قۇرمەتتى وتانداستار!
قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ «نۇر وتان» پارتياسىنىڭ XVIII سەزىندە سويلەگەن ءسوزى دامۋدىڭ قازىرگى كەزەڭىندە ەل الدىندا تۇرعان ءتۇيىندى ماقساتتار مەن الەۋمەتتىك ساياساتتىڭ مىندەتتەرىن ايقىندايتىن ستراتەگيالىق ماڭىزدى باعدارلامالىق قۇجات بولدى.
ازاماتتاردىڭ مەملەكەت تاراپىنان قولداۋ كۇتكەن ساۋالدارى ەلباسىنىڭ وزەكتى, الەۋمەتتىك باعدارلانعان تاپسىرمالارىندا اتاۋلى جانە بارىنشا ءدال جاۋاپتارىن تاپتى.
نەگىزگى باسىمدىق – ازاماتتاردىڭ ءومىر ءسۇرۋ دەڭگەيىن جانە قازاقستاننىڭ الەۋمەتتىك مەملەكەت رەتىندە دامۋىن قامتاماسىز ەتۋ.
بۇگىننىڭ نەگىزگى مىندەتتەرى – حالىقتىڭ از قامتىلعان توپتارىنىڭ تابىستارىن ارتتىرۋ جانە قولداۋ, كىرىسى تومەن ازاماتتاردىڭ تۇرعىن ءۇي ماسەلەلەرىن شەشۋ, ءبىلىم بەرۋ جانە دەنساۋلىق ساقتاۋ سالالارىن جاقسارتۋ, وڭىرلەردى كەشەندى دامىتۋ.
قازاقستاندىق وتباسىلاردىڭ ءال-اۋقات دەڭگەيىن ارتتىرۋ بويىنشا ناقتى قادامدار ۇسىنىلدى. نەگىزىنەن كىرىسى تومەن كوپ بالالى وتباسىلارعا ارناپ 40 مىڭنان استام جالعا بەرىلەتىن پاتەرلەر سالىنىپ, نەسيەلەۋدىڭ جەڭىلدىكتى جاڭا تەتىگى ازىرلەنەتىن بولادى.
ءار بالاعا بەرىلەتىن ەڭ تومەنگى تولەم مولشەرى 21 مىڭ تەڭگە شاماسىندا.
2019 جىلعى 1 شىلدەدەن باستاپ بيۋدجەت سالاسىنىڭ تومەن جالاقى الاتىن قىزمەتكەرلەرىنىڭ جالاقىسى 30%-عا, ال جەرگىلىكتى اتقارۋشى ورگانداردىڭ تومەن دەڭگەيدەگى قىزمەتكەرلەرىنىڭ جالاقىسى ورتاشا ەسەپپەن 25%-عا ۇلعايادى.
ءبىلىم بەرۋ جانە دەنساۋلىق ساقتاۋ سالالارىن بۇدان ءارى قاراي: وقۋ ورىندارىنىڭ تيىمدىلىگىن ارتتىرۋدان باستاپ قوعامدىق دەنساۋلىق ساقتاۋ جانە العاشقى مەديتسينالىق-سانيتارلىق كومەك كورسەتۋ قىزمەتتەرىنىڭ جۇمىسىنا شىعاتىن شىعىنداردى 40%-دان 60%-عا دەيىن ۇلعايتۋدى جاقسارتۋدىڭ جولدارى بەلگىلەندى.
پرەزيدەنت ۇكىمەت پەن وڭىرلەر اكىمدەرى جۇمىسىنىڭ ماڭىزدى تۇستارىن اتاپ كورسەتتى. ەلدەگى ءومىر ءسۇرۋدىڭ جاڭارتىلعان وڭىرلىك ستاندارتتارىنا نەگىزدەلگەن جاڭا كارتاسىن قالىپتاستىرۋعا تاپسىرما بەرىلدى. بولاشاعى بار سەلولىق ەلدى مەكەندەر ءوسۋ جانە ورنىقتى دامۋ جولىنداعى مەكەندەرگە اينالۋعا ءتيىس.
بارلىق جوبالاردى ىسكە اسىرۋ ءۇشىن بيۋدجەتتەن جيىنتىعىندا 2 تريلليون تەڭگەدەن استام قارجى بولىنەدى. مۇنىڭ شامامەن 2 ميلليون ادامعا جانە 340 مىڭ كوپ بالالى وتباسىنا اسەرى بولادى.
قازاقستان حالقى اسسامبلەياسى «نۇر وتان» پارتياسىمەن بىرلەسىپ, مەملەكەت باسشىسىنىڭ تاپسىرمالارىنىڭ ورىندالۋىنا تۇراقتى نەگىزدە قوعامدىق باقىلاۋ جاساپ كەلەدى. بۇل جۇمىس ەلباسىنىڭ جاڭا الەۋمەتتىك باعدارلامالارىنا قاتىستى دا جالعاساتىن بولادى.
ويتكەنى ناق وسى حالىقتىڭ الەۋمەتتىك ءال-اۋقاتى ماسەلەلەرى ۇلتتىق بىرلىكپەن تىكەلەي بايلانىستى. ولاردىڭ نەگىزىندە – حالىقتىڭ بىرلەسۋى, باسەكەگە قابىلەتتى ەكونوميكا, زياتكەر قوعام, الەم قۇرمەت تۇتاتىن ەل دەگەن ورتاق ءمان جاتىر.
الەۋمەتتىك مەملەكەتتىڭ ىرگەتاسىن سولار قالىپتاستىرادى. ال بۇل مەملەكەتتىڭ ەڭ نەگىزگى مۇراتى – ءار قازاقستاندىقتىڭ باقۋاتتى بولۋى.
قۇرمەتتى قازاقستاندىقتار!
پرەزيدەنت ۇسىنعان شارالار – ەلدە جۇرگىزىلىپ جاتقان الەۋمەتتىك جاڭعىرتۋدىڭ, بەس الەۋمەتتىك باستامانى جانە «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» قازاقستان حالقىنا جولداۋىن ىسكە اسىرۋدىڭ قيسىندى جالعاسى.
ءبىز ولار اركىمنىڭ جۇرەگىن جىلىتىپ, وڭ باعا الاتىنىنا سەنىمدىمىز. بۇل مىندەتتەردى ىسكە اسىرۋ بۇگىن, ناق وسى جەردە, تاپ قازىر باستالادى. ەلدەگى بىرلىگىمىز بەن كەلىسىمىمىزدى ساقتاپ, ىسىمىزگە بارىنشا كوڭىل ءبولىپ, جاۋاپكەرشىلىكپەن قاراعان كەزدە عانا ولارعا قول جەتكىزە الامىز.
ءبىز بارلىق قازاقستاندىقتاردى الەۋمەتتىك ادىلەتتىلىك پەن باقۋاتتى مەملەكەت قۇرۋ ماقساتىنا قول جەتكىزۋ جولىندا بىرلىگىمىزدى بەكەمدەي تۇسۋگە شاقىرامىز!
قازاقستان حالقى اسسامبلەياسىنىڭ كەڭەسى
2019 جىلعى 27 اقپان