حالىقارالىق ديريجەرلەر فورۋمى قوستانايدا ەكىنشى رەت ءوتتى. ە.ومىرزاقوۆ اتىنداعى وبلىستىق فيلارمونيانىڭ كونتسەرت زالىن ءۇش كۇن بويى كلاسسيكالىق مۋزىكا مەن ءان-كۇي تەربەدى.
ونەر وتاۋىندا ەلىمىزگە عانا ەمەس, ودان تىس جەرلەرگە اتى ءماشھۇر بەلگىلى ديريجەرلەرى: «استانا وپەرا» تەاترى باس ديريجەرىنىڭ ورىنباسارى, قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ, قازاق ۇلتتىق ونەر ۋنيۆەرسيتەتىنىڭ «ۆوكالدىق ونەر جانە ديريجەرلاۋ» كافەدراسىنىڭ دوتسەنتى ەرلان بەيسەمباەۆ, ن.تىلەنديەۆ اتىنداعى مەملەكەتتىك اكادەميالىق فولكلورلىق-اكادەميالىق «وتىرار سازى» وركەسترىنىڭ ديريجەرى جالعاسبەك بەگەندىكوۆ, قازاق ۇلتتىق ونەر ۋنيۆەرسيتەتىنىڭ پروفەسسورى, «دارىن» جاستار سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى داۋرەن عىلىموۆ, گنەسين اتىنداعى «دۋشا روسسي» ورىس حالىق اسپاپتار وركەسترىنىڭ باس ديريجەرى ۆلاديمير شكۋروۆسكي باس قوستى. العاشقى كۇنى قوناقتار ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىندە ستۋدەنتتەرمەن كەزدەستى. وندا ونەر جايلى كەڭىنەن اڭگىمە ءوربىدى.
نەگىزى بيىلعى ديريجەرلەر فورۋمى وبلىستىق فيلارمونياداعى كامەرالىق وركەستردىڭ 15 جىلدىعىنا ارنالىپ ۇيىمداستىرىلدى. سوندىقتان فورۋمنىڭ العاشقى كۇنى قوستانايلىقتارعا كامەرالىق وركەستردىڭ كونتسەرتى ۇسىنىلدى.
– قوستانايدا ءتۇرلى سالانىڭ – كلاسسيكالىق, ورىس جانە قازاق ۇلت اسپاپتارى وركەسترلەرىنىڭ ديريجەرلەرى باس قوسىپ وتىرمىز. قوستاناي وبلىستىق فيلارمونياسىنىڭ بۇل فورۋمى وتە ماڭىزدى شارا دەر ەدىم. ونەر بولىسكەندە داميدى. مۇندا ءار ديريجەر ءوز تاجىريبەسىن, ءوزىنىڭ جاڭالىعىن كورسەتەدى. وسىنداي كەزدەسۋلەردەن جاڭا باستامالار, جاڭا بايلانىستار پايدا بولادى. بۇگىن ماسكەۋدەن ۆلاديمير شكۋروۆسكي قازاقستانعا كەلدى, ال ءبىز ەرتەڭ رەسەيگە بارامىز, وسىلاي تاجىريبە الماسامىز. بۇل فورۋم قوستانايداعى ونەر ۇجىمىن, ونداعى تالانتتى مۋزىكانتتار ءۇشىن دە پايدالى, ولاردى ىزدەنىستەرگە يتەرمەلەيدى, – دەدى بەلگىلى ديريجەر, قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ.
كورەرمەندەر قاشاندا ونەرگە سۋساپ وتىرادى. كامەرالىق, ورىس ۇلت اسپاپتارى, قازاق ۇلت اسپاپتارى وركەسترلەرىنىڭ ورىنداۋىندا كلاسسيكالىق جانە ورىس, قازاق كومپوزيتورلارىنىڭ جانە حالىق شىعارمالارى ورىندالدى. ەڭ باستىسى, ديريجەرلەر فورۋمى وبلىستىق فيلارمونياداعى تالانتتاردى قاناتتاندىرعانى انىق.
– ديريجەرلەر فورۋمىنىڭ جاقسى اسەرى مول. ءبىزدىڭ مۋزىكانتتار ءبىر سەرپىلىپ قالدى, ونەر شەبەرلەرىنەن ولاردىڭ ۇيرەنەرى كوپ. سونىمەن قاتار ءبىزدىڭ فيلارمونيا وركەسترلەرىنىڭ رەپەرتۋارى جاڭارىپ, قىزىقتى شىعارمالارمەن تولىعا ءتۇستى. ونەردىڭ ورىندە جۇرگەن ديريجەرلەردىڭ كەلۋى ءبىزدىڭ ۇجىم ءۇشىن شەبەرلىك مەكتەبىنەن ءبىر دە كەم ەمەس. ال قوستانايلىق ونەر- سۇيەر قاۋىمنىڭ قۋانىشى ءبىر بولەك, – دەيدى وبلىستىق فيلارمونيانىڭ ديرەكتورى نازىمبەك مولداحمەتوۆ.
ديريجەرلەردىڭ بىلتىر وتكەن العاشقى فورۋمىندا قوستانايلىقتار وزبەكستاننىڭ حالىق ءارتىسى فارۋح سادىقوۆتىڭ, قازاقستاننىڭ ەڭبەك سىڭىرگەن قايراتكەرى ارمان جۇدەباەۆتىڭ, قازاق ۇلتتىق ونەر ۋنيۆەرسيتەتىنىڭ پروفەسسورى ءانۋار نۇسىپباەۆتىڭ, رەسەيلىك اتاقتى ديريجەرلەر سەرگەي بەزبورودوۆ پەن ۆلاديمير ءلاۆريشيننىڭ ونەرىن تاماشالاعان ەدى. ولارمەن فيلارمونيا ۇجىمىندا كەڭەستى اڭگىمەلەر وتكىزىلگەن بولاتىن. مۇنداي پىكىر الماسۋلار بيىل دا ءوتتى.
فورۋمنىڭ قورىتىندى كونتسەرتىندە وبلىستىق مادەنيەت باسقارماسىنىڭ باسشىسى ەرلان قالماقوۆ فورۋمعا قاتىسقان, قوناق بولعان ونەر شەبەرلەرىنە وبلىس اكىمى اتىنان العىسىن جەتكىزدى.
ءنازيرا جارىمبەت,
«Egemen Qazaqstan»
قوستاناي