۋرناليستەر كەمىندە ءبىر شەت ءتىلىن جەتىك مەڭگەرۋى ءتيىس. ارينە, وڭىردەگى تىلشىلەردىڭ ءبارىنىڭ بىردەي «بولاشاقپەن» وقىپ كەلۋگە مۇمكىندىگى جوق. دەگەنمەن, ەلدە ءجۇرىپ-اق ءتىل ۇيرەنۋگە بولمايدى دەپ كىم ايتىپتى؟ سوندىقتان جەرگىلىكتى تىلدەردى دامىتۋ باسقارماسىمەن كەلىسىلگەن ۋاعدالاستىق بويىنشا «جايىق پرەسس» جۋرناليستەرى اعىلشىن ءتىلى كۋرسىن تەگىن وقۋعا مۇمكىندىك الىپ وتىر. «English for Media» جوباسى اياسىندا مەدياسەرىكتەستىكتىڭ 45 قىزمەتكەرى 4 اي بويى بىلىكتى مامانداردان ءتالىم الادى, - دەيدى «جايىق پرەسس» جشس باس ديرەكتورى راۋان ءسابيت ۇلى.

مەدياحولدينگ باسشىسىنىڭ ايتۋىنشا, ءتىل كۋرسىنىڭ ۇزدىك شاكىرتتەرىنە سەرتيفيكاتتان بولەك, شەتەلگە شىعۋ مۇمكىندىكتەرى قاراستىرىلماق.

قازبەك قۇتتىمۇرات ۇلى,

«Egemen Qazaqstan»

سۋرەتتى تۇسىرگەن تەمىربولات توقمامبەتوۆ

باتىس قازاقستان