كەلىسىمشارت كولەمى – 32 ملرد 959 ملن تەڭگە

«الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ باتىس قازاقستان وبلىسى بويىنشا فيليالىنىڭ ديرەكتورى نۇرجامال جۇماعۇلوۆا 2019 جىلى تەگىن مەديتسينالىق كومەكتىڭ كەپىلدەندىرىلگەن كولەمى شەڭبەرىندە كورسەتىلەتىن مەديتسينالىق قىزمەتتەردى ساتىپ الۋ جۇمىستارىنىڭ قورىتىندىسىن جاريا ەتتى.

كەلىسىمشارت بەكىتكەن ەمحانالار مەن كلينيكالار كەپىلدەندىرىلگەن تەگىن مەديتسينالىق كومەك پاكەتى شەڭبەرىندە مەملەكەتتىك تاپسىرىستى ورىندايتىن بولادى.

نۇرجامال شامعونقىزىنىڭ ايتۋىنشا, كەپىلدەندىرىلگەن تەگىن مەديتسينالىق كومەك پاكەتىندە قامتىلعان قىزمەتتەردى كورسەتەتىن جەتكىزۋشى-كومپانيالاردى ايماقتىق كوميسسيا ىرىكتەيدى. كوميسسيا قۇرامىندا مەديتسينالىق ساقتاندىرۋ قورى, «اتامەكەن» ۇلتتىق كاسىپكەرلەر پالاتاسى, پاتسيەنتتەر مەن دەنساۋلىق ساقتاۋ نىساندارىنىڭ مۇددەسىن قورعايتىن ۇكىمەتتىك ەمەس ۇيىمداردىڭ جانە مەديتسينا قىزمەتكەرلەرىنىڭ كاسىپوداعى وكىلدەرى بار.

2019 جىلدىڭ باسىندا الەۋەتتى جەتكىزۋشىلەر دەرەكقورىنا باتىس قازاقستان وبلىسى بويىنشا 57 مەديتسينا ۇيىمى ەنگەن ەكەن. ونىڭ 38-ءى نەمەسە 66,6%-ى – مەملەكەتتىك, 19-ى نەمەسە 33,4%-ى – جەكەمەنشىك كلينيكالار. وتكەن جىلمەن سالىستىرعاندا مەملەكەتتىك تاپسىرىستى ورىنداۋعا قۇلشىنىس بىلدىرگەن جەكەمەنشىك كلينيكالار سانى ارتقانى بايقالادى.

سونىمەن, باتىس قازاقستان وبلىسى بويىنشا مەديتسينالىق ساقتاندىرۋ قورىنىڭ فيليالى 2019 جىلدىڭ قاڭتار ايىندا مەملەكەتتىك تاپسىرىستى الۋ تۋرالى 51 مەديتسينا ۇيىمىمەن كەلىسىمشارت جاساعان. ونىڭ 15-ءى – جەكە مەنشىك كلينيكا. مەديتسينالىق كومەك كورسەتەتىن جەتكىزۋشى-ۇيىمدارمەن بەكىتىلگەن كەلىسىمشارتتىڭ جالپى سوماسى 32 ملرد 959 ملن تەڭگەنى قۇرادى. وسىنىڭ ىشىندە مەملەكەتتىك ەمحانالار – 30 ملرد 402 ملن تەڭگە, جەكە مەنشىك كلينيكالار – 2 ملرد 557 ملن تەڭگەنىڭ قىزمەتىن كورسەتەتىن بولادى.

- جەكەمەنشىك مەديتسينا ۇيىمدارى ستاتسيوناردى الماستىراتىن كومەك تۇرلەرىن كورسەتۋگە دە بەلسەندى اتسالىسىپ جاتىر. بيىل ولاردىڭ سانى وتكەن جىلمەن سالىستىرعاندا 2-گە كوبەيدى, - دەيدى نۇرجامال جۇماعۇلوۆا.

قازبەك قۇتتىمۇرات ۇلى,

«Egemen Qazaqstan»

باتىس قازاقستان