تاراز قالاسىنداعى «بالاساعۇن» ورتالىق كونتسەرت زالىندا جامبىل وبلىسىنىڭ اكىمى اسقار مىرزاحمەتوۆ ءوڭىر حالقىنا ەسەپ بەردى. ەسەپتى كەزدەسۋدە اكىم بۇگىنگى تاڭدا وبلىستا بارلىق سالا بويىنشا وڭ ديناميكانىڭ قالىپتاسىپ وتىرعانىن ايتتى.
اكىم ءوز بايانداماسىندا وتكەن جىلى ونەركاسىپ ءونىمى 102,6, ينۆەستيتسيا كولەمى 108,4, جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەر سانى 107,8 پايىزعا ورىندالعانىن ايتتى. سونىمەن قاتار, جامبىل وبلىسىندا ەگىستىك جەرلەر 38 مىڭ گەكتارعا كوبەيىپ, 668 مىڭ گەكتارعا جەتكەن. ۇدەمەلى باقتار 200 گەكتارعا دەيىن ارتىپ, 625 گەكتار بولسا, سۋ ۇنەمدەۋ تەحنولوگياسى 21 پايىزعا كوبەيتىلگەن.
ەسەپتى كەزدەسۋ بارىسىندا اكىم وتكەن جىلى 1,6 مىڭ توننا قوي ەتى ەكسپورتتالىپ, كورسەتكىشتىڭ 5 ەسەگە وسكەنىن اتاپ ايتتى. سونىمەن قاتار, 1,0 مىڭ توننا سيىر ەتى ەكسپورتتالىپ, 9 ەسەگە دەيىن ارتقان. اۋىل شارۋاشىلىعى سالاسىندا ايتا كەتەر تاعى ءبىر جاڭالىق, وتكەن جىلى 55 كووپەراتيۆ قۇرىلىپ, 1500 ۇساق شارۋالار بىرىكتىرىلگەن, ناتيجەسىندە 12 مىڭ توننا ءونىم وندىرىلگەن. كورسەتكىش بويىنشا اۋىل شارۋاشىلىعى ءونىمى 265 ميلليارد تەڭگەنى قۇراپ وتىر.
اسقار مىرزاحمەتوۆ ءوز ەسەبىندە بىلتىرعى جىلى 482,3 مىڭ شارشى مەتر تۇرعىن ءۇيدىڭ پايدالانۋعا بەرىلگەنىن اتاپ كورسەتتى. «نۇرلى جەر» باعدارلاماسى اياسىندا 1673 وتباسىعا 28 كوپپاتەرلى ءۇي بەرىلىپ, 38 ينجەنەرلىك ينفراقۇرىلىم جوبالارى ىسكە اسىرىلعان. ال بالاما ەلەكتر قۋاتىنىڭ ۇلەسى جوسپارداعى 14 پايىزدان اسىپ, 16 پايىزعا جەتكەن.
قازىرگى كەزدە وڭىردەگى ۇلكەن ماسەلەنىڭ ءبىرى كوگىلدىر وتىن تارتۋ ماسەلەسى. بۇل رەتتە اكىم 377 ەلدى مەكەننىڭ 48 پايىزى گازداندىرىلعانىن, ەندى 81 ەلدى مەكەنگە ماگيسترالدى گاز قۇبىرى قۇرىلىسىن باستاۋعا 6,1 ميلليارد تەڭگە بولىنەتىنىن جەتكىزدى. سونىمەن قاتار, اۋىز سۋمەن قامتىلعان ەلدى مەكەندەر ۇلەسى 199 بولىپ, 53,3 پايىزدى قۇراعان. ەندى سۋ قۇبىرى جوق 13 ەلدى مەكەندى سۋمەن قامتۋعا بيىل 4 ميلليارد تەڭگەدەن استام قاراجات بولىنۋدە. ال, ەلباسى جولداۋىندا ايتىلعان تاريفتەردى تومەندەتۋ بويىنشا وڭىردە گاز باعاسى 6,3 جانە ەلەكتر قۋاتى 7,2 پايىزعا تومەندەگەن. تاعى ءبىر ماڭىزدى ماسەلە, اسقار مىرزاحمەتوۆ حالىقتى الەۋمەتتىك قولداۋعا, ونىڭ ىشىندە كوپبالالى جانە از قامتىلعان وتباسىلاردى قولداۋ ماقساتىندا 30,6 ميلليارد تەڭگە ءبولىنىپ وتىرعانىن, ناتيجەسىندە 10 جاتاقحانا سالىناتىنىن دا ايتتى.
