پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ «نۇر وتان» پارتياسىنىڭ XVIII سەزىندە بەرگەن تاپسىرمالارىن ورىنداۋ ماسەلەسى بويىنشا ۇلتتىق ەكونوميكا ءمينيسترى ر. دالەنوۆ باياندادى. اتاپ ايتقاندا, ەڭبەكاقى مولشەرىن ۇلعايتۋ جانە مونو, شاعىن قالالار مەن اۋىلدىق اۋماقتاردى قارجىلاندىرۋ ماسەلەلەرى قوزعالدى.
ۇەم دەرەكتەرى بويىنشا, وزگە سالالار جۇمىسكەرلەرى مەن تەحنيكالىق پەرسونالدىڭ جالاقىسى 30%-عا ارتادى. 643 407 جۇمىسكەر قامتىلادى. بۇل — الەۋمەتتىك جۇمىسكەرلەر, كىتاپحاناشىلار, ورمانشىلار, ۆەتەرينار دارىگەرلەر, ءىس جۇرگىزۋشىلەر, اۋلا سىپىرۋشىلار, تەحنيكالىق پەرسونال جانە ت.ب.
«ەگەر ورتاشا جالاقى 69 مىڭ تەڭگەنى قۇراسا, ەندى 90 مىڭ تەڭگەنى قۇرايدى. قوسىمشا قاجەتتىلىك 459,5 ملرد تەڭگەنى قۇرايدى, ونىڭ ىشىندە 2019 جىلى – 90,7 ملرد تەڭگە», — دەدى ۇلتتىق ەكونوميكا ءمينيسترى.
بۇل 78 مىڭ اكىمشىلىك مەملەكەتتىك قىزمەتشىنىڭ جالاقىلارىنا قاتىستى بولادى. ولار جەرگىلىكتى دەڭگەيدەگى جۇمىسكەرلەر: ساراپشىلار, جەتەكشى ماماندار, باس ماماندار. ولار وبلىستاردا, اۋدانداردا, اۋىلداردا جۇمىس ىستەيتىن ادامدار. ورتاشا ءوسىم 25% قۇرايدى.
«باس ماماننىڭ ورتاشا جالاقىسى 84 مىڭ تەڭگەنى قۇراسا, ەندى 100 مىڭ تەڭگە بولادى. قوسىمشا قاجەتتىلىك 76,5 ملرد تەڭگەنى قۇرايدى, ونىڭ ىشىندە 2019 جىلى – 15,3 ملرد تەڭگە», — دەپ ناقتىلادى ر. دالەنوۆ.
بۇدان وزگە, ۇلتتىق ەكونوميكا ءمينيسترىنىڭ ايتۋىنشا, مونو جانە شاعىن قالالاردى دامىتۋعا جىلىنا 10 ملرد تەڭگە بولىنەدى. بۇل مونو جانە شاعىن قالالارداعى ينجەنەرلىك-كوممۋنيكاتسيالىق ينفراقۇرىلىمنىڭ 100 جوباسىن سالۋدى نەمەسە رەكونسترۋكتسيالاۋدى قامتاماسىز ەتەدى.
«پەرسپەكتيۆالىق اۋىلداردى دامىتۋ ءۇشىن "اۋىل – ەل بەسىگى" ارنايى جوباسى قارجىلاندىرىلادى. بۇعان 3 جىلدا 90 ملرد تەڭگە بولىنەدى. 1,5 مىڭعا جۋىق پەرسپەكتيۆالىق اۋىل قامتىلادى. پەرسپەكتيۆالىق سانىنا, ورنالاسقان ورنىنا, دامۋ الەۋەتىنە جانە ت.ب. بايلانىستى انىقتالادى», — دەدى ر. دالەنوۆ.