جانسەل دەنيز مەن سمايىل دۇيسەباي يرانداعى رەيتينگىلىك تۋرنيردە جۇلدەگەر اتاندى

جانسەل 73 كەلى سالماقتا سىنعا ءتۇسىپ, جارىستىڭ جارتىلاي فينالىندا ءسۇرىندى. 

«اقپان ايىندا ءبىز ەكى ءىرى رەيتينگىلىك تۋرنيرگە قاتىستىق. مۇنداي باسەكەلەرگە الەمنىڭ ءار تۇكپىرىنەن سپورتشىلار جينالادى. ويتكەنى, ءبارىنىڭ ماقساتى بىرەۋ – رەيتينگتەگى ورنىن جاقسارتۋ. 

وليمپيادالىق رەيتينگتە جوعارى ۇپاي جيناپ, ۇزدىك التىلىققا ەنۋ مەنىڭ دە ەڭ باستى مىندەتىم. بىراق بۇل وڭاي شارۋا ەمەس. جولداماعا ىلىگۋ ءۇشىن كۇش-جىگەرىمدى اياپ قالمايمىن. ءىرى جارىستاردان ولجالاعان ءاربىر جۇلدەم ماعان سەنىمدىلىك سىيلاسا, جەڭىلىستىڭ دە ءوز ساباعى بار», - دەدى Olympic.kz سايتىنا سۇحبات بەرگەن سپورتشى. 

جانسەل دەنيز تۇركيا جانە ەگيپەتتە وتكەن رەيتينگىلىك تۋرنيرلەردەن جۇلدەسىز ورالعان جوق. 

سونداي-اق, ۇلتتىق قۇراماداعى ۇزدىكتەردىڭ ءبىرى سانالاتىن سمايىل دۇيسەباي (87 كەلى) يرانداعى باسەكەسىنىڭ كۇمىسىن يەلەنسە, سامات تەمىرحان (54 كەلى) قولا جۇلدەگەر اتاندى.