قۇرىلىس سالاسىنداعى كاسىپكەرلەردىڭ زاڭدى جانە جەكە تۇلعالارىنىڭ باسىن بىرىكتىرەتىن «قۇرىلىسشىلار قاۋىمداستىعىن «بك-ستروي» جشس ديرەكتورى يگور كيم باسقاراتىن بولدى.
وبلىستىق كاسىپكەرلەر پالاتاسىندا وتكەن قاۋىمداستىقتىڭ العاشقى وتىرىسىنا قاتىسۋشىلار ءبىر اۋىزدان وسىلاي شەشتى.
ء«بىز بۇگىن بەكەر جينالىپ وتىرعان جوقپىز. مەن كساىپكەرلەر پالاتاسىنىڭ وڭىرلىك كەڭەسىنىڭ وكىلىمىن جانە كوپ جىلعى ءوز تاجىريبەمنەن ايتايىن, «اتامەكەن» كاسىپكەرلەردىڭ پروبلەمالارىن ءتيىمدى ءارى ناقتى شەشەدى. قازىر وزەكتى ماسەلە كىمدە جوق, بارىمىزدە بار. بىراق ونى اركىمنىڭ ءوز بەتىنشە شەشۋى قيىن. سوندىقتان ءبىز قۇرىلىسشىلار قاۋىمداستىعىن قۇرىپ وتىرمىز. بۇل ۇيىمعا تەك قۇرىلىسشىلار عانا ەمەس, قۇرىلىس ماتەريالدارىن وندىرۋشىلەر, جوبالاۋشىلار, تەحنيكالىق باقىلاۋشىلار, قىسقاسى, قۇرىلىسقا قاتىسى بارلاردىڭ بارلىعى دا كىرەتىن بولادى» دەدى يگور رومانوۆيچ.
العاشقى وتىرىستا-اق قاۋىمداستىققا 19 كاسىپورىن كىرۋگە تىلەك ءبىلدىردى. بىرلەستىك قۇرىلىسشىلاردىڭ وزەكتى ماسەلەلەرىن الدىمەن جيناقتاپ, ونى كاسىپكەرلەر پالاتاسىنىڭ كومەگىمەن شەشەتىن بولادى.
«سالالىق قاۋىمداستىقتى قۇرۋ بيزنەستى جانداندىرۋعا جانە كوپتەگەن ماسەلەلەر بويىنشا جيىنتىق پىكىر تۋعىزۋعا ىقپال ەتەدى. مىسالى, وبلىستا تۋريستىك جانە مەيمانحانا بيزنەسىنىڭ قاۋىمداستىعى جۇمىس ىستەيدى. قۇرىلىس سالاسى قازىر بەلسەندى, تەز دامىپ وتىر, ول كوپتەگەن ماسەلەلەردى شەشۋدى تالاپ ەتەدى. ءبىز ولاردى ۇكىمەت دەڭگەيىندە قارايتىن بولامىز» دەيدى وبلىستىق كاسىپكەرلەر پالاتاسىنىڭ ديرەكتورى مۇرات ابەنوۆ.
نازيرا جارىمبەت,
«ەگەمەن قازاقستان»
قوستاناي