بيىل 1 ناۋرىز - العىس ايتۋ كۇنى شىمكەنت قالاسىندا وزىندىك ەرەكشەلىگىمەن اتالىپ وتەدى. جاڭا مازمۇندا وتكىزىلەتىن مەرەكەلىك شارالار 22 اقپاننان باستالىپ, 1 ناۋرىزعا دەيىن اپتا بويى جالعاسادى.
تارقاتىپ ايتساق, 22 اقپان – قايىرىمدىلىق كۇنى بولسا, 23 اقپان – تازالىق كۇنى رەتىندە وتەدى. 24 اقپان – كورشىگە ىزەت كۇنى, 25 اقپان – ۇستازعا قۇرمەت كۇنى, 26 اقپان – تاريحقا تاعزىم كۇنى, 27 اقپان – ىقىلاس كۇنى, 28 اقپان – ۇرپاقتار ساباقتاستىعى كۇنى, 1 ناۋرىز – العىس ايتۋ كۇنى بولماق.
بۇل تۋرالى شىمكەنتتەگى «قازاقستان حالقى اسسامبلەياسى» عيماراتىندا وتكەن بريفينگتە قالالىق قحا توراعاسىنىڭ ورىنباسارى ءمۇراتالى قالمۇراتوۆ ءمالىم ەتتى.
شارا ۇيىمداستىرۋشىلارى ەلدى بىرلىككە ۇندەيتىن مەرەكەنىڭ تۇپكى ءمانى كەزىندە ءتۇرلى سەبەپتەرمەن قازاق جەرىنە قونىس اۋدارعان ەتنوس وكىلدەرىنىڭ مەملەكەت قۇراۋشى ۇلتقا العىس ايتۋى دەپ تۇسىندىرەدى.
«اپتالىق ءىش-شارالاردىڭ باسى «قايىرىمدىلىق كۇنىنەن» باستاۋ الدى. قازاقستان حالقى اسسامبلەياسىنىڭ قايىرىمدىلىق كەرۋەنى شەڭبەرىندە «سىباعا» ءىس-شاراسى وتكىزىلدى. قالالىق اسسامبلەيا مەن تۇرىك ەتنومادەني بىرلەستىگى قۇرباندىق شالىپ, ۇلتتىق دۇنيەتانىمىمىزعا سايكەس جەتى ءتۇرلى ازىق-ت ۇلىكپەن تولىقتىرىلىپ قادىرلى قاريالارعا, ابزال انالارىمىزعا, جاس وتاۋ يەلەرىن قامتىعان 40-تان استام وتباسىعا سىباعا رەتىندە ۇلەستىرىلدى. 23 اقپان – تازالىق كۇنى رەتىندە بەلگىلەنسە, 24 اقپان – «كورشىگە ىزەت كۇنى» كۇنىندە وتەتىن ءىس-شارالار ەلدى بەرەكەلى بىرلىك پەن ىرىستى ىنتىماققا جەتەلەپ, كورشىلەر اراسىندا ءوزارا تۇسىنىستىك پەن قۇرمەتتى قالىپتاستىرۋدى كوزدەيدى. وسى كۇنى سايرامداعى وزبەك ەتنوسىنىڭ بەلدى ازاماتتارى كورشىلەس شاپىراشتى, وتەمىس, قىزىلسۋ, تاسساي, مارتوبە, توعىس, بادام, قاراباستاۋ تۇرعىن الاپتارىنىڭ ابزال قاريالارىن, ابىرويلى ازاماتتارىن سىيلى قوناق رەتىندە شاقىرىپ, ىزەتىن كورسەتەتىن بولادى», دەدى ءمۇراتالى ورازالى ۇلى.
قازىرگى تاڭدا شىمشاھاردا اپتالىق مەرەكەنى جەر-جەرلەردە وتكىزۋدىڭ تۇجىرىمداماسى ازىرلەنىپ, ءار كۇنگە وسىلاي ارنايى اتاۋلار بەرىلىپ, ءىس-شارالار ۇيىمداستىرىلۋدا.
نۇرشات توكەن,
«Egemen Qazaqstan»
شىمكەنت