جىل باسىنان 824 ادام جۇمىسقا ورنالاستىرىلدى. ولاردىڭ 492-ءى – جاس ماماندار, دەپ حابارلايدى استانا قالاسى اكىمدىگىنىڭ رەسمي سايتى.
استانا اكىمدىگىنىڭ جۇمىسپەن قامتۋ ورتالىعىندا بەلگىلى بولعانداي, وتكەن جىلى ورتالىقتىڭ كومەگىنە 20 مىڭنان استام ادام جۇگىنسە, ولاردىڭ 8 مىڭى تۇراقتى جۇمىسقا ورنالاستىرىلدى.
جاستار پراكتيكاسىنا جانە ءتۇرلى جۇمىس ورىندارىنا 836 جاس مامان جولدانعان. الەۋمەتتىك جۇمىس ورىندارىنا 200-دەن استام ادام جولداندى. ونىڭ 82-ءى – جاستار. ال, ەكى مىڭ ادام قوعامدىق جۇمىسقا تارتىلدى. ولاردىڭ 1239-ى – جاستار.
«سونىمەن قاتار ورتالىق قايتا وقىتۋمەن اينالىسادى. وتكەن جىلى 700 –دەن استام ادام موبيلدىك قوسىمشالاردى ازىرلەۋشى, كيبەرقاۋىپسىزدىك سالاسىنداعى مامانى, انيماتسيا جانە ۆيدەوگرافيكا, تىگىنشى, دانەكەرلەۋشى, كونديتەر سياقتى ماماندىقتار بويىنشا ءبىلىم الدى», – دەدى جۇمىسپەن قامتۋ ورتالىعىنىڭ ديرەكتورى اباي بايمۋلدين.
ەكى مىڭنان استام ادام كاسىبي تەحنيكالىق ماماندىق بويىنشا وقىپ شىقتى. جاڭا بيزنەس يدەيالاردى جۇزەگە اسىرۋ ماقساتىندا 70-تەن استام مەملەكەتتىك گرانت بولىنگەن بولاتىن.
وسىلايشا, 2018 جىلعا قويىلعان ماقسات تولىق ورىندالدى. 2019 جىلى ورتالىق جاستاردى جۇمىسپەن قامتۋ ماسەلەسىنە باسا نازار اۋدارماق. جىل باسىنان 824 ادام جۇمىسقا ورنالاستىرىلدى. ولاردىڭ 492-ءى – جاس ماماندار. قازىرگى كۇنى 4 مىڭنان استام بوس ورىن بار.