بيىل ءۇشىنشى جىل قاتارىنان جاستار كورپۋسىن دامىتۋ جوباسى ءبىلىم جانە عىلىم مينيسترلىگى جانە دۇنيەجۇزىلىك بانكتىڭ قولداۋىمەن جۇمىسسىز جاستاردى ەلىمىزدىڭ ەكونوميكالىق بەلسەندى توبىنىڭ قاتارىنا تارتۋ ماقساتىندا جۇزەگە اسىپ كەلەدى.
بۇل جوباعا ەلىمىزدىڭ بەلسەندى دەگەن كەز كەلگەن ازاماتى قاتىسا الادى. جوبا شارتىنا سايكەس تۇراقتى جۇمىسى جوق ءارى تابىسى كۇن كورىس دەڭگەيىنەن تومەن رەسپۋبليكانىڭ 14-29 جاس ارالىعىنداعى, مەكتەپ وقۋشىلارىنان وزگە تۇرعىندارىنىڭ قاتىسۋ مۇمكىندىگى بار. جوبانىڭ باستى ەرەكشەلىگى - جوعارى وقۋ ورىندارىن تامامداعان جاستارعا اي سايىن 60 000 تەڭگە, باسقا قاتىسۋشىلار ءۇشىن 40 000 تەڭگە شاكىرتاقى تاعايىندالعان.
جوبانى باسقارۋ توبىنىڭ ۇيلەستىرۋشىسى گۇلميرا ەسكەندىروۆانىڭ ايتۋىنشا, گرانت سومماسى ءبىر ميلليون تەڭگە. بيىلعى جىلى جاستار كورپۋسىن دامىتۋ جوباسى اقمولا, اتىراۋ, باتىس قازاقستان, ماڭعىستاۋ وبلىستارىمەن قاتار الماتى جانە استانا قالالارىن قامتيتىن بولادى.
ال جوبا تاريحىنا ءسال شەگىنىس جاسايتىن بولساق, الماتى, قاراعاندى, پاۆلودار جانە وڭتۇستىك قازاقستان وبلىستارىندا 2017 جىلى 589 الەۋمەتتىك جوبا جۇزەگە اسىپ, 2000-نان استام جاس كاسىپكەر ءوز ءىسىن باستاعان. ال 2018 جىلى جوباعا اقتوبە, شىعىس قازاقستان, جامبىل, سولتۇستىك قازاقستان, قىزىلوردا جانە قوستاناي وبلىستارى بويىنشا 3508 جاس كاسىپكەر قاتىسىپ, 1027 جوبا ءساتتى جۇزەگە استى. جوبانى جۇزەگە اسىرۋ بارىسىندا 250 ءبىلىم بەرۋ كۋرستارى, اۋىلداردى دامىتۋعا باعىتتالعان 200-دەن استام جوبا, 170 سپورتتىق سەكتسيا, 125 شىعارماشىلىق ۇيىرمەلەر, 61 ناۋبايحانا مەن كونديتەرلىك تسەح, 86 تىگىن شەبەرحاناسى اشىلعان.
جاستار كورپۋسىن دامىتۋ جوباسىن ىسكە اسىراتىن ۇيلەستىرۋ اگەنتتىگى تاراپىنان جوباعا قاتىسۋشى جاستار ارنايى تاعىلىمدامادان وتەتىن بولادى. جەكە كاسىپ اشۋعا ۇسىنىس بىلدىرگەن جاستار جوبالارىن ۇجىمدىق نەگىزدە قورعايدى. جوبالار ءۇش كەزەڭ بويىنشا ىرىكتەلەدى. تولىق اقپاراتتى الماتى قالاسى بويىنشا ايماقتىق ۇيلەستىرۋشىدەن جانە zhasproject.kz سايتىنان الۋعا بولادى.
ەلۆيرا سەرىكقىزى,
«ەگەمەن قازاقستان»
الماتى