تاراز قالاسىندا جاس تۋريستەر باس قوستى

فەستيۆالدىڭ العاشقى كۇنى كەلۋشىلەرگە ارنايى ەكسكۋرسيالىق تۋر ۇيىمداستىرىلدى. اتالعان شارا وبلىس ورتالىعىنداعى «كونە تاراز» تاريحي-مادەني كەشەنىنەن باستاۋ الىپ, قاتىسۋشىلار ەكى مىڭ جىلدىق تاريحى بار كونە تاراز قالاسىنىڭ تاريحىمەن تانىستى. بۇدان كەيىن اۋليەاتا جەرىنە ارنايى كەلگەن وزات وقۋشىلار ساياحات بارىسىندا قاراحان, تەكتۇرماس, داۋىتبەك كەسەنەلەرىمەن قاتار, «قازاق حاندىعىنا 550 جىل» ەسكەرتكىشىمەن جانە قايتا جاڭعىرعان «جەڭىس» ساياباعىندا دا بولدى. فەستيۆالدىڭ ءبىر ەرەكشەلىگى, وقۋشىلار ءۇشىن ءار نىسان باسىندا ۆيكتورينالىق ويىندار ۇيىمداستىرىلىپ, جەڭىمپازدارعا ارنايى سىيلىقتار تابىستالدى.

  ال, «تاراز جەرىنە تاعزىم» جاستار فەستيۆالىنىڭ ءۇشىنشى كۇنى «دوستىق» ۇيىندەگى عىلىمي-تاجىريبەلىك كونفەرەنتسيامەن جالعاستى. مۇندا تاريحشىلار مەن تۋريستىك كومپانيا وكىلدەرى قاتىسۋشىلار تاراپىنان قويىلعان سۇراقتارعا ناقتى جاۋاپ بەردى. سونىمەن قاتار, جاستار ءتۋريزمىن دامىتۋ ماسەلەلەرى جونىندە دە ءسوز بولدى.

  فەستيۆالدىڭ قورىتىندى بولىمىندە وقۋشىلار اراسىندا سۋرەت جانە قولونەر جۇمىستارىنىڭ كورمەسى ۇيىمداستىرىلىپ, «جاس سۋرەتشى», «جاس ۇستا» سايىستارىنىڭ دا قورىتىندىسى شىعارىلدى. جەڭىمپازدار ارنايى ديپلوم مەن باعالى سىيلىقتارعا يە بولدى. «شارانىڭ ماقساتى – ەلباسىنىڭ 2019 جىلدى «جاستار جىلى» دەپ جاريالاۋىنا وراي, الدىمەن تۋريزم سالاسىنداعى جاستاردىڭ ۇلەسىن ارتتىرۋ. جاستار ءتۋريزمىن دامىتۋ جانە ولارعا ەلىمىز بەن ءوڭىردىڭ بۇل سالاداعى الەۋەتىن تانىتۋ ءارى اقپاراتتاندىرۋ. بالالار مەن جاستاردىڭ پاتريوتتىق سەزىمىن تاربيەلەۋ. سونىمەن قاتار, تۋريستىك-ولكەتانۋ جۇمىستارىن جانداندىرۋ ارقىلى سالاۋاتتى ءومىر سالتىن ناسيحاتتاۋ», دەيدى جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆا.

 

حاميت ەسامان,

«Egemen Qazagstan»

جامبىل وبلىسى