ء وز كەزەگىندە جامبىلدىق جۇرتشىلىق اسقار مىرزاحمەتوۆكە جول, مەكتەپ, سۋ, گاز جانە وزگە دە سالا بويىنشا سۇراقتارىن قويىپ, ناقتى جاۋاپتار الدى. ماسەلەن شۋ اۋدانىنىڭ تۇرعىنى قازاقباي بايجۇمان ۇلى قانت قىزىلشاسىن مەركى قانت زاۋىتىنا جەتكىزۋ قيىن ەكەنىن, سوندىقتان اۋدانداعى بۇرىنعى قانت زاۋىتىنىڭ الاڭىنا قايتا زاۋىت سالۋعا بولا ما دەگەن ساۋال جولدادى. سونىمەن قاتار, تۇرعىن اكىمنەن بۇگىندە 21 سىڭنان استام حالقى بار تولە بي اۋىلىندا سپورت كەشەنىنىڭ جوق ەكەنىن دە ايتتى. ءوز كەزەگىندە اسقار مىرزاحمەتوۆ زاۋىت سالۋ ءۇشىن كەمىندە 30 مىڭ توننا ءونىم بولۋ كەرەكتىگىن, بىراق اۋدان بويىنشا مۇنداي ءونىمنىڭ جوق ەكەنىن جەتكىزدى. تۇرعىننىڭ ەكىنشى سۇراعىنا اكىم قۇنى 2 ميلليارد تەڭگە بولاتىن 170 جوبانىڭ ىرىكتەلگەنىن, سوندىقتان بۇل ماسەلە جوسپاردا بار ەكەنىن ايتتى. ءوز سوزىندە تالاس اۋدانى, اقكول اۋىلىنىڭ تۇرعىنى تۇرعىنباي تاجىبەك ۇلى جول ماسەلەسىن كوتەرىپ, اۋىل حالقىنىڭ اۋدان ورتالىعى قاراتاۋ قالاسىنا قاراي بارۋ ءۇشىن جول ازابىن كورەتىنىن ايتىپ, بۇل ماسەلەنىڭ قاشان شەشىلەتىنىن سۇرادى. ءوز سوزىندە اكىم جولدىڭ جوبالىق سمەتالىق قۇجاتتاماسى جاسالىپ, ول مەملەكەتتىك ساراپتامادان وتۋدە ەكەنىن, ەگەر وتكەن جاعدايدا قاراجات ءبولىنىپ جۇمىستىڭ باستالاتىندىعىن ايتىپ, جاۋاپ بەردى. «شالعاي قاراسۋ» القابى تۇرعىندارىنىڭ اتىنان ءسوز العان قايرات شاحانوۆ نە سەبەپتى مۇندا 150 عانا ءۇيدىڭ اۋىزسۋمەن قامتىلعانىن كوتەردى. اكىم ءوز جاۋابىندا بۇل ماسەلە تولىق تالدانعانىن, ءتيىستى جۇمىستار اتقارىلاتىنىن مالىمدەدى. ال تاراز قالاسىنىڭ تۇرعىنى اسان ۇسەنباي ۇلى جامبىل وبلىسىمەن الماتى, شىمكەنت قالالارىن جانە قىرعىز رەسپۋبليكاسىن بايلانىستىرىپ جاتقان اينالما جولدىڭ نە سەبەپتى اياقتالماي قالعانىن سۇرادى. اسقار مىرزاحمەتوۆ بۇل ورايدا شىنىندا دا قىرعىز رەسپۋبليكاسىنىڭ شەكاراسىنا دەيىنگى 16 شاقىرىم جولدىڭ سالىنباي قالعانىن ايتىپ, بۇل جۇمىستىڭ بيىلعى جىلى جالعاسىن تاباتىنىن ايتتى.
حاميت ەسامان,
«Egemen Qazagstan»
جامبىل وبلىسى