ورتالىق كوممۋنيكاتسيالار قىزمەتىندە «قازاقستان جاستارى-2018» ۇلتتىق بايانداماسىنىڭ تانىستىرىلىمى ءوتتى. قۇجاتتا جاس بۋىننىڭ ساياسي-قوعامدىق ۇدەرىستەرگە قاتىسۋ دەڭگەيى مەن مەملەكەتتىك جاستار ساياساتىنىڭ ناتيجەلىلىگىن ارتتىرۋ ماسەلەلەرى قاراستىرىلعان.
ۇلتتىق باياندامانى «جاستار» عىلىمي-زەرتتەۋ ورتالىعى الەۋمەتتىك زەرتتەۋلەر, رەسمي ستاتيستيكالىق مالىمەتتەر, جاستاردىڭ ءبىلىم جانە عىلىم, دەنساۋلىق ساقتاۋ, جۇمىسپەن قامتىلۋ, كاسىپكەرلىك جانە ت.ب. سالالارداعى جاعدايلاردى تالداۋ نەگىزىندە ازىرلەگەن.
− «قازاقستان جاستارى-2018» ۇلتتىق بايانداماسى مەملەكەتتىك ورگاندارعا, جاستار ساياساتى ينستيتۋتتارىنا, ءبىلىم بەرۋ مەكەمەلەرىنە, جاستار ۇيىمدارىنا, بۇقارالىق اقپارات قۇرالدارىنا, جاستار ساياساتىن جۇزەگە اسىرۋ مەن جاستاردى قولداۋ جۇمىسى ماڭىزدى بولىپ تابىلاتىن بارلىق تۇلعالارعا ارنالعان, – دەدى قوعامدىق دامۋ مينيسترلىگى جاستار جانە وتباسى ىستەرى كوميتەتى توراعاسىنىڭ مىندەتىن اتقارۋشى اسحات ورالوۆ.
الداعى ۋاقىتتا «قازاقستان جاستارى-2018» ۇلتتىق بايانداماسىنىڭ مالىمەتتەرى جاستاردىڭ دامۋىنا جاعداي جاساۋعا باعىتتالعان ءتيىمدى باسقارۋشىلىق شەشىمدەر قابىلداۋ ماقساتىندا قولدانىلادى. بايانداما 8 بولىمنەن تۇرادى: جاستاردىڭ دەموگرافيالىق سيپاتتاماسى, جاستار ساياساتىن ىسكە اسىرۋداعى حالىقارالىق تاجىريبە, وسكەلەڭ ۇرپاقتىڭ دەنساۋلىعى جانە بوس ۋاقىتى, جاستاردىڭ ومىرىندەگى ءبىلىم جانە عىلىم, الەۋمەتتىك-ەكونوميكالىق جاعدايى, قوعامدىق-ساياسي ۇردىستەردەگى بەلسەندىلىگى, مورالدىق-ادامگەرشىلىك جانە قۇندىلىقتىق ۇستانىمدارى جانە جاستار ورتاسىنداعى قىلمىس.
سونىمەن قاتار ۇلتتىق باياندامادا تۇڭعىش رەت ەلىمىزدىڭ جاستار پروگرەسىنىڭ يندەكسىندەگى ورنى تۋرالى جازىلعان.
– ورتالىق قۇرىلعالى بەرى وتكەن بەس جىلدىڭ ىشىندە جاستار ورتاسىنداعى جاعدايدى – جاستار اراسىنداعى ءدىني جاعدايدى, قۇندىلىقتى باعىتتار مەن نۇسقاۋلاردى, ۆولونتەرلىك قىزمەتىن, كوشى-قون كوڭىل-كۇيلەرىن, جاستاردىڭ كاسىبي باعىتتارىن, الەۋمەتتىك احۋالدى جانە جاستاردىڭ, سونىڭ ىشىندە الەۋمەتتىك تۇرعىدا ءالسىز, اۋىلدىق جاستاردىڭ, مونوقالالار جاستارىنىڭ الەۋمەتتىك تاجىريبەلەرىن دياگنوستيكالاۋعا جانە مونيتورينگىدەن وتكىزۋگە باعىتتالعان 20-دان استام كەشەندى الەۋمەتتىك زەرتتەۋلەر جۇرگىزىلدى, – دەدى «جاستار» عىلىمي زەرتتەۋ ورتالىعى» جشس ديرەكتورى تالعات قاليەۆ. ال ورتالىق ديرەكتورىنىڭ ورىنباسارى اسەم قايداروۆا وتكەن جىلدىڭ IV توقسانىندا ەڭبەك نارىعىنداعى 15-28 جاستاعى جۇمىس كۇشى 2157, 7 مىڭ ادامدى قۇراعاندىعىن, ونىڭ ىشىندە جۇمىس ىستەيتىن تۇرعىنداردىڭ سانى 2079,2 مىڭ ادامعا جەتكەندىگىن اتاپ ءوتتى.
– ءوزىن-ءوزى جۇمىسپەن قامتىعاندار 23,7 پايىزدى قۇرايدى, ال جالدامالى جۇمىسشىلار سانىنىڭ كورسەتكىشى – 76,3 پايىز. سونىمەن قاتار IV توقسانىندا NEET ساناتىنداعى جاستاردىڭ ۇلەسى تومەندەدى, ياعني 7 پايىزدى قۇرادى, – دەدى ءا.قايداروۆا.
سەرىك ابدىبەك,
«Egemen Qazaqstan»