فرانتسيانىڭ مارسەل قالاسىندا وتكەن حالىقارالىق تۋرنيردە تابىستى ونەر كورسەتىپ, فينالعا دەيىن جەتكەن قازاقستاندىق تەننيسشى ميحايل كۋكۋشكين الەمدىك رەيتينگتەگى جاعدايىن كۇرت جاقسارتتى.
ۇزدىكتەر تىزىمىندە بىردەن 11 ساتىعا جوعارلاعان جەرلەسىمىز قازىرگى كەزدە اتر رەيتينگىندە 39 ورىندا تۇر. بۇرىن-سوڭدى ول ءدال وسىنداي بيىككە كوتەرىلگەن جوق ەدى. وسىعان دەيىنگى ميحايل كۋكۋشكيننىڭ ەڭ جاقسى كورسەتكىشى - 46 ورىن. قازاقستاندىق تەننيسشى بۇل ناتيجەگە وسىدان ءتورت جىل بۇرىن قول جەتكىزدى.
وكىنىشكە قاراي, وزگە جىگىتتەرىمىز ورەلى ونەرلەرىمەن ءوز جانكۇيەرلەرىن قۋانتا الماي ءجۇر. ەلىمىزدىڭ ەكىنشى جانە ءۇشىنشى راكەتكالارى الەكساندر بۋبليك پەن الەكساندر نەدوۆەسوۆ بۇل تىزىمىدە 153 جانە 191 ورىنداردى يەلەنۋدە. ال ايەلدەر رەيتينگىندە يۋليا پۋتينتسەۆا مەن زارينا دياس «توپ-100» ويىنشىنىڭ ساناتىندا. يۋليا 46 ورىندا تۇرسا, زارينا 96 ساتىعا جايعاستى. قازاقستاننىڭ ءۇشىنشى راكتەكاسى ەلەنا رىباكينا 193 ورىندى ەنشىلەۋدە.
كوشباسشىلارعا كەلەر بولساق, WTA تىزىمىندە جاپونيالىق ناومي وساكا, رۋمىنيالىق سيمونا حالەپ جانە چەحيالىق پەترا كۆيتوۆا الدىعى لەكتەن كورىنسە, اتر رەيتينگىندە سەربيالىق نوۆاك دجوكوۆيچ, يسپانيالىق رافاەل نادال جانە گەرمانيالىق الەكساندر زۆەرەۆتىڭ تەگەۋىرىنى قاتتى.
عالىم سۇلەيمەن,
«Egemen Qazaqstan»