ءۇندىستاننىڭ نيۋ-دەلي قالاسىندا ءوتىپ جاتقان نىسانا كوزدەۋدەن الەم كۋبوگى كەزەڭىندە قازاقستاندىق ەليزاۆەتا كورول فينالعا ءوتتى. بۇل تۋرالى ۇلتتىق وليمپيادا كوميتەتىنىڭ ءباسپاسوز قىزمەتى حابارلادى.
كورول 50 مەترگە ءۇش جايعاسىم بويىنشا نىسانا كوزدەۋدەن ىرىكتەۋ سىنىندا 8-ءشى ورىننان كورىندى. بۇل فينالعا ءوتۋ ءۇشىن جەتكىلىكتى كورسەتكىش.
ايتا كەتەلىك, الەم كۋبوگى كەزەڭدەرىندە نىسانا كوزدەۋدەن وليمپيادا جولدامالارى ساراپقا سالىنادى. ۇلتتىق قۇرامانىڭ باس باپكەرى ولگا دوۆگۋن كوماندا الدىندا ءۇش ليتسەنزيا ۇتىپ الۋ مىندەتى تۇرعانىن ايتقان بولاتىن.
«مەرگەندەر وليمپيادا جولداماسىن الەم كۋبوگى كەزەڭدەرى مەن ازيا چەمپيوناتىندا ساراپقا سالادى. اتاپ ايتار بولساق, ءبىزدىڭ سپورتشىلاردى ءتورت بىردەي الەم كۋبوگى كەزەڭى كۇتىپ تۇر. الەمدىك دودادا ءار جاتتىعۋ تۇرىنەن ەكى وليمپيادالىق كۆوتا بەرىلەدى. ەگەر 1-2 ورىنداعى سپورتشىلار جولداماعا يەلىك ەتكەن بولسا, كۆوتا 3-4 ساتىداعى مەرگەندەرگە وتەدى. ال ازيا چەمپيوناتىندا ءار جاتتىعۋدان ءتورت كۆوتا تاراتىلاتىنى انىقتالدى. وليمپيادانىڭ ءۇش جولداماسىن يەلەنسەك دەگەن ماقسات قويدىق», - دەيدى باس باپكەر.
16-28 اقپان ارالىعىندا وتەتىن الەم كۋبوگى كەزەڭىنە تومەندەگى سپورتشىلار قاتىسۋدا:
ۆلاديمير يساچەنكو
يۋري يۋركوۆ
الەكساندرا مالينوۆسكايا
ەليزاۆەتا كورول
الەكسەي كلەيمەنوۆ
زاۋرەش بايبوسىنوۆا